Luka 10:25-37
“Tơdrong bơ̆n hre kơ đe, bơ̆n athei jah ăn na jah tôch. Mă gah tơdrong ‘mêm kơ bôl buăl ưh kơ tôch ôh. Bơngai bu ‘mêm kơ bôl buăl, bơngai noh ưh kơ hŭt ôh dôm tơdrong juăt ‘Bok Kei-Dei pơkă.”
(Rôm 13:8)
Nơ̆r jet tơchĕng pơwao:
- Tơdrong Kră Yang Yêsu hăm Thây bơtho Khôi juăt đei pơma dơnuh tơ’bôh ăn kơ bơ̆n Thây bơtho khôi juăt hlôh nơ̆r ‘Bok Kei-Dei thoi yơ?
- Kră Yang yua tơdrong hơmon bơngai Samari pơm ‘lơ̆ng wă bơtho ăn kơ lu bơ̆n kăl kơ arih ‘mêm mơnat kơ bơngai nai thoi yơ?
– Đei plei đơ̆ng tơdrong arih băt ‘mêm mơnat noh thoi yơ?
Minh ‘nu Thây bơtho khôi juăt đei apinh Kră Yang Yêsu: “ơ ‘Bok Thây inh kăl kơ pơm tơdrong kiơ wă kơ đei tơdrong arih ling lang”? Kră Yang đei apinh hơlơ̆k dơ̆ng sư păng Thây bơtho khôi juăt đei tơl thoi âu athei đĭ jơhngơ̆m ‘mêm kơ Kră Yang păng ‘mêm kơ bôl buăl nhen thoi ‘mêm kơ akâu kơdih. Kră Yang đei tơl: “Ih tơl trŏ bơih athei pơm thoi noh na đie tơdrong arih” (trong 25-28). Lei wă kơ đei tơdrong arih ling lang lei athei wei răk lăp ‘bar Khôi juăt ‘nâu ĕch ah? Ưh kơ ‘bônh thoi noh đĕch ôh! Thây bơtho khôi juăt âu apinh Kră Yang wă pơlong lăng Kră Yang Yêsu, tơdrong âu pơsĭt ăn kơ sư ưh kơ tơpăt. Sư đei apinh Kră Yang lei bu mă bơngai jê̆ sư, noh jơ̆ sư wă kơ tơdrong ‘mêm sư wă ‘mêm ưh kơ lơ ngai mă lei lăp jum dăr kơ sư đĕch mă lei Khôi Juăt Kră Yang ưh kơ wă thoi noh, Khôi juăt Kră Yang athei ‘mêm kơ bôl buăl thoi bơ̆n ‘mêm kơ akâu kơdih. Sư đei tơdrong hlôh băt gah Khôi Juăt mă lei ưh kơ hơrih kiơ̆ kơ tơdrong ‘mêm tơpă. Kră Yang bơtho, băt thoi noh jơ̆ ưh tam mă tôm ‘mơ̆i.
Kră Yang roi hơmon kơ minh ‘nu bơngai Samari ‘lơ̆ng đei tơdrong ‘mêm bơtho kăl kơ ‘mêm mơnat kơ đĭ đăng kon bơngai kiơ̆ thoi Kră Yang wă. Hơdrol hloh, bơngai Samari jơ̆ khŭl bơngai mă lu bơngai Israel hơreh dêh, mă lei sư đei tơgŭm kơ minh ‘nu bơngai đei tơdrong truh noh jơ̆ bơngai Israel. Tơdrong ‘mêm tơpă ưh kơ đei tơdrong pơgăn kiơ̆ kơ tơdrong a-drĕch adrŭng, dah tơdrong lui, dah tơdrong pơtih lăm teh đak dah đei bơngai nai roi ưh kơ ‘lơ̆ng thoi yơ kơ nai mă bơ̆n wă tơgŭm. tơdrong ‘mêm tơpă ưh kơ đei wă chă tơdrong lơi; păng ưh kơ đei apinh bơngai âu bơngai bu na wă tơgŭm? hăm trŏ kơ wă tơgŭm ưh? Đei yua kơ bơ̆n lăm tơdrong kiơ ưh dah bơ̆n tơgŭm bơngai âu? Tơdrong ‘mêm mơnat tơpă noh jơ̆ tơdrong tơgŭm song ăn đĕch ưh kơ kăl kơ đe pơ ‘mong. Kră Yang Yêsu đei bơtho; “lu iĕm athei ‘mêm kơ bơngai mă ayăt kơ iĕm; athei dŏng tơgŭm, athei băt song mơng tơmam, ‘nĕ kơ bơ̆l hăl”(Luka 6:35). Mă ‘bar, bơngai Samari tơgŭm bơngai mă đei tơdrong truh ưh kơ yua kơ sư trŏ kơ tơgŭm păng ưh kơ trŏ kơ sư pơm chă pơtrŏ, mă lei sư tơgŭm noh jơ̆ yua kơ tơdrong ‘mêm tơpă đơ̆ng lăm jơ-hngơ̆m sư, “’bôh na brơ̆k mơnat đơ̆ng lăm jơ-hngơ̆m” (trong 33), Sư ưh kơ pơm trŏ kơ nhen thoi bơngai chă ăn tơmam, tơdrong wă kơ đei anăn đe ư-ang, dah ưh kơ pơm lei đei bơngai lăng ưh kơ lăp đon, dah tơgŭm wă chă lơi ăn kơ lu sư kơdih! Mă Pêng, tơdrong mơnat tơ’bôh hăm tơdrong jang tơpă tơpăt: Năm jê̆, chô̆ hơmet đêl ‘bơ̆t anih jĭ, hơtŏk tơ aseh, ba năm tơhnam tơmoi, ăn jên tơmam, pơm keh dôm tơdrong wei lăng minh ‘nu bơngai jĭ jăn. Bơngai Samari đei ‘măn jơnăr, jơhngơ̆m pran, jên tơmam, tơbôh ăn kơ tơdrong ‘mêm tơpă ling lang kơ đei ba ăn tơdrong hơnat kơ bơngai mă ‘mêm, ưh kơ sĭ tơgŭm bơ̆t jơ rơhơi đĕch. Bơngai mă jê̆ bơ̆n ưh kơ sĭ thoi Thây bơtho khôi juăt đei tơchĕng ưh kơ trŏ ‘noh. Đĭ đăng bơngai mă kăl kơ bơ̆n tơgŭm noh jơ̆ bơngai jê̆ bơ̆n păng bơ̆n kăl kơ đei tơ’bôh tơdrong ‘mêm mơnat ưh kơ wă lơi ăn kơ bơ̆n tơdrong kiơ đơ̆ng bơ̆n tơgŭm.
Mă khan lăm tơduă bơngai lui dah bơngai ‘nguaih, arih hăm tơdrong ‘mêm mơnat noh jơ̆ pơm pơkah kơ khôi juăt Kră Yang (Rôm 13:8), păng đei Kră Yang lăp đon (Hêbrơ 13:16). Kră Yang ưh kơ wă kơ bơ̆n arih yua kơ bơ̆n kơdih mă lei arih wă tơ’bôh pơsĭt kơ Kră Yang lăm teh đak bĕnh kơ tơdrong yoch. Kơplah bơ̆n arih ‘mêm mơnat lăm kon pơlei pơla, mă khan tơdrong jang bơ̆n ‘noh iĕ ră tơdrong noh gô tơgŭm tơdrong ‘mêm rai lanh păng Tơdrong ‘Nao ‘Lơ̆ng gô pơchrang hơdah ăn kơ lơ bơngai.
Ơ Kră Yang mă ‘mêm! Apinh Ih ăn kơ inh tơdrong ‘mêm đơ̆ng Ih wă kơ inh ‘mêm kơ Ih păng ‘mêm kơ bơngai nai nhen thoi Ih đei ‘mêm kơ inh bơih. Yua anăn Kră Yang Yêsu Krist, Amen.
Lu bơ̆n pơm tơ’bôh ăn tơdrong ‘mêm kơ bơngai nai thoi yơ bơih?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 30
Kênh Youtube BHKTHN:
