Klei Aê Diê BLŭ: Y-Mika 6:6-8
Êlan kliăng:
“8Ñu bi êdah leh kơ ih, Ơ mnuih, ya jing jăk,
leh anăn ya klei Yêhôwa mtă brei ih ngă.
Jing klei ngă klei kpă leh anăn khăp klei pap,
leh anăn êbat mbĭt hŏng Aê Diê ih hŏng klei luă gŭ.” (Y-Mika 6:8).
Klei êmuh ksiêm mĭn: Ya klei Aê Diê êmuh čiăng kơ phung ƀuôn sang Ñu brei bi mâo hĕ? Si mblang klei jăk jing? Si klei bi mguôp mâo hlăm klei jăk hŏng klei pap? Kyua mơ̆ng klei jăk Khua Yang, ya klei phung mnuih dưi mă tŭ? Si drei bi êdah ai tiê jăk hŏng pô mkăn?
Phung ƀuôn sang Israel hlăk đưm ngă leh lu mta klei soh, kyuanăn Khua Yang yua leh lu phung khua pô hưn êlâo čiăng bi mdih diñu. Khua pô hưn êlâo Y-Mika jing sa čô hlăm lu phung khua pô hưn êlâo Aê Diê yua, brei phat kđi phung ƀuôn sang Israel kyua klei soh diñu ngă. Hlăm hdruôm hră Y-Mika kdrêč 6, pô čih hră yua hdră êlan klei êmuh leh anăn wĭt lač čiăng mñă bi hdơr, mtô lač kơ phung ƀuôn sang Aê Diê. Ñu brei thâo klei yuôm Aê Diê čiăng kơ phung ƀuôn sang Ñu brei bi mâo hĕ, anăn amâo djŏ jing mnơ̆ng myơr leh anăn mnơ̆ng myơr čuh ôh, ƀiădah brei diñu thâo kral mta klei “ya jing jăk”. Khua Yang brei diñu thâo klei Khua Yang čiăng leh anăn brei diñu bi mâo hĕ anăn jing “ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ” (êlan 8).
“Khăp klei pap” amâo djŏ knŏng jing knhuah bi êdah ai tiê thâo pap ôh, ƀiădah ăt wăt klei bi êdah ai tiê thâo săng brei, pap brei kơ klei soh pô mkăn leh anăn kăp đru tơdah digơ̆ mâo klei čiăng. “Klei jăk” leh anăn “klei pap” mâo klei bi mguôp mbĭt. Kyua mơ̆ng mâo ai tiê jăk kơh mâo klei thâo pap brei, mơ̆ng năn yơh srăng atăt truh kơ bruă ngă bi êdah klei khăp klă sĭt. Êngao kơ bruă “ngă klei kpă” leh anăn “êbat … hŏng klei luă gŭ” Khua Yang ăt čiăng kơ grăp čô anak Ñu brei thâo “khăp klei pap”, čiăng lač brei thâo lui pap brei, bi êdah klei khăp săn asei, amâo mâo klei čoh čuăn ôh hŏng pô mkăn.
Klei jăk jing sa hlăm lu knuih Aê Diê, drei ƀuh êdah klă mngač hĭn. Hlăm hdruôm hră Klei Aê Diê Blŭ lu bliư̆ mpŭ mni kơ klei jăk Khua Yang (Klei Kbiă 34:6; Klei Mmuñ Hđăp 63:3; 89:1; 103:8; 115:1; Y-Êsai 55:3; Y-Luk 6:35…). Kyua hŏng ai tiê jăk Khua Yang yơh, mnuih dưi mâo klei pap brei klei soh, dưi dưn klei pap Khua Yang Yêsu Pô Bi Mtlaih bi tui brei klei soh. Kyua Khua Yang jing jăk snăn Ñu ăt gĭr dôk čang guôn phung mnuih soh lŏ wĭt kơ Ñu. Msĕ mơh kyua Khua Yang jing jăk, snăn khă drei ngă soh lu bliư̆ dưn, Ñu ăt pap brei klei soh drei tơdah drei thâo kmhal sĭt kơ klei soh hŏng jih ai tiê. Kyuanăn yơh, khua ƀĭng kna Y-Pôl mtô mtă leh kơ drei: “Brei diih ngă jăk hdơ̆ng diih pô, bŏ hŏng klei thâo pap, bi pap brei hdơ̆ng diih, msĕ si Aê Diê pap brei leh kơ diih hlăm Krist.” (Êphêsô 4:32)
Jing phung anak Aê Diê, brei grăp čô drei hriăm hdĭp bi êdah ai tiê jăk, thâo pap msĕ si Khua Yang drei, brei thâo “khăp kơ klei jăk” čiăng dưi ngă ênŭm klei Khua Yang čiăng drei ngă. Tơdah phung đăo thâo khăp mpŭ kơ klei jăk, snăn srăng hdĭp bi êdah klei khăp hŏng klei klă sĭt, mơ̆ng năn yơh phung mkăn mâo myun thâo ƀuh Khua Yang ênưih hĭn.
Si ngă knhuah hdĭp drei bi êdah ai tiê klei mĭn “khăp čiăng klei jăk” leh mơ̆ ka?
Ơ Khua Yang, akâo kơ Ih đru kâo thâo khăp čiăng klei jăk, hriăm tui hlue knuih Khua Yang bi êdah klei thâo pap, klei khăp săn asei hŏng phung riêng gah kâo, čiăng kơ lu mnuih dưi ƀuh Khua Yang hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 22:22-23:12
Kênh Youtube BHKTHN:
