II Pêtrôs 2:1-3
“…Tơdrong lu sư chă bơtho noh wă pơrăm lu bơngai lui đĕch păng lu sư sơngah kơ Yŏng bơ̆n Yêsu Krist tơ’ngla mă huai iŏk lu sư tăm. Lu sư pơm thoi noh, ‘Bok Kei-Dei Sư ưh kơ anat ôh, Sư gô phak hloi tơpă.” (II Pêtrôs 2:1b)
Nơ̆r jet tơchĕng pơwao:
– ‘Bok Bơtho hơlĕnh sư lĕch đơ̆ng yơ păng bơtho tơdrong lui kiơ?
– Lĕch yua đơ̆ng tơdrong jang đei ‘bơtho hơlĕnh păng lu bơngai, mơ̆ng lu sư gô thoi yơ?
– Lu bơ̆n kăl kơ pơm kiơ wă kơ huay kơpơ̆k huŏng lăm trong glăi, đơ̆ng ‘bok hơlĕnh?
Kră Yang Yêsu juăt kơ pơma hăm lu bơngai păng Sư khan, lăm năr hơtuch kơnh gô đei lơ ‘bok bơtho hơlĕnh truh (Mathiơ 24:11). Tơpă thoi ei, ‘bok khan lê̆ hơdrol gô lĕch đơ̆ng kon pơlei, păng ‘Bok Pêtrôs đei tơbăt lê̆ kư̆m gô đei lơ lu bơngai bơtho hơlĕnh gô mơ̆t tơ lăm ‘nhŏng oh bơ̆n, gô mơ̆t hloi lăm Khul Lui. Lu ‘bok bơtho hơlĕnh âu gô hrŭk ao linh jang hơdah hơdong (II Kôrintô 11:14), pôk kơdih lu sư khan băt kơ Kră Yang, bơtho tơdrong sĭt tơpăt. Mă-lei satan jơ̆ ‘bă tơdrong hơlĕnh pơdăr na lu ‘bok bơ tho hơlĕnh lu sư “ na lu sư kư̆m hơlĕnh pơdăr kơ iĕm” ham dêh wă khan wă kơ đei jên tơmam, lu sư mơdro sa pơm kơ đon lui Bơngai Lui hăt kơ chă lơi kơdih (trong 3), mă khan layơ gô pơrăm lu sư păng lu bơngai mơ̆ng lu sư.
Yua kơ jơhngơ̆m hưp ham, lu ‘bok bơtho hơlĕnh bơtho khan “Tơdrong lu sư chă bơtho noh wă răm lu bơngai lui đĕch, păng lu sư sơngah kơ Yŏng bơ̆n Yêsu Krist Tơ’ngla mă huai iŏk lu sư tăm. Lu sư pơm thoi noh, ‘Bok Kei-Dei Sư ưh kơ anat ôh, Sư gô phak hloi tơpă” (trong 1). Dôm tơdrong lu sư bơtho noh tơplơ̆ hăm nơ̆r lu ‘bok khan lê̆ hơdrol tơpă lăm Pah So bơtho tơdrong ưh kơ trŏ hăm dôm tơdrong Kră Yang păng lu bơngai jơ̆ng ‘bang Sư botho. Tơdrong bơtho ưh kơ trŏ lăm Sơ̆p Hla ar ‘Bok Kei-Dei pơma, lu ‘bok bơtho hơlĕnh pơsĭt kơ lu sư sơngah kơ Kră Yang jơ̆ Tơ’ngla dŏng pơklaih tih. Tuch luch ‘măn kơ lu sư ‘noh “‘Bok Kei-Dei Sư ưh kơ anat ôh, Sư gô phak hloi tơpă.” (trong 1). ‘Bơ̆t anăp măt, lu bơngai bơtho hơlĕnh lu sư ngeh khan klaih