Blŭng a 12:10-20
“Kơplah ei sơ̆, tơ dêh sư đei pơngot rơwĕt. Tơdrong pơngot rơwĕt âu tih dêh, na Abram jur tơ char Êyiptơ oei gô tơ noh.” (Blŭng a 12:10)
Nơ̆r jet tơchĕng pơwao:
– ‘Bok Abram tơ’bơ̆p hăm tơdrrong kiơ kơplah oei tơ dêh pơkă?
– Pơkă năm truh tơ dêh Êyiptơ tơbăt ‘bok Abram jơ̆ bơngai thoi yơ?
– Kră Yang đei pơm kiơ păng tuch luch sư thoi yơ?
– Lu bơ̆n yak kiơ̆ trong Kră Yang thoi yơ?
Mă khan dêh Kanaan oei đei bơngai oei mălei Kră Yang ‘Bok Kei-Dei pơma pơdah hăm ‘bok Abram khan Kră Yang gô ăn teh âu kơ adrĕch adrŭng sư (Blŭng a 12:4). Kơlih kơ thoi noh, hnam dơnŏ sư kơkuh kơ Kră Yang păng oei hloi tơ noh. Mălei dêh char đêl pơkă ưh kơ trŏ thoi nơ̆r pơkă yua kơ dôm tơdrong hnam dơnŏ Abram sơng iŏk ưh kơ trŏ pŭn hiôk mălei tơdrong pơngot rơwĕt lăm pơlei pơla (trong10). Nơ̆r ‘Bok Kei-Dei tơbăt: “Tơdrong pơngot rơwĕt âu tih dêh” na sư pơkă chông anhăk ba đĭ đăng hnam dơnŏ sư năm truh tơ dêh Êyiptơ tơ gah gơal oei gô tơ noh.
Êyiptơ jơ̆ anih teh jang sa ‘lơ̆ng, yua đei đak krong Nil na tơmam sa tôm mah, mălei ‘bok Abram băt hơđăl anih âu ‘bĕnh kơ tơdrong yoch. Mă sư kư̆m ‘bôh lu tơdrong kơnê̆ dĭng mah đei bơngai pơlôch klo dah pơm kơnê̆ kơ akăn sư kơdih, mălei tơplih kơ oei tơ noh păng gơnang kơ tơdrong tơgŭm đơ̆ng Kră Yang, păng tŏ sĕt sư chơ chă Kră Yang chông anhăk, wă kơ bơwei akâu jăn, na sư pơkă wă năm tơ anih ‘noh, na sư đei tơcheng ‘bôh trong mưh tơ’bơ̆p đe na sư khan kơ akăn sư pơma hơlĕnh gah ŭnh om hnam dơnŏ sư. Na sư kư̆m ngăn hreh kơplah akăn sư đe chông anhăk ba lăm hnam pơtao. Tơdrong ‘nâu tơbăt ‘bok Abram kư̆m dai kon bơngai rơdu rơmơ̆n, ‘bĕnh tơdrong hli hlơt păng hiơ̆k tơtăm gah akâu jăn. Tơdrong Kră Yang krao păng ăn tơdrong pơkă kơ ‘bok Abram ưh kơ sư arih ‘lơ̆ng hloh kơ đe nai, mălei yua kơ Kră Yang đei dan hơmet lê̆ ‘măn kơ sư.
Kră Yang bơwei păng wei lăng bơngai Sư rơih iŏk, kơplah klo kăn bre ‘bok Abram đe tơmơ̆t tơ hnam pơtao, Kră Yang ăn tơdrong trăp tih kơ kon pơlei pơla păng lăm dêh Êyiptơ, pơm kơ lu sư băt kơnăl bơngai mă lu sư chông ba ‘noh jơ̆ a kăn ‘bok Abram tơ lu sư păng pơdreo akăn ăn kơ sư, đơ̆ng noh puh tơlĕch lu sư jăk tơnai, wih pơlơ̆k tơ dêh Kanaan dơ̆ng.
Tơdrong pơlong jơ̆ tơdrong ưh kơ weh wer ôh kơplah yua kiơ̆ nơ̆r Kră Yang pơkă. ‘Bok Abram đei pơ̆k huŏng yua kơ sư hiơt bơih tơdrong gĭt mă Kră Yang đei krao sư. Tơplih gơnang kơ Kră Yang, na sư gơnang kơ tơdrong gơhh hơgei kiơ̆ kơdih păng chơ chă trong tơ dêh Êyiptơ. Mălei bơnê kơ Kră Yang yua kơ Kră Yang oei hơdai hăm bơngai Kră Yang rơih, păng sư găn kiơ̆ kơ jơ năr.Yua kơ tơdrong ‘mêm Kră Yang ăn đĕch, lu bơ̆n oei hơnơ̆ng lăm nơ̆r pơkă Kră Yang. Tơpă, trong bơ̆n kiơ̆ Kră Yang ‘noh trong ‘Bok Kei-Dei ăn đĕch, lu bơ̆n yak kiơ̆ trong ‘noh minh đon lui lăm Kră Yang đĕch.
Ơ Kră Yang, apinh Ih mơnat kơ inh yua kơ phŏ inh đei adrin pơkeh tơdrong pơlong kiơ̆ kơdih akâu tơplih gơnang kơ Kră Yang tôm tơdrong. Bơnê kơ Kră Yang yua kơ Ih ưh kơ layơ achăng lê̆ inh na oei hơdai inh păng Ih găn kiơ̆ kơ jơ năr Ih. Apinh Ih tơgŭm inh kơjăp gơnang păng pơjao chăl arih inh kơ Kră Yang. Krao yua anăn Yêsu Krist, Amen.
Lu bơ̆n đei tơ’bôh jơhngơ̆m lui gơnang kơ Kră Yang thoi yơ, kơplah mă đei tơdrong pơlong truh kơplah yak kiơ̆ trong Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 9
Kênh Youtube BHKTHN:
