Klei Aê Diê Blŭ: Klei Bi Hriêng 4:4-6
Êlan kliăng: “Đăm lui klei knhâo, leh anăn ñu srăng kiă kriê ih; khăp kơ ñu, leh anăn ñu srăng mgang ih” (Klei Bi Hriêng 4:6).
Klei êmuh ksiêm mĭn: Ya klei sa čô aê mtă mtăn kơ phung anak čô ñu? Ya ngă mtao Y-Đawit yua boh blŭ “Ñu” čiăng lač kơ klei knhâo? Hruê anei, si ngă drei mă yua klei mtă mtăn anei?
Klei Bi Hriêng mơ̆ng Klei Aê Diê Blŭ mdê kluôm dhuôm hŏng klei bi hriêng tui si lăn ala, kyuadah klei kñăm čiăng knhal tuč mơ̆ng Klei Bi Hriêng jing atăt mnuih dlăng hră čih anăn kơ Khua Yang Yêsu jing Pô Knhâo, msĕ si Ñu Pô hưn klă leh: “Diih ksiêm bi nik Klei Aê Diê Blŭ, kyuadah diih mĭn hlăm anăn diih mâo klei hdĭp hlŏng lar. Klei Aê Diê Blŭ anăn yơh hưn bi sĭt kơ kâo;” (Y-Yôhan 5:39).
Mtao Y-Đawit jih ai tiê mtô mjuăt Y-Salômôn, leh anăn truh gưl mtao Y-Salômôn lŏ mtô mjuăt phung anak ñu. Hlăm klei jing sa čô aê, mtao Y-Đawit mtô anak čô brei “djă pioh” leh anăn sĭt suôr “gưt” klei mtă srăng hdĭp (êlan 4). Phung hlăk ai brei kriăng hriăm, mbĭt hŏng răng kriê, djă pioh klei knhâo. Klei hriăm čiăng thâo leh anăn gưt djă pioh klei mtô knhâo jing sa khuang dlông sui, kyuanăn tơdah amâo djă pioh leh anăn răng kriê, drei ênưih snăk bi luč hĕ klei knhâo. Si ngă čiăng dưi gưt ngă klei Aê Diê mtă ti krah lăn ala ngañ bañ leh anăn gun kpăk anei? Amâo lŏ mâo êlan mkăn ôh êngao kơ klei sĭt suôr pioh mông grăp hruê mđing hmư̆, dlăng, hriăm, djă pioh, ksiêm mĭn leh anăn ngă tui si Klei Aê Diê Blŭ. Brei nao kơ Klei Aê Diê Blŭ hŏng knhuah êpa mhao, ai tiê tui duah, mđing hmư̆ Klei Aê Diê Blŭ, leh anăn jih ai tiê khăp čiăng Klei Aê Diê Blŭ (êlan 5). Dôk sĭt suôr hriăm Klei Aê Diê Blŭ leh anăn “đăm klah đuĕ ôh” mơ̆ng ñu.
Sĭt êmĭt êdi yơh tơdah mtao Y-Đawit yua boh blŭ “Ñu” čiăng lač kơ klei Knhâo: “khăp kơ ñu” (êlan 6). Hŏng mtao Y-Đawit, tui duah klei knhâo amâo djŏ knŏng duah klei thâo mĭn mơ̆ng hdruôm hră Klei Aê Diê Blŭ ôh ƀiădah tui duah Pô Knhâo, jing Khua Yang Yêsu, leh anăn mkŏ mjing klei bi mguôp khăp čiăng hŏng Ñu. Tơdah sa čô mnuih khăp kơ Khua Yang snăn srăng khăp mơh kơ klei Ñu Blŭ, leh anăn tơdah khăp kơ klei Ñu Blŭ, pô anăn srăng hdĭp hŏng klei knhâo thâo mĭn yơh.
Kyuanăn, tơdah drei nao kơ Khua Yang leh anăn kơ Klei Ñu Blŭ, snăn mnĭt mông anăn amâo djŏ tui duah klei mkăn ôh, ƀiădah knŏng klei hrăp leh anăn hơ̆k mơak hlăm klei bi mguôp hŏng Khua Yang Yêsu yơh, msĕ si rup mtao Y-Salômôn hưn lač klei mmih jăk kơ sa hlâo êkei mniê bi khăp hlăm hruê bi kuôl: “Ơ adei kâo, mô̆ kâo, kâo hriê kơ war djam kâo, kâo pĕ êa mir wăt mnơ̆ng ƀâo mngưi kâo, kâo ƀơ̆ng ksing hnuê wăt êa hnuê kâo, kâo mnăm kpiê kâo wăt êa ksâo êmô kâo. Phung găp Ơ phung mah jiăng hmei, ƀơ̆ng leh anăn mnăm bĕ; Ơ phung bi khăp, mnăm bĕ bi hrăp!” (Klei Mmuñ Siam Hĭn 5:1). Akâo Khua Yang atăt ba drei mŭt bi knal klei mmih hŏng Ñu leh anăn Klei Ñu Blŭ, čiăng kơ grăp bliư̆ nao kơ Klei Ñu Blŭ, ai tiê drei dưi mâo klei êđăp mrâo mda. Bi knal klei mmih hlăm klei bi mguôp hŏng Khua Yang Yêsu jing klei mtrŭt drei sĭt suôr hlăm klei dlăng, hriăm leh anăn gưt ngă djă pioh Klei Ñu Blŭ.
Si knhuah drei mâo hŏng Klei Aê Diê Blŭ?
Ơ Khua Yang, kâo bi mni lač jăk kơ Ih brei leh Klei Blŭ Hdĭp Ih čiăng bi mlih, ktrâo atăt, leh anăn mtô mjuăt kâo. Akâo kơ Ih brei kâo rơ̆ng dôk sĭt suôr hlăm klei bi mguôp hŏng Khua Yang leh anăn duah ƀuh klei êđăp mrâo mda hlăm klei Ih Blŭ êgao hĭn kơ “êa mmih mơ̆ng ksĭng hnuê”.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 16:5-17:18
Kênh Youtube BHKTHN:
