Kôlôssê 3:18-25
“Mă tôm tơdrong jang, iĕm athei jang mă tơpă, jang hăm đĭ jơhngơ̆m, ‘nĕ kơ pơm đon, yua kơ iĕm jang wă pơ hiôk Yŏng bơ̆n Yêsu Krist, ưh kơsĭ iĕm jang wă pơhiôk kon bơngai đĕch ôh” (Kôlôssê 3:23)
Nơ̆r jet tơchĕng pơwao:
– Nơ̆r Kră Yang bơtho ăn trŏ kơ tơdrong arih ‘lơ̆ng tơpăt đơ̆ng Hnam dơnŏ Bơngai Lui thoi yơ?
– Tơm tơdrong arih ‘lơ̆ng tơpăt lăm hnam dơnŏ adrol sơ̆ kư̆m thoi dang ei noh kiơ?
Hnam dơnŏ noh đơ̆ng Kră Yang pơgơ̆p. Rim ‘nu bơngai kăl kơ arih mă trŏ tơdrong ‘lơ̆ng tơpăt Kră Yang, pơyom dih băl yua hli yom kơ Kră Yang, wă kơ đei pŭn hiôk đơ̆ng Kră Yang ăn. Kơplah Kră Yang pơm Yŏng Tơ’ngla tơpă lăm hnam dơnŏ na rim ‘nu gơh arih ‘lơ̆ng tơpăt, arih mă trŏ mă ‘lơ̆ng păng oei kơjăp. Đơ̆ng noh, akăn athei chu yom kơ klo sư, mă khan klo sư pă jing jat tat tơdrong, mă khan ưh kơ đei tơdrong hlôh wao gơh hơgei ră… Tơdrong chu yom ưh kơsĭ khan bơngai pơm klo trŏ ngăl ôh, akăn ưh kơ gơh pơma tơgŭm gop băl, tơdah klo sư yak năm ưh kơ kiơ̆ Nơ̆r Kră Yang, dah akăn athei chu iŏk mă klo pơm kơnê̆ bưh…, mă-lei wă khan pơyom kơ klo tang măt ăn lăm hnam dơnŏ gah bơhngol, bơngai pơgơ̆r lăm hnam dơnŏ. Pơma pha ‘biơ̆, bơngai pơm klo athei pŭ iŏk chông anhăk hnam dơnŏ lăm đon lui, đei pŭ iŏk athei:” ‘mêm kơ akăn iĕm ‘nĕ kơ hơwĕng kơ sư” (trong 19). Ŭnh om jơ̆ tơdrong pơgơ̆p pơkă đĭ chăl arih ưh kơsĭ khan hưch wă ‘măng yuh đĕch, dơning dơmônh tơplih “hil hơwĕng” ‘noh arih kơ’bah kơ tơdrong ‘mêm, pơrăm bơngai nai hăm nơ̆r pơma, đơ̆ng lăm jơhngơ̆m dah khan gơh pơm. ‘Bok Pôl bơtho lu bơngai pơm klo “Lu bơngai pơm klo kư̆m lei-lăi, iĕm athei pơm ‘lơ̆ng kơ akăn iĕm, iĕm thei mơnat kơ sư ‘biơ̆ yua kơ sư bơngai drŏ kăn tơrăn hloh kơ iĕm; yua kơ tơdrong arih ‘Bok Kei-Dei ăn tôm biĕm arih, ưh kơsĭ ăn pôm drŏ nglo đĕch ôh. Dah iĕm ưh kơ chu thoi noh tơdrong iĕm krao khan kơ ‘Bok Kei-Dei ưh kơ yua kiơ bơih” (I Pêtrôs 3:7).
Hăm bơngai pơm kon, athei chu yom păng băt lui yom mĕ ‘bă, mă-lei ăn Kră Yang adrol hloh kơ mĕ ‘bă lăm tơdrong chu yom (Luka 14:26). Mĕ ‘bă ưh kơ pơma dah pơm dôm tơdrong ưh kơ trŏ pơm kơ kon sâu blĕk ơh, rơdu tơrăn, “hil hnang” ‘noh arih sa pơdê pơjăm pơm kơ kon hơ’lơ̆p ưh kơ hiôk, pơting hăm “kon hơ’lơ̆p đe nai”, pơma chrih tơblĕk, ngăl pơjăm hloh kơ bơnê.
Lăm tơdrong arih sa hăm bơngai jang păng yŏng tơ’ngla lăm hnam dơnŏ kư̆m athei pơm kiơ̆ lăm tơdrong hli yom kơ Kră Yang păng mă tơpăt mă khan hăm bơngai hơnat (I Pêtrôs 2:18). Lu bơ̆n gơh đei tơdrong bơtho thoi noh “Tơdrong iĕm jang gô đei sa apah, ưh kơsĭ iĕm jang hoh hoh đĕch ôh”. “Bơngai bu ưh kơ chu, sư wă pơm kơnê̆, ‘Bok Kei-Dei kư̆m pơm tơwih kơ sư mơ̆n, yua kơ ‘Bok Kei-Dei lăng kon bơngai lei-lăi đĕch” (trong 24-25). Tơdrong arih lăm hnam dơnŏ dah arih tơ gah ‘nguaih athei pơm kiơ̆ tơdrog juăt YUA KƠ KRĂ YANG, păng Kră Yang gô apah dah bơtho pơjĭ lu bơngai chu kiơ̆ dah ưh kơ chu pơm kiơ̆ Sư.
Tơdrong juăt arih ‘lơ̆ng tơpăt lăm hnam dơnŏ Bơngai Lui sơ̆ kư̆m thoi dang ei mơ̆n athei dan kăl tơm sư. Nơ̆r Kră Yang bơtho lăm trong 23: “ …Iĕm thei jang mă tơpă, jang hăm đi jơhngơ̆m, ‘nĕ kơ pơ đon, yua kơ iĕm jang wă pơ hiôk Yŏng bơ̆n Yêsu Krist, ưh kơsĭ iĕm jang wă pơhiôk kon bơngai đĕch ôh”. Rim hnam dơnŏ arih ‘lơ̆ng tơpăt păng ‘mêm mơnat dih băl, gô pơchrang hơdah tơdrong ư-ang kơ Kră Yang kơ lơ bơngai, hnam dơnŏ đei pŭn hiôk, păng kon pơlei hơđơ̆ng hiôk.
Ơ Kră Yang ‘mêm kơeng! Apinh Ih tơgŭm inh arih ‘lơ̆ng tơpăt păng ‘mêm mơnat păng pŭ iŏk hăm lơ bơgai lăm hnam dơnŏ yua kơ Ih. Apinh tơdrong arih lăm hnam dơnŏ inh pơchrang anăn Ih kơ lơ bơngai. Krao khan yua anăn Kră Yang Yêsu Krist, Amen.
Lu bơ̆n gô tơplih tơdrong kiơ lăm tơdrong arih sa hăm lu bơngai juăt kơplah bơ̆n băt athei arih ‘lơ̆ng tơpăt?
Đŏk Sơ̆p Hla ar ‘Bok Kei-Dei lăm pêng sơnăm: Sachari 4
Kênh Youtube BHKTHN:
