Klei Aê Diê Blŭ: Klei Bi Hriêng 27:21
Êlan kliăng: “Anôk bi lik pioh kơ prăk, kpur pui pioh kơ mah, ƀiădah arăng ksiêm sa čô mnuih tui si klei arăng bi mni kơ ñu” (Klei Bi Hriêng 27:21)
Klei êmuh ksiêm mĭn: Ya klei Mtao Salômôn čiăng lač tơdah bi msĕ klei bi mni hŏng kpur pui bi doh prăk leh anăn mah? Si ngă klei bi mni đru drei thâo ksiêm kơ drei pô? Si phung đăo srăng bi mni hdơ̆ng găp leh anăn mă tŭ klei bi mni?
Prăk leh anăn mah tŭ klei bi doh hlăm kpur pui bi doh hĕ mơ̆ng jih jang mnơ̆ng bi lŭk kơh ênoh yuôm prăk leh anăn mah srăng bi êdah klă. Mtao Salamôn yua klei bi hmô anei čiăng bi msĕ hŏng klei bi mni msĕ mơh ksiêm kơ ai tiê mnuih. Klei drei bi êdah ti anăp klei arăng bi mni amâodah klei arăng mpŭ srăng bi êdah klei dôk mdăp hlăm ai tiê. Êlan klei bi hriêng anei đru drei thâo jih jang klei bi mni jing mnơ̆ng Aê Diê yua pioh ksiêm čiăng bi êdah klei jing sĭt klei hdĭp myang drei, đru drei thâo ksiêm hĭn kơ drei pô.
Tal sa, klei bi mni lông čiăng dlăng knuih klei jing yuôm drei. Klei bi mni srăng bă sô̆ truh ti anôk êlam hĭn hlăm ai tiê mnuih, kyuanăn klei drei bi êdah ti anăp klei bi mni brei ƀuh ti anôk drei dưm ênoh yuôm drei pô. Tơdah ai tiê drei knŏng hlơr kyua klei bi mni, klei anăn jing msĕ si msei ka mâo klei bi doh ôh, ăt dôk mâo eh msei klei čuôt klih. Tơdah drei hơ̆k kyua mâo klei bi mni, jing drei dôk knang kơ klei mnuih mkăn yap yơh čiăng ksiêm mkă kơ ênoh drei pô. Ƀiădah tơdah klei hdĭp drei dưm hlăm Yang Krist, klei bi mni amâo srăng mjing drei mgao ôh, ƀiădah đru drei thâo luă gŭ hĭn, thâo kral jih jang klei jăk kbiă hriê mơ̆ng klei pap sơăi (I Kôrantô 4:3-5), leh anăn jih jang ênoh yuôm drei jing dŏ Aê Diê brei sơăi amâo djŏ mơ̆ng mnuih brei ôh.
Tal dua, klei bi mni lông dlăng klei mtrŭt drei. Drei mă bruă čiăng mâo klei arăng bi mni hĕ amâodah čiăng bi mơak kơ Khua Yang? Klei bi mni jing msĕ si klei lông dlăng brei ƀuh bruă jăk drei ngă jing klei duah bi êdah mă ti êngao hĕ amâodah bruă ngă kbiă mơ̆ng ai tiê Yang Krist bi mlih leh. Phung đăo čiăng mâo klei bi mni mơ̆ng Khua Yang: “Jăk leh, Ơ dĭng buăl jăk leh anăn sĭt suôr” (Y-Mathiơ 25:21). Tơdah mâo klei mtrŭt djŏ, drei srăng myơr jih klei guh kơang kơ Aê Diê.
Tal tlâo, klei bi mni jing lông ksiêm kơ klei đĭ hriê kơ prŏng hlăm klei hdĭp myang. Msĕ si mah bi doh hŏng pui, mnuih đĭ hriê kơ prŏng hlăm klei hdĭp myang srăng luă gŭ leh anăn sĭt suôr hŏng Khua Yang hĭn, amâo ênưih bi kdjhưng ai kyua klei mưč amâodah bi mni ôh, ƀiădah dôk kjăp nanao kyuadah ñu knŏng uêñ mĭn kơ klei ksiêm mkă mơ̆ng Aê Diê đuč amâo djŏ klei mnuih bi mni ôh.
Brei phung đăo bi mđĭ ai leh anăn bi kjăp hdơ̆ng phung đăo (I Têsalônik 5:11). Đăm ngă klei bi mni čiăng bi mđĭ amâodah mdluh ôh. Hdră êlan drei bi mni leh anăn mă tŭ klei bi mni bi êdah kơ mnuih sĭt drei. Brei drei blŭ klei bi mni leh anăn mă tŭ klei bi mni hŏng klei luă gŭ, hdơr knga bi mni kơ Khua Yang leh anăn myơr jih jang klei guh kơang kơ Ñu jing akŏ kơ jih jang klei jăk.
Si srăng ngă čiăng kơ drei ăt sĭt suôr ngă klei djŏ wăt tơdah amâo mâo pô mđing dưn?
Wah lač: Ơ Khua Yang, yua bĕ klei mnuih mkăn bi mni kơ kâo jing msĕ si pui bi doh ai tiê kâo. Kiă kriê kâo mơ̆ng klei mgao leh anăn đru kâo myơr jih klei guh kơang kơ Ih. Brei bĕ kơ kâo ai tiê luă gŭ Krist, čiăng hlăm jih jang klei, kâo knŏng duah klei čiăng bi mơak kơ Khua Yang đuč. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Malaki 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
