Thứ Sáu 20/11/2026
Trang chủ BÀI HỌC KINH THÁNH HÀNG NGÀY BAHNAR Lăp Minh Lăm ‘Bar – 21/11/2026

Lăp Minh Lăm ‘Bar – 21/11/2026

2

 

 

I Kôrintô 10:14-22 

“Bơ̆n ‘nĕ sa et ‘bar pang, sa et kơchŏk ‘blŏk kơ Yêsu boih, na sa et dơ̆ng kơchŏk đe sơmah kơ yang kơnê̆. Sa et tơ gơ’bang Yêsu boih, na sa et dơ̆ng tơ anih đe sơmah kơ yang kơnê̆.” (I Kôrintô 10:21)

 

Nơ̆r jet tơchĕng pơwao:

–               ‘Bok Pôl tơgŭm bơ̆n hlôh rơđah gah tơdrong sa tơmam soi kơ yang nai thoi yơ?

–               Yua kơ kiơ bơngai “et sa” lăm tơdrong sơmah kư̆m nhen thoi “pôm đon” hăm yang kơnê̆?

–               Nơ̆r ‘bok Pôl khan tơbăt năr adrol sơ̆ kư̆m ‘bơm kơ lu bơ̆n dang ei thoi yơ?

            Gah tơdrong sa tơmam soi sơmah kơ rup yang noh tơdrong kăl dêh, tơpă păng gĭt kăl, thoi noh ‘bok Pôl oei wơ̆t dơ̆ng hăm tơdrong lăng đơ̆ng pah nai dơ̆ng, lăm sơ̆p hla bơar nơ̆r ‘Bok Kei-Dei âu kư̆m pơm kơ lu bơ̆n rŭng răng yua kơ nhen tơplơ̆ hăm  tơdrong mă ‘bok Pôl đei pơma lăm chăl 8. Gah tơdrong rup yang jơ̆ ưh kơ yua, sa dah mă ưh kơ sa soi sơmah kơ rup yang kư̆m ưh kơ đei ‘bơm tơdrong kiơ.

            ‘Bok Pôl tơgŭm lu bơ̆n hlôh mĭnh tơdrong rơđah hloh lăm rup pơtih “sa et” (trong 21). Hăm tơdrong pơlơ̆k nơ̆r “dang” dah “pôm đon” truh tơ puăn wơ̆t (trong 16-20), păng nơ̆r ‘nâu jing nơ̆r tơm lăm tơdrong pơma ‘bơm, sư tơ’bôh kơplah Huch Sa Pơgơ̆p, lu bơ̆n oei tơ’bưh hăm pham Kră Yang, kiơ̆ kơ tơdrong ‘lơ̆ng rơgoh, kơplah noh lu bơ̆n oei pơgơ̆p minh jơhngơ̆m đon hăm ‘Bok Krist iung arih đơ̆ng lôch lăm minh akâu (trong 16-17). Lăm trong 18 minh wơ̆t dơ̆ng sư yua rup bơngai sa sĕch tơmam sơmah đei pơyơ̆r kơpal chơnang soi Kră Yang lăm kơplah kơkuh kơ Kră Yang lăm hnam akŭm tơm, kư̆m thoi noh mơ̆n, tơdrong minh ‘nu bơngai “ sa et”  kơplah soi sơmah lăm tơdrong kơkuh kư̆m pơm ăn kơ bơngai ‘noh dang “pôm đon” pơgơ̆p jing minh hăm yang kơnê̆ (trong 20). Dôm tơdrong đei roi thoi âu rơđah tơpă; kon pơlei Kră Yang athei rơih lăp minh đĕch lăm ‘bar. Phara kơ chăl 8, pơma gah tơdrong rơngei mơ̆ng kơ wă rơih sa dah mă ưh kơ sa tơmam sa đei tĕch tơ chơ̆ dah mă đei bơngai bu nai krao wơ̆n, âu bơih lăm tơdrong “soi sơmah” păng “sa et” pơgơ̆p hơdai lăm jơ tơpă wang năm, oei wă pơma mă tơpă, sa tơmam soi sơmah lăm chăl jơ kơkuh thoi noh dang pôm đon hăm yang kơnê̆.

                ‘Bok Pôl đei nơ̆r pơma khan tơbăt tơpă: “Yua kơ thoi noh na ơ lu ‘nhŏng oh mă inh ‘mêm kơeng, iĕm athei tŭk lê̆ đĭ dôm tơdrong yang kơnê̆ hŏ, ‘nĕ pă kiơ̆ sư.” (trong 14). Nơ̆r khan tơbăt ‘nâu ưh kơsĭ ‘măn kơ Khul Bơngai Lui lăm Pơlei Kôrintô arih lăm chăl arih ‘bĕnh kơ tơdrong soi sơmah kơ tơdrong lui nai noh kư̆m nhen thoi teng neng wă tơbăt ăn kơ lu bơ̆n dang ei, mă khan lu bơ̆n ưh kơ kuh kơ rup yang hăm tơdrong wang hơdai kiơ̆ soi sơmah kơ yang nai, kơkuh kơ rup tơ anih pơm yang, mă-lei dah ưh kơ pơ’lơ̆ng, lei tơdrong mă đêl đei păng anih lu bơ̆n wang năm kư̆m pơm ăn kơ lu bơ̆n puh pơ̆k dang pôm đon hăm yang kơnê̆ mă lu bơ̆n ưh kơ băt, mơ̆ng păng lăp đon dôm tơdrong hơ’mon gah lăng ti, phim, pơdah tơdrong reh hơri, lu tơdrong reh brŏ pơtrŭt gah pơm pơyô kư̆ kă, tôn teh, tơduă drŏ-nglo iŏk băl, tơduă drŏ-kăn iŏk băl… kư̆m thoi pôm đon hăm yang kơnê̆, apĭnh Kră Yang ăn kơ lu bơ̆n gơh pơ’lơ̆ng.

Kơkuh kơ Ih ơ Kră Yang, apĭnh mơnat ăn kơ inh yua kơ lơ wơ̆t inh nhen thoi pôm đon hăm yang kơnê̆ mă oei ưh kơ băt apinh tơgŭm inh băt kơdih păng pơ’lơ̆ng hăm lu anih dôm tơdrong đêl inh wang năm, wă kơ chăl arih inh kơkuh minh Kră Yang đĕch, krao khan yua anăn Kră Yang Yêsu Krist, Amen.

Hăm đei tơdrong kiơ lu bơ̆n kăl kơ tơplih đơ̆ng rŏng kơ pơhrăm ‘bai ‘nâu?

Đŏk sơ̆p hla bơar nơ̆r ‘Bok Kei-Dei lăm pêng sơnăm: I Têsalônik 4

Kênh Youtube BHKTHN:

https://www.youtube.com/c/bhkthn

Bài trướcKnŏng Sa Hlăm Dua – 21/11/2026
Bài tiếp theoChỉ Một Trong Hai – 21/11/2026