Hơriso 10:1-18
“Kră Yang ‘bôh bơih, tơdrong răm, pơmat tat hăm tơdrong gleh, na ti Ih pơm tơwih kơ lu sư. Lu bơngai răm ‘băm jao akâu lu sư tơ Kră Yang; Kră Yang jơ̆ Tơ’ngla tơgŭm lu bơngai mơti” ( Hơriso 10:14)
Nơ̆r jet tơchĕng pơwao:
– Bơngai chih Hla ar đei ôr krao hăm Kră Yang thoi yơ gah lu bơngai kơnê̆?
– Hơdrol kơ tơdrong noh truh, bơngai chih hla ar oei tơwih jơhngơ̆m gah Kră Yang păng pơm tơ’bôh đon lui thoi yơ?
– Pơm thoi yơ lu bơ̆n lui kơjăp kơ Kră Yang ‘lơ̆ng tơpăt oei pơgơ̆r mă khan tơdrong Sư sek tơlang nhen thoi hiơ̆ ‘biơ̆?
Hơriso 10 jơ̆ nơ̆r ôr krao đơ̆ng lu bơngai lui yom kơplah tơdrong ‘lơ̆ng nhen thoi tơdrong kơnê̆ luăn sa mă-lei Kră Yang oei hreh: “Ơ Kră Yang, yua kơ kiơ Ih dơ̆ng ataih, kơplah đei tơdrong pơmat lơi Ih ôn akâu?” ‘Nâu jơ̆ tơdrong ơh sơ’ngon tôch đon pă băt dang yơ kơplah lu bơngai ăchăng tŭk Kră Yang păng pơhơi tơdrong Kră Yang oei yak năm jum dăr, pơang, pơrŏ pôk pơư, hưp ham, hơlĕnh pơdăr, pơm kơnê̆, chă đon pơm kơnê̆ păng tơgar iŏk mŭk tơmam lu bơngai ‘lơ̆ng. Lu sư tơchĕng lăm jơhngơ̆m khan ưh kơ đei ‘Bok Kei-Dei, păng tơdah đei lei Kră Yang kư̆m ưh kơ ‘bôh tơdrong lu sư pơm, ưh kơ gơh pơm kiơ kơ lu sư. Lu sư oei arih hiôk đĕch, mơ̆ng kơ wă pơm tơdrong kơnê̆! “Kră Yang ‘Bok Kei-Dei hiơt bơih, Kră Yang ôn muh măt Sư, lăng pă ‘bôh!” (trong11).
Đơ̆ng rŏng kơ pơyơ̆r pơjao dôm tơdrong ơh sơ’ngon truh noh, bơngai chih hla ar jơhngơ̆m ngơk lăng tơ Kră Yang ‘Bok Kei-Dei. Sư khan tơdrong hlôh băt lu bơngai kơnê̆ noh glăi. Kră Yang ‘lơ̆ng tơpăt păng mơsêh mơyang ling-lang wei pơgơ̆r. Tơdrong Sư sek tơlang noh kơjung dêh na lu sư ưh kơ ‘bôh (trong 5-6,11). Sư oei kĕ chơ̆n păng krao khan hăm đĭ jơhngơ̆m wă kơ bơwei tơdrong tơpăt (trong 12-15). Sư khan Kră Yang jơ̆ pơtao ling-lang, bơwei tơdrong sek tơlang tơpăt hơnơ̆ng; Kră Yang lăng ‘bôh đĭ-đăng, Sư ling-lang tơchĕng tơtăm dŏng tơgŭm lu bơngai gơh tơgŭm păng phak trŏ kơ lu bơngai trŏ kơ phak. Lu bơngai bơngai kơnê̆ mơdrŏng lăm minh chăl arih đĕch, mă-lei Kră Yang pơgơ̆r noh ling-lang, ba ăn tơdrong ‘lơ̆ng tơpăt ling -lang. Hlôh băt gah Kră Yang thoi yơ gô pơm lăm tơdrong arih kơ minh ‘nu bơngai. Kơplah bơ̆n lui Kră Yang băt, ‘bôh, mơ̆ng nơ̆r bơ̆n păng dŏng pơklaih đơ̆ng tơdrong đe pơgŏ pơđep na lu bơ̆n gô hiôk hian ‘bơ̆t anăp đe pơm kơnê̆, oei arih ‘lơ̆ng tơpăt păng wei-lăng lu bơngai mơti mơtuei thoi ‘Bă lu bơ̆n tơ plĕnh ti (trong 17-18). Kơplah lu chu iŏk đe pơm kơnê̆, Nơ̆r Kră Yang gô pơlung bơ̆n, Kră Yang ưh kơ pơhiơ̆ tơdrong Sư sek tơlang, lu bơ̆n kăl kơ chơ̆n jơhngơ̆m, “Plĕnh kơjung hloh kơteh dang yơ, na trong Inh kơjung hloh kơ trong lu iĕm păng đon tơchĕng Inh kơjung hloh kơ đon tơchĕng lu iĕm kư̆m dang noh” (Êsai 55:9).
Pơtao Đawĭt đei bơtho tơdrong sư đêl mơn tơdrong arh sư “’Nĕ kơ tơtăm kơ đe pơm kơnê̆, păng ‘nĕ kơ gar ‘ngeng kơ lu bơngai pơm kơnê̆. Thoi ‘nhĕt lu sư gô jô kro păng thoi ‘nhĕt hơdrih gô jô hŏnh. Gơnang bĕ kơ Kră Yang păng pơm ‘lơ̆ng. Oei bĕ lăm dêh char păng oei arih lăm tơdrong ‘lơ̆ng tơpăt Sư (Hơriso 37:1-3).
Ơ Kră Yang, phŏ phŏ sư inh đei ‘bôh nhen thoi ataih dêh ! Nơ̆r Ih tơ’blŏk kơ inh ‘blŏk kơ Ih jơ̆ Tơ’ngla băt đĭ tôm tơdrong, ‘bôh đĭ đak măt inh lĕch ro, mơ̆ng dôm nơ̆r lu bơngai đe pơgŏ pơđep. Ih gô pơm ‘mong kiơ̆ kơ khei ‘năr păng gô pơm kiơ̆ kơ Ih wă. Apinh tơgŭm inh oei lui gơnang, chơ̆n hơđơ̆ng oei răp gô, wei inh hăm tơdrong tơpăt đơ̆ng ‘Bă tơplĕnh. Yua anăn Kră Yang Yêsu Krist, Amen.
Lu bơ̆n đei pơm thoi yơ kơplah bơ̆n ‘bôh tơdrong kơnê̆ nhen thoi kĕ jei tơdrong ‘lơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Jop 25
Kênh Youtube BHKTHN:
