Klei Aê Diê Blŭ: Y-Yôhan 8:1-11
Êlan kliăng: “Yêsu lač, “Kâo kăn bi kmhal ih rei. Nao bĕ, leh anăn đăm lŏ ngă soh ôh.” (Y-Yôhan 8:11b).
Klei êmuh ksiêm mĭn: Si klei arăng ngă mnêč jhat čiăng bi lĕ Khua Yang Yêsu? Si klei Khua Yang ghaih mkra? Si knhuah Khua Yang dôk dơ̆ng hŏng mniê ngă soh tlĕ piu? Si knhuah dôk dơ̆ng drei kreh ngă hŏng phung ngă soh?
Êjai Khua Yang Yêsu dôk mtô kơ phung ƀuôn sang hlăm Sang Yang, snăn phung khua čih hră leh anăn phung Pharisi atăt ba sa čô mniê arăng mâo mă êjai gơ̆ tlĕ piu, diñu ngă mnêč lông dlăng čiăng mâo klei dưi kčŭt kơ Khua Yang. Diñu êmuh Khua Yang si ngă dưi bhĭr boh tâo kơ mniê anăn tui si klei bhiăn Y-Môis amâodah hơăi. Diñu atăt Khua Yang mŭt hlăm klei truh “ksŭng nao kăn dưi, kdŭn wĭt kăn dưi”, ƀiădah Khua Yang Yêsu thâo klă mnêč jhat diñu. Khua Yang amâo mâo wĭt lač tlă anăp klei diñu êmuh ôh, ƀiădah kkui čih hŏng kđiêng Ñu ti lăn, leh anăn Khua Yang lač kơ diñu: “Hlei hlăm phung diih amâo mâo klei soh ôh, brei ñu bhĭr boh tâo êlâo hĭn kơ mniê anei”. Klei êmuh anei yơh rang mdah boh klă phung khua knơ̆ng Israel leh anăn wăt lu phung mkăn mơh, kyuadah amâo mâo ôh sa čô hlăm phung diñu amâo mâo soh. Snăn diñu sa čơ čô kdŭn đuê̆ jih.
Klei Khua Yang Yêsu lač hưn mdah klei sĭt nik, “Kyuadah jih jang mnuih soh leh sơăi leh anăn amâo tơl mâo klei guh kơang Aê Diê ôh,” (Rôm 3:23). Jih jang drei jing mnuih soh sơăi, kyuanăn yơh grăp čô ciăng sơăi kơ klei pap khua Yang, klei pap brei leh anăn klei jăk Khua Yang. Boh blŭ pap brei, mâo mbĭt wăt klei pap brei klei soh leh anăn bi êdah klei jăk. Klei anei mñă bi hdơr kơ grăp čô drei amâo dưi bi kmhal arăng ôh tơdah diñu ngă soh, drei kăn mâo klei dưi mplĕ klei soh amâodah phat kđi arăng rei tơdah amâo mâo ôh klei dưi mơ̆ng Khua Yang. Khua Yang Yêsu mtô: “Đăm phat kđi arăng ôh, čiăng kơ arăng amâo phat kđi diih.” (Y-Mathiơ 7:1). Knŏng hjăn păn Khua Yang yơh mâo klei dưi phat kđi (Y-Yakơ 4:12).
Hrô kơ klei phat kđi mniê ngă soh tlĕ piu, Khua Yang Yêsu dôk dơ̆ng hŏng gơ̆ hŏng klei jăk leh anăn klei pap. Khua Yang knŏng êmuh mniê anăn: “Amâo mâo pô bi kmhal ih ôh hĕ?” (êlan 10b). Khua Yang amâo phat kđi mniê anăn ôh, ƀiădah mñă kơ mniê ngă soh tlĕ piu anăn: “Nao bĕ, leh anăn đăm lŏ ngă soh ôh” (êlan 11c). Klei mñă anei sĭt nik srăng đru mniê anăn thâo kral klei pap Khua Yang, klei jăk leh anăn klei pap brei klei soh amâo mâo knhal leh anăn lui klei soh.
Khua Yang Pô Bi Mtlaih drei jing Khua Yang kơ klei khăp, bŏ hŏng klei jăk leh anăn kreh pap brei klei soh. Ñu hriê amâo djŏ čiăng phat kđi klei soh ôh, ƀiădah kăp čiăng pap brei nanao klei soh kơ hlei pô thâo kmhal leh anăn hưn klei soh hŏng Ñu (I Y-Yôhan 1:9). Khua Yang ăt čiăng kơ drei dôk dơ̆ng hŏng klei jăk leh anăn pap brei klei soh pô mkăn tơdah phung ayŏng adei drei ngă soh. Kyuadah grăp čô drei jing mnuih soh sơăi, mă tŭ klei Khua Yang pap brei klei soh, kyuanăn kăp dôk hdĭp jăk, pap brei klei soh pô mkăn leh anăn yua klei khăp đru diñu thâo kmhal kơ klei soh.
Si ngă drei kreh mplĕ klei soh kơ pô mkăn tơdah ƀuh digơ̆ ngă soh mơ̆?
Ơ Khua Yang, akâo kơ Ih pap brei kơ kâo kyuadah kâo kreh ruăt djăl mplĕ klei soh, phat kđi pô mkăn. Akâo kơ Ih đru kâo thâo yua klei khăp, klei jăk, klei pap brei klei soh čiăng đru pô mkăn thâo kmhal kơ klei soh tơdah digơ̆ ngă soh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 23:13-24:14
Kênh Youtube BHKTHN:
