Tes Haujlwm 2:42-47
Nqe cim zaj kawm:
“Lawv niaj hnub tuaj kawm tej uas cov timthawj qhia, lawv sib hlub sib pab, lawv koom noj Yexus rooj mov thiab thov Vajtswv ua ke.” (Tes Haujlwm 2:42)
Lus nug xav:
– Cov ntseeg xubthawj ua qhia tshwm lawv txojkev ntseeg li cas?
– Lawv tau ua neej ncaj ncees thiab sib hlub li cas? Qhov txiaj ntsig yog dabtsi?
– Peb tau twv (được thách thức) kom peb ua neej li cas?
Pawg Ntseeg xubthawj tau sau tseg hais tias yog ib pab pawg uas tau hloov dua tshiab tiag tiag. Tom qab Vaj Ntsujplig nqis los, cov ntseeg tsis yog tsuas sib sau ua ke los pehawm tus Tswv xwb, tiamsis lawv kuj ua neej nyob ua ke zoo li ib tse neeg ntawm sab ntsujplig. Lawv lub neej qhia tshwm meej txog Vajtswv txojkev ncaj ncees thiab txojkev hlub tshua.
Cov ntseeg xubthawj tau mob siab ua neej qhia tshwm lawv txojkev ntseeg los ntawm kev rau siab kawm Vajtswv Txojlus, tuav txojkev sib raug zoo nrog lwm tus thiab thov Vajtswv (nqe 42). Lub hauvpaus ntawm kev ua neej ncaj ncees pib ntawm Vajtswv Txojlus. Lawv tsis ua neej dog dig, tiamsis muab Vajtswv Txojlus los ua qhov tseemceeb, coj lawv tej kev xav, tes haujlwm thiab kev sib raug zoo nrog lwm tus. Thaum Pawg Ntseeg ua neej tiag tiag nrog Vajtswv Txojlus, ces lawv lub neej yuav maj mam hloov raws li Vajtswv tus qauv. Tsis tas li ntawd xwb, lawv kuj ua neej muaj txojkev sib raug zoo tseeb nrog lwm tus. Qhov no tsis yog kev sib raug zoo li phooj ywg sab nraud xwb, tiamsis yog kev sib koom siab tiag tiag, sib txhawb nqa thiab sib txhawb zog hauv txojkev ntseeg. Lawv koom taug tib txojkev, sib faib tej kev zoo siab thiab tej nra hnyav, thiab koom tig siab mus rau tus Tswv, tus uas yog lub hauvpaus ntawm lawv txojkev cia siab.
Tshwjxeeb tshaj ntawd, lawv tau qhia tshwm txojkev hlub tshua los ntawm tej haujlwm uas pom tseeb. Cov ntseeg sawvdaws koom ib lub siab, nyias nqa nyias tej qhov txhia chaw tuaj tso ua ke ua sawvdaws tug, lawv txaus siab muag lawv tej cuab tam los pab cov uas muaj kev cheemtsum (nqe 44-45). Qhov no qhia rau peb pom hais tias txojkev hlub tshua tsis yog tsuas yog ib qho kev xav hauv nruab siab xwb, tiamsis tseem yog kev nqis tes ua haujlwm vim txojkev hlub. Lawv tsis ua neej qia dub, tiamsis suav hais tias lwm tus tej kev cheemtsum kuj yog yam uas lawv yuav tsum mob siab rau. Thaum Pawg Ntseeg ua neej zoo li no, Vajtswv txojkev hlub tau qhia tshwm meej heev ntxiv. Qhov no yog tus cwjpwm ntawm Txojmoo Zoo: Peb tau txais koob hmoov hlub lawm, yog li ntawd peb kuj txaus siab muab pub lwm tus. Tus sau uas yog Lukas tseem sau ntxiv hais tias: “Lawv niaj hnub mus pehawm Vajtswv hauv lub Tuamtsev, thiab lawv noj Yexus rooj mov thiab noj mov ua ke hauv lawv tej tsev ib lub dhau ib lub, txawm yog muaj ntau muaj tsawg los lawv sawvdaws zoo siab noj” (nqe 46). Nov yog ib daim duab qhia txog ib Pawg Ntseeg uas ciaj sia. Vajtswv cov menyuam “niaj hnub” sib sau ua ke los ntawm lub siab hlub, zoo siab thiab ua siab dawb paug. Lub neej ntseeg tsis yog ib lub nra hnyav, tiamsis yog kev zoo siab uas tawm hauv lub siab dawb paug los.
Qhov txiaj ntsig ntawm Pawg Ntseeg zoo li ntawd yog “tej neeg sawvdaws puavleej hwm lawv. Tus Tswv niaj hnub coj neeg los ntseeg coob zuj zus ntxiv rau cov ntseeg” (nqe 47). Ib pab pawg uas ua neej ncaj ncees thiab sib hlub yuav dhau los ua tej lus timkhawv uas muaj hwjchim. Lwm tus tsis yog tsuas hnov Txojmoo Zoo xwb, tiamsis lawv kuj pom Txojmoo Zoo dhau ntawm Pawg Ntseeg kev ua neej. Vajtswv Txojlus hnub no twv peb ua neej, Pawg Ntseeg tsis yog qhov chaw uas peb tsuas tuaj koom txhua lub lim tiam xwb, tiamsis tseem yog qhov chaw uas Vajtswv cov menyuam txhua tus tau hloov dua tshiab, ua neej ncaj ncees thiab sib hlub.
Thov Vajtswv,
Tus Tswv, thov qhuab ntuas nyuam yaus kom paub koom tes txhim kho Koj Pawg Ntseeg kom dhau los ua qhov chaw uas txojkev ncaj ncees tau qhia tshwm, txojkev hlub tshua tau nthuav dav, thiab luag pom Koj nyob hauv peb. Nyuam yaus tuav Tswv Yexus Khetos lub npe thov, Amees.
Peb ua qhia tshwm tus Tswv rau zej zog licas?
Nyeem Vajluskub hauv peb lub xyoos: Yauj 1
Kênh Youtube BHKTHN:
