Klei Aê Diê Blŭ: Y-Yôsuê 7:1-5
Êlan kliăng: “Knang kơ Yêhôwa hŏng jih ai tiê, đăm knang ôh kơ klei mĭn ih pô.” (Klei Bi Hriêng 3:5)
Klei êmuh ksiêm mĭn: Ya klei soh kjham Y-Yôsuê leh anăn phung ƀuôn sang Israel ngă? Ya ngă phung ƀuôn sang Aê Diê amâo dưi ôh hlăm klei bi blah hŏng ƀuôn điêt Ahi? Si klei hriăm mñă kơ drei čiăng mâo nanao klei Aê Diê atăt gai?
Leh klei myang găn êa krông Yurdan leh anăn klei myang dưi mâo mă ƀuôn Yêrikô, Klei Aê Diê Blŭ lŏ čih: “Snăn Yêhôwa dôk mbĭt hŏng Y-Yôsuê; leh anăn ñu mâo klei hing ang tar ƀar čar” (Y-Yôsuê 6:27). Ară anei, phung ƀuôn sang Aê Diê nao blah ƀuôn Ahi jing sa ƀuôn điêt, ƀiădah tinei Y-Yôsuê leh anăn phung ƀuôn sang Israel ngă soh kjham snăk. Êlan tal êlâo kdrêč anei mphŭn hŏng boh hră “ƀiădah”. Anăn jing hlăk phung ƀuôn sang Israel năng ai brei lŏ dơ̆ng gưt asăp Aê Diê leh mâo Ñu ngă klei myang leh anăn brei klei hing ang, ƀiădah diñu lŏ ngă soh kyua Y-Akan mă mnơ̆ng năng bi rai luč mơ̆ng ƀuôn Yêrikô. Hlue si asăp mtrŭn mơ̆ng Aê Diê mơ̆ng ênuk Y-Môis snăn ƀuôn prŏng leh anăn jih jang mnơ̆ng hlăm ƀuôn srăng rai luč čiăng myơr kơ Aê Diê, knŏng êngao kơ prăk, mah, jih jang mnơ̆ng hŏng kông, msei srăng pioh hjăn kơ Yêhôwa leh anăn hlăm sang hjiê Ñu (Y-Yôsuê 6:18-19). Kyua anăn, klei Aê Diê ngêñ đĭ hŏng phung ƀuôn sang Israel.
Amâo thâo kơ klei soh phung ƀuôn sang Aê Diê ngă leh, ăt kăn dôk guôn mđing hmư̆ klei Aê Diê lač msĕ si gưl êlâo, Y-Yôsuê čŏng tiŏ nao mnuih hiu ksiêm dlăng leh anăn ba tlâo êbâo čô kahan nao blah ƀuôn Ahi. Y-Yôsuê hmư̆ leh klei hâo hưn phung knuă hiu ksiêm dlăng jing ƀuôn anei ênưih plah miă, mnuih hlăm ƀuôn ƀiă đei, amâo guôn ba jih jang kahan nao blah ôh, leh anăn anăn jing klei soh lŏ čuê Y-Yôsuê ngă leh. Hlăk Y-Yôsuê čŏng ngă hlue si klei phung knuă, knang hlăm ai ktang mnuih ƀuôn sang pô leh anăn klei thâo mĭn pô hrô kơ akâo hlue si klei Khua Yang čiăng, snăn knhal tuč jing phung Ahi tiŏ mă leh anăn mdjiê tlâo pluh čô. Ai tiê phung ƀuôn sang dlưh đoh msĕ si êa kyua huĭ hyưt, amâo mdê ôh hŏng ai tiê phung mtao nah êngao tơdah hmư̆ phung ƀuôn sang Israel găn êa krông Yurdan (Y-Yôsuê 5:1)!
Mâo Aê Diê brei klei dưi bi blah hŏng ƀuôn Yêrikô kjăp leh anăn lu mnuih ƀuôn sang, năng ai ngă leh kơ Y-Yôsuê hŏng phung knuă hiu dlăng ƀuh hơ̆k mơak. Diñu ƀuh pô amâo guôn ngă hlue si klei Aê Diê ktrâo atăt ôh, boh nik hlăk dơ̆ng plah mă sa ƀuôn điêt msĕ ƀuôn Ahi. Tơdah phung đăo ăt tŭ ư kơ pô hlăk mâo Aê Diê kiă kriê, brei klei êđăp ênang, tŭ jing, snăn ăt srăng tuôm hŏng klei truh msĕ snăn mơh. Tơdah drei dlăng hơăi mang klei soh leh anăn klei mplư hlăm lăn ala anei, amâo sĭt suôr hlăm klei bi mguôp hŏng Aê Diê, amâo lŏ dơ̆ng tui duah klei Aê Diê ktrâo atăt hlăm Klei Aê Diê Blŭ čiăng hlue ngă, snăn ăt srăng ênưih mâo klei amâo tŭ jing. Klei hriăm mñă kơ drei đăm tŭ ư kơ pô, đăm knang hlăm ai ktang pô ôh. Akâo kơ Aê Diê brei drei knang nanao kơ Aê Diê hlăm djăp klei bi blah hlăm klei hdĭp, hur har hlăm klei bi kƀĭn, klei wah lač leh anăn hriăm Klei Aê Diê Blŭ grăp hruê čiăng mâo nanao ai ktang leh anăn klei Aê Diê atăt gai.
Dôk ti anăp klei dleh dlan msĕ si amâo đei prŏng ôh, si drei ngă čiăng msir mgaih?
Wah lač: Ơ Khua Yang, ti krah klei hdĭp dleh dlan anei, akâo kơ Ih đru kâo amâo knang hlăm ai ktang pô ôh, amâo tŭ ư kơ pô ôh ƀiădah knang nanao kơ Khua Yang čiăng dưi hĭn hlăm djăp klei mplư, lông dlăng hlăm klei hdĭp tui hlue Ih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
