Kaulauxais 3:12-14
Nqe cim zaj kawm:
“Nej yog Vajtswv haivneeg. Vajtswv hlub nej thiab xaiv nej cia ua nws cov menyuam lawm; yog li ntawd, nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev.” (Kaulauxais 3:12)
Phau Txhais Tshiab HMOWSV:
“Vim li no, nej yog cov uas Vajtswv xaiv thiab yog cov uas dawb huv thiab nws hlub, nej cia li hnav lub siab tab ncuab, siab khuvleej, siab txo hwjchim, siab mos siab muag thiab thev taus.”
Lus nug xav:
– Timthawj Paulus piav txog tej cwjpwm twg uas cov ntseeg yuav tsum hnav?
– Thaum koom Tswv Yexus tib lub cev, peb ib leeg yuav tsum ua zoo li cas rau ib leeg?
– Thaum Vajtswv txhua tus menyuam hnav txojkev hlub, Pawg Ntseeg yuav zoo li cas?
Pawg Ntseeg tsis yog qhov chaw uas peb tuaj sib sau ua ke txhua lub lim tiam xwb, tiamsis tseem yog qhov chaw uas peb pab pawg tau txhim tsa los ntawm Tswv Yexus tus cwjpwm. Timthawj Paulus rov qhia txog txoj koob hmoov uas peb tau Vajtswv xaiv: Tus ntseeg Yexus yog tus uas tau Vajtswv xaiv, tau Nws ntxuav dawb huv thiab tau Nws hlub tshua (nqe 12a). Qhov no yog lub hauvpaus rau txhua yam kev ua neej: Peb tsis yog siv zog ua txhua yam kom tau lwm tus lees yuav, tiamsis peb ua neej txawv vim peb tau tus Tswv hlub lawm. Dhau qhov ntawd, Timthawj Paulus thiaj nqua hu hais tias: “Nej cia li hnav lub siab tab ncuab, siab khuvleej, siab txo hwjchim, siab mos siab muag thiab thev taus” (nqe 12b HMOWSV). Tej cwjpwm no tsis yog cia li tshwm muaj, tiamsis yuav tsum los “hnav” txhua hnub. Ib yam li thaum xaiv khaub ncaws hnav, peb yuav tsum xaiv coj raws li Tswv Yexus tus qauv. Tej cwjpwm no cheemtsum muaj nyob hauv Pawg Ntseeg heev. Lub siab khuvleej pab peb paub mob siab rau cov uas qaug zog. Txojkev ua siab zoo qhia tshwm los ntawm tej lus hais thiab tej haujlwm uas mos muag. Kev txo hwjchim pab kom peb tsis muab hlob thiab tsis muab yus tsaws siab dua lwm tus (Filipis 2:3). Txojkev mos siab muag pab kom daws tau kev kub ntxhov thaum muaj kev tsis sib haum xeeb. Txojkev ua siab ntev pab kom muaj qhov chaw rau txojkev ntseeg thiab txojkev cia siab rau tus Tswv loj hlob tuaj (Loos 5:4). Tej cwjpwm no ua rau Pawg Ntseeg dhau los ua ib qho chaw uas muaj kev nyab xeeb thiab puv npo koob hmoov hlub, ua rau coob leej xav los cuag tus Tswv.
Timthawj Paulus qhia ntxiv hais tias: “Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm” (nqe 13). Tsis muaj Pawg Nseeg twg hauv ntiajteb no yuav zoo tag nrho, vim tibneeg yeej zoo tsis txaus. Kev xav sib txawv, tsis sib nkag siab thiab kev mob siab yog tej yam uas zam tsis dhau. Qhov uas ua rau Pawg Ntseeg hlob tiav tsis yog tsis muaj kev tsis sib haum xeeb, tiamsis yog nyob ntawm qhov uas paub zam txim. Kev zam txim yog qhov chaw uas kev ncaj ncees thiab kev hlub tshua sib ntsib. Vajtswv tsis saib sib kev txhaum, tiamsis Nws pub koob hmoov zam txim dhau ntawm Tswv Yexus. Ib yam li ntawd, peb tau nqua hu qhuab ntuas cov kwvtij tej kev txhaum raws qhov tseeb, tiamsis yuav tsum puv npo koob hmoov hlub. Thaum peb zam txim, peb tabtom ua neej raws Txojmoo Zoo nyob hauv peb tej kev sib raug zoo nrog tus kheej thiab nrog lwm tus ib ncig.
Thaum kawg, Timthawj Paulus qhia yam tseem ceeb tshaj plaws rau peb hais tias: “Qhov uas tseemceeb dua tej ntawd huv tibsi, nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke” (nqe 14). Txojkev hlub yog lub hauvpaus uas txuas txhua yam cwjpwm no ua ke. Thaum muaj txojkev hlub, Pawg Ntseeg yuav dhau los ua qhov chaw uas muaj kev sib koom siab, kev txhim kho thiab kev loj hlob. Vajtswv Txojlus hnub no caw peb los tshuaj xyuas tus kheej. Peb puas tabtom ua neej phim lub meejmom uas tus Tswv pub rau peb lawm? Cia li hnav Tswv Yexus tej cwjpwm txhua hnub, txaus siab zam txim thiab txhim kho txojkev sib koom siab hauv Pawg Ntseeg.
Thov Vajtswv,
Tus Tswv, thov Koj pab kom nyuam yaus paub hnav txojkev ncaj ncees, lub siab khuvleej thiab paub sib txuas nrog lwm tus, thiaj txhim kho tau Koj Pawg Ntseeg kom muaj zog thiab huamvam. Nyuam yaus tuav Tswv Yexus Khetos lub npe thov, Amees.
Zaj kawm no qhuab ntuas peb txhim kho tus cwjpwm twg?
Nyeem Vajluskub hauv peb lub xyoos: Yauj 5
Kênh Youtube BHKTHN:
