Klei Aê Diê Blŭ: Y-Mathiơ 26:1-13
Êlan kliăng: “Sĭt nik Kâo lač kơ diih, tar ƀar lăn ala ti anôk arăng srăng mtô klei mrâo mrang jăk anei, arăng srăng yăl dliê bi hdơr klei mniê anei ngă leh” (Y-Mathiơ 26:13)
Klei êmuh ksiêm mĭn: Si phung ƀĭng kna leh anăn phung knơ̆ng gĭt gai klei đăo lŏ wĭt ngă hŏng Khua Yang Yêsu? Klei H’Mari ngă leh kơ Khua Yang Yêsu ya čiăng lač? Si ngă drei hriăm mơ̆ng klei H’Mari bi hmô leh?
Klei yăl dliê anei truh dua hruê êlâo kơ Knăm Klei Găn phung Yuđa. Lŏ sa blư̆ Khua Yang Yêsu hưn kơ phung ƀĭng kna kơ klei Ñu djiê: “Arăng srăng jao Anak Mnuih brei arăng pơ̆ng Ñu ti kyâo bi kal” (êlan 2). Klei Aê Diê Blŭ amâo brei thâo ôh ya klei phung ƀĭng kna Ñu blŭ, ƀiădah bi phung knơ̆ng khua ngă yang leh anăn phung khua mduôn bi trông čhai hdơ̆ng diñu čiăng “mă čăp Yêsu hŏng klei hgăm leh anăn čiăng bi mdjiê Gơ̆”, ƀiădah diñu amâo jhŏng ngă ôh klei anăn êjai klei huă mnăm, huĭdah mâo klei bi rŭng ti krah phung ƀuôn sang (êlan 4-5).
Êjai phung knơ̆ng gĭt gai klei đăo mâo klei mĭn msĕ snăn, snăn ti ƀuôn Ƀêthani, mâo sa čô mniê anăn gơ̆ H’Mari bi êdah klei bi hmô jăk hlăm klei khăp kơ Khua Yang leh anăn mă bruă kơ Ñu. Bi msĕ hŏng Y-Markôs 14:3-9 leh anăn Y-Yôhan 12:1-8, drei thâo kơ mniê anei jing H’Mari, adei H’Mart leh anăn Y-Lasar yơh. H’Mari myơr leh kơ Khua Yang sa giêt êa ƀâo mngưi yuôm prăk snăk, jing jih dŏ ngăn gơ̆ mâo. H’Mari yơh jing pô dôk gŭ leh ti jơ̆ng Khua Yang čiăng hmư̆ klei Khua Yang mtô (Y-Luk 10:42), kyuanăn ñu thâo tơdah amâo yua ôh mmông găl anei bi êdah klei ñu mpŭ kơ Khua Yang snăn amâo lŏ mâo mmông găl ôh. Hŏng klei hlĭng êa ƀâo mngưi ti boh kŏ Khua Yang, ñu hưn Khua Yang jing Mtao kơ klei hdĭp ñu. Wăt tơdah phung djiêô gah ƀuah ñu, “Êa ƀâo mngưi anei arăng dưi čhĭ yuôm snăk, leh anăn bi mbha prăk anăn kơ phung ƀun ƀin” (êlan 9) ƀiădah Khua Yang Yêsu bi mni leh kơ ñu, “Gơ̆ ngă leh sa klei jăk snăk kơ Kâo” (êlan 10), “Klei gơ̆ hlĭng êa ƀâo mngưi anei ti asei mlei Kâo jing klei gơ̆ mkra kơ klei dơr Kâo” (êlan 12), leh anăn Khua Yang Yêsu lač klei H’Mari ngă srăng jing klei bi hmô kơ klei mă bruă leh anăn klei huĭ mpŭ kơ Khua Yang tar ƀar lăn ala.
Hruê anei, čiăng bi êdah klei khăp kơ Khua Yang, thâo săng kơ Khua Yang leh anăn bi êdah djŏ klei mpŭ kơ Khua Yang, brei drei pioh lu mmông dôk gŭ ti jơ̆ng Khua Yang čiăng dlăng leh anăn hriăm Klei Ñu Blŭ. Êngao kơ klei hdĭp, Khua Yang lŏ brei kơ drei lu klei yuôm bhăn mơh. Brei drei thâo yua mmông găl myơr mmông, klei thâo, prăk kơ Khua Yang čiăng bi mđĭ Ƀuôn Ala Mtao Ñu. Tơdah khăp kơ Khua Yang leh anăn myơr jih kơ Ñu, drei ăt srăng tuôm hŏng lu klei mưč, klei ƀuah, klei arăng phat kđi mơh. Ƀiădah tui bĕ klei H’Mari bi hmô leh, dlăng nanao kơ Khua Yang ngă klei bi mơak kơ Ñu hŏng mnơ̆ng drei myơr leh anăn bruă drei ngă kơ Ñu. Mnuih knŏng dlăng ti êngao, ƀiădah Khua Yang dlăng kơ ai tiê. Ñu yơh srăng dŏng mgang leh anăn brei klei mưn kơ drei.
Hŏng si ai tiê leh anăn hŏng si knuih drei dôk mă bruă kơ Khua Yang?
Wah lač: Ơ Khua Yang Yêsu, bi mni kơ Ih bi mtlaih leh klei hdĭp kâo leh anăn brei kâo mă bruă kơ Ih, đru kâo myơr jih klei hdĭp kâo kơ Ih, hdĭp bi guh kơang kơ Anăn Ih leh anăn mpŭ mni kơ Anăn Ih hŏng bruă kâo mă. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
