Klei Aê Diê Blŭ: Klei Mphŭn Dơ̆ng 12:1-3
Êlan kliăng: “Kâo srăng brei klei jăk jĭn kơ ih; Kâo srăng brei anăn ih mâo klei hing ang, leh anăn ih srăng jing klei jăk jĭn kơ phung mkăn” (Klei Mphŭn Dơ̆ng 12:2)
Klei êmuh ksiêm mĭn: Ya klei Khua Yang brei Y-Abram ngă leh anăn ya klei Ñu brei kơ gơ̆? Hruê anei ya klei Khua Yang mtă brei drei lui?
Y-Abram jing anak čô Y-Sem, kkiêng mơ̆ng gŏ sang kkuh mpŭ kơ phung yang mkăn ti ƀuôn Ur, čar Kaldê. Ñu pô hmư̆ leh asăp Yêhôwa Aê Diê Yang sĭt iêô: “Kbiă mơ̆ng čar ih, lui găp djuê ih leh anăn sang ama ih, nao kơ čar Kâo srăng ktrâo brei kơ ih” (êlan 1). Khua Yang čiăng gơ̆ kbiă đuĕ mơ̆ng čar anôk gơ̆ dôk hdĭp, lui hĕ gŏ sang leh anăn phung găp djuê gơ̆, brei nao kơ anôk Khua Yang srăng ktrâo brei, ƀiădah Khua Yang amâo lač klă ôh ti anôk anăn jing. Anei jing klei iêô bŏ hŏng klei lông dlăng, kyuadah atur kơ klei iêô anei jing brei Y-Abram lui hĕ jih jang mnơ̆ng gơ̆ dưi djă păn čiăng gơ̆ đăo kluôm dhuôm kơ Khua Yang.
Khua Yang ƀuăn kơ Y-Abram: “Kâo srăng brei ih jing sa găp djuê prŏng; Kâo srăng brei klei jăk jĭn kơ ih; Kâo srăng brei anăn ih mâo klei hing ang, leh anăn ih srăng jing klei jăk jĭn kơ phung mkăn” (êlan 2). Êjai Y-Abram khua thŭn leh ƀiădah ka mâo anak ôh, Khua Yang ƀuăn srăng mjing gơ̆ jing sa găp djuê prŏng. Êjai gơ̆ lui hĕ jih jang mnơ̆ng gơ̆ mâo snăn Khua Yang ƀuăn srăng brei klei jăk jĭn kơ gơ̆. Êjai jih jang mnuih ti lăn ala duah klei hing ang kơ diñu pô, Khua Yang ƀuăn srăng brei kơ gơ̆ mâo klei hing ang. Y-Abraham gưt kơ klei Khua Yang iêô, lui hĕ jih jang klei gơ̆ mưng leh kyua Khua Yang, tơdah ksiêm amâo nik ôh, klei anăn jing msĕ si klei luč liê, ƀiădah anăn jing bruă ngă bŏ hŏng klei jăk mơak, bruă ngă jing akŏ klei jăk jĭn: “Leh anăn hlăm ih jih jang găp djuê mnuih hlăm lăn ala srăng mâo klei jăk jĭn” (êlan 3). Khua Yang čiăng brei klei jăk jĭn kơ Y-Abram čiăng ñu bi lar klei jăk jĭn anăn kơ jih jang mnuih, kơ jih jang găp mnuih ti lăn ala. Leh anăn amâo mâo ôh klei jăk jĭn mkăn jing prŏng hĭn kơ klei thâo kral Aê Diê.
Hruê anei, Khua Yang srăng iêô drei msĕ mơh brei lui hĕ klei drei mưng. Tăp năng anăn jing klei Khua Yang amâo mơak ôh kyuanăn brei drei lui hĕ. Amâodah mâo mơh klei prŏng hĭn Khua Yang čiăng brei kơ drei. Ƀiădah tơdah drei jhŏng êbat hŏng klei đăo kơh drei dưi mă tŭ klei jăk jĭk Khua Yang brei, jao jih drei pô kluôm ênŭm tui si klei Khua Yang atăt gai. Khua Yang čiăng drei đăo kluôm dhuôm kơ hdră jăk Ñu. Lui hĕ klei mưng leh amâo djŏ ênưih ôh, ƀiădah tơdah drei gưt kơ klei iêô hŏng klei đăo, amâo djŏ drei srăng mă tŭ klei jăk jĭn prŏng Khua Yang brei knŏng kơ drei pô ôh, ƀiădah drei srăng jing akŏ bi mbha klei jăk jĭn kơ lu mnuih mkăn msĕ mơh.
Ya klei Khua Yang iêô brei drei lui hĕ čiăng tui hlue hdră jăk Ñu pioh kơ drei? Si drei ngă hŏng klei iêô anăn?
Wah lač: Ơ Khua Yang, Ih thâo ya klei jing jăk hĭn kơ klei hdĭp kâo. Brei bĕ kơ kâo mâo klei đăo leh anăn klei jhŏng čiăng kơ jhŏng lui hĕ jih jang klei mưng leh kâo ăt dôk djă pioh, leh anăn gưt kơ klei Ih iêô. Brei klei hdĭp kâo mă tŭ nanao klei jăk jĭn Ih leh anăn jing akŏ bi mbha klei jăk jĭn anăn kơ lu mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Esther 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
