Klei Aê Diê Blŭ: Y-Mathiơ 5:14-16
Êlan kliăng: “Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.” (Y-Mathiơ 5:16)
Klei êmuh ksiêm mĭn: Ya dua mta rup Khua Yang Yêsu yua čiăng mtô kơ klei mngač? Si brei phung anak ƀuôn sang Aê Diê mtrang mngač klei kpă ênô Khua Yang ti lăn ala? Ya klei kñăm čiăng brei drei mtrang mngač?
Khua Yang Yêsu dôk mtô mblang kơ phung tui hlue Ñu. Khua Yang bi hmô phung anak buôn sang Aê Diê “jing klei mngač kơ lăn ala” (êlan 14). Ñu yua dua rup ênưih thâo săng : sa boh ƀuôn prŏng dôk ti dlông čư̆ leh anăn sa pui kđen kă ti gơ̆ng (êlan 15). Ƀuôn prŏng ti dlông čư̆ ƀuh êdah nanao mtam mơ̆ng kbưi. Pui kđen leh čuh arăng amâo mă kčaih lŏ guôm hĕ ôh, ƀiădah dưm ti anôk dưi mtrang mngač kơ jih jang mnuih. Dua rup anei mñă kơ klei đăo drei amâo djŏ pioh bi hgăm amâodah mdăp hĕ ôh; ƀiădah brei bi êdah čiăng kơ jih jang mnuih ƀuh.
Klei mngač ăt bi êdah klei sĭt nik leh anăn ya klei mdăp bi hgăm. Klei mngač hriê suôt đuê̆ klei mmăt. Kyuanăn, tơdah phung anak ƀuôn sang Aê Diê jing “klei mngač”, snăn brei mtrang mngač klei sĭt nik leh anăn klei kpă ênô Khua Yang. Mblang jing tơdah drei dôk hdĭp ênuah ênô leh anăn klă kluôm, drei dôk mtrang mngač knuih Aê Diê yơh. Ti krah lăn ala anôk klei bi tŭ ư jing klei bhiăn ngă, Phung Sang Aê Diê Khua Yang dôk hdĭp kpă ênô srăng êdah kdlưn êdimi. Năng ai arăng amâo srăng ư ai mbĭt nanao ôh, ƀiădah sĭt nik diñu srăng thâo kral mâo sa klei mdê hjăn snăk. Mbĭt anăn, klei mngač srăng ba wăt klei mđao leh anăn klei ktrâo atăt mơh. Jih jang bruă ngă ênuah ênô, jăk, bŏ hŏng klei thâo pap ăt srăng mtrang mngač guh kơang, dưi mâo lu mnuih ƀuh. Tơdah drei thâo pap brei, mă bruă leh anăn mđing uêñ kơ mnuih mkăn, drei dôk bi êdah klei kpă ênô leh anăn klei khăp Aê Diê yơh.
Khua Yang Yêsu brei thâo klei kñăm čiăng klei klei mtrang mngač: “čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê ” (êlan 16). Klei kñăm amâo djŏ jing klei hrui hrip klei arăng mđing kơ drei pô ôh, ƀiădah atăt arăng mđing dlăng phă Khua Yang. Klei hdĭp drei jing klei hưn bi sĭt, čiăng mpŭ mni kơ Aê Diê. Phung Sang Aê Diê Khua Yang brei mtrang mngač klei kpă ênô leh anăn klei khăp Khua Yang ti krah lăn ala. Tăp năng, kyua huĭ kơ phung ƀĭng găp lui amâo lŏ hlăp mbĭt, huĭ arăng bi êmut kyuanăn drei ruah klei dôk kriêp ñăt amâodah bi hlai mbĭt hŏng phung lu, amâo jhŏng bi êdah klei mngač bi mtlaih. Tinei, Khua Yang Yêsu mñă snei, bruă ngă bi hgăm hĕ klei mngač srăng bi luč hĕ klei kñăm čiăng ñu mâo.
“Jing klei mngač” amâo mblang drei jing klă kluôm ôh. Ƀiădah čiăng lač drei mprăp brei Yang Krist mtrang mngač găn hŏng klei hdĭp drei hlăm djăp mta bruă ngă grăp hruê. Phung anak ƀuôn sang Aê Diê brei thâo săng drei jing klei mngač kơ lăn ala, leh anăn Phung Sang Aê Diê Ñu brei jing msĕ si gơ̆ng pui mtrang čiăng atăt lu mnuih wơr êlan hriê kơ Khua Yang.
Ya klei drei dôk mtrang kơ lăn ala hŏng klei drei dôk hdĭp grăp hruê?
Wah lač: Ơ Khua Yang, akâo Khua Yang mñă brei kâo hdơr nanao kâo jing klei mngač leh anăn brei mtrang mngač klei kpă ênô leh anăn klei khăp Khua Yang kơ lăn ala. Akâo Khua Yang brei kâo thâo bi mguôp hŏng Phung Sang Aê Diê čiăng kơ Phung Sang Aê Diê jing klei mngač atăt lu mnuih hriê kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