đơ̆ng tơdrong sek tơlang đơ̆ng Kră Yang ‘Bok Kei-Dei, mă-lei ưh kơ jor ôh, tơdrong pơrăm noh lĕch đơ̆ng pơm glăi gô đei tơpă yua kơ “Mă đơ̆ng sơ̆ ‘Bok Kei-Dei phak lu bơngai thoi noh ngăl, na lu bơngai noh kơnh ‘Bok Kei-Dei kư̆m phak mơ̆n, ưh kơ lê̆ ôh” (trong 3). Hăm lu bơngai mơ̆ng kiơ̆ lu bơngai hơlĕnh ưh kơ phara kiơ kơ lu bơngai rơih iŏk trong kơtam kơ băt na ba ăn trong hiong răm (Mathiơ 7: 13-14). ‘Bok Pêtrôs đei tơbăt: “kư̆m đei lơ bơngai lui, kiơ̆ sư pơm tơdrong yoch kư̆-kă; kơlih kơ thoi noh na lu bơngai ưh kơ lui pơjăm tơdrong ‘lơ̆ng tơpăt ‘Bok Kei-Dei” (trong 2), yua đơ̆ng ‘bok bơtho hơlĕnh pơdăr arih kư̆-kă, pơm yoch ưh kơ mơlâu, pơm kơ Anăn Kră Yang đe pơjăm hiĕk achơ̆.
Dang ei, lu bơ̆n kư̆m oei tơ’bơ̆p lơ tơdrong bơtho tơdrong lui ưh kơ trŏ đơ̆ng lu bơngai bơtho hơlĕnh iung wă pơhlŭ pơlung lu kon pơlei Kră Yang. Athei ‘blŏk satan jơ̆ yang bơtho hơlĕnh blŭng a sơ̆, sư yua lu bơngai bơtho hơlĕnh wă hơlĕnh lơ bơngai. Bơngai lui athei mă pơnam hŏk pơhrăm Nơ̆r Kră Yang, gơnang kơ Yang Bơhngol ‘Lơ̆ng bơtho tơ’bôh wă kơ kơchăng hăm lu bơngai ưh kơ pơm kiơ̆ Nơ̆r Kră Yang, lu bơngai tơblang Nơ̆r Kră Yang kiơ̆ kơdih wă. Lu bơ̆n athei pơma ưh hăm lu bơngai bơtho đe, pơtơm đe pơm kiơ̆ dôm tơdrong tơplơ̆ hăm tơdrong sĭt tơpăt đơ̆ng Yang Bơhngol ‘Lơ̆ng bơtho tơ’bôh lăm Nơ̆r Kră Yang ‘Bok Kei-Dei. Athei đĭ jơhngơ̆m kơchăng, bơngai bơtho hơlĕnh hiong răm na lu bơngai mơ̆ng, lui păng pơm kiơ̆ nơ̆r lu bơngai bơtho hơlĕnh kư̆m gô hiong răm thoi noh mơ̆n, yua “ Bơngai măt tol ưh kơ gơh chông ba bôl sư măt tol ôh, hli kơ bre sư nơnăm gô huŏng tơ hơlŭng” (Luka 6:39).
Ơ Kră Yang, apinh ăn kơ inh hưch hanh hŏk pơhrăm Nơ̆r Ih wă kơ băt kơ Ih rai lơ hloh. Apinh tơgŭm inh huay kơ druh kiơ̆ lu bơngai bơtho tơplơ̆ hăm nơ̆r sĭt tơpăt păng wer weh đơ̆ng tơdrong kiơ lăng khan ưh kơ trŏ, kơnê̆. Yua anăn Kră Yang Yêsu Krist, Amen.
Lu bơ̆n kơchăng thoi yơ hăm lu bơngai bơtho hơlĕnh?
Đŏk Sơ̆p Hla ar ‘Bok Kei-Dei lăm pêng sơnăm: Jop 24.
Kênh Youtube BHKTHN:
