Blŭng a 12:1-3
“Inh gô ăn kơ ih jing minh adrĕch adrung tih, Inh gô ăn kơ ih pŭn hiôk, đe kư̆m gô ư-ang kơ ih, păng ih gô jing tơm kơ tơdrong pŭn hiôk” (Blŭng a 12:2)
Nơ̆r jet tơchĕng pơwao:
– Kră Yang krao ‘bok Abram pơm kiơ păng Kră Yang pơkă ăn kơ sư tơdrong kiơ?
– Ahrei âu Kră Yang krao lu bơ̆n weh ataih đơ̆ng tơdrong kiơ?
‘Bok Abram; sư adrĕch adrung ‘bok Sem, đơ̆ng minh hnam dơnŏ kơkuh lu rup yang nai tơ dêh Urơ lăm dêh Kalđê. Sư đei kơtơ̆ng nơ̆r Kră Yang ‘Bok Kei-Dei krao sư hlĭch dêh: “Âu, Kră Yang đei khan kơ Abram thoi âu: “Ih athei lĕch đơ̆ng dêh char âu, tơklah đơ̆ng hnam dơnŏ păng ‘nhŏng oh mĕ ‘bă ih, na năm tơ dêh char mă Inh gô tơ’bôh kơ ih.” (trong 1). Kră Yang wă kơ sư lĕch đơ̆ng dêh char mă sư oei arih jang sa ‘noh, weh đơ̆ng kon pơlei pơla sư, lĕch đơ̆ng adrĕch adrŭng sư, na năm tơ dêh char mă Kră Yang gô tơ’bôh ăn, mălei Kră Yang ưh kơ tơbăt ăn anih ‘noh anih ‘bơ̆t ayơ. Nâu bơih jơ̆ krao ‘bĕnh tơdrong pơlong lăng, yua kơ nơ̆r krao ‘nâu bơih wă kơ Abram achăng đĭ đăng tôm tơdrong mă sư oei ưh kơ hreh wă kơ đĭ đăng jơhngơ̆m lui gơnang kơ Kră Yang.
Kră Yang đei pơkă kơ Abram: “Inh gô ăn kơ ih jing minh adrĕch adrung tih, Inh gô ăn kơ ih pŭn hiôk, đe kư̆m gô ư-ang kơ ih, păng ih gô jing tơm kơ tơdrong pŭn hiôk” (trong 2). Kơplah Abramm ‘lŏ kră bơih mă ưh kơ đei hơ’lơ̆p. Kră Yang pơkă kơ sư khan gô ăn kơ sư minh adrĕch adrŭng tih. Kơplah ‘noh na sư gô lĕch đơ̆ng dêh sư kơdih achăng dôm tơmam sư đei na Kră Yang pơkă gô tuh pŭn hiôk ăn kơ sư, lăm kơplah đĭ đăng bơngai lăm teh đak oei adrin wă pơ ư pơang anăn kơdih, na Kră Yang pơkă wă pơ ư anăn sư. ‘Bok Abram chu kiơ̆ nơ̆r Kră Yang krao, lĕch đơ̆ng dêh char sư anih sư mă sư arih yua kơ Kră Yang, lăng rŏ kơ hiong đĭ đăng, mălei ‘noh bơih ‘bĕnh kơ tơdrong pŭn hiôk, tơdrong jang ‘bĕnh pŭn hiôk păng “đĭ đăng adrĕch adrŭng kon bơngai kơpal teh âu gô đei pŭn hiôk đơ̆ng ih. (trong 3). Kră Yang ‘maih tuh pŭn hiôk kơ Abram wă kơ sư tơ’bôh tơdrong pŭn hiôk ‘noh kơ lơ bơngai, kơ đĭ đăng kon bơngai kơpal teh âu, păng ưh kơ đei pŭn hiôk ayơ tih hloh kơ tơdrong bỡn băt kơnăl ‘Bok Kei-Dei.
Ahrei âu, Kră Yang kư̆m krao lu bơ̆n achăng lê̆ đơ̆ng dôm tơdrong kiơ mă bơ̆n juăt kơ bơwei, wă khan dôm tơdrong ‘noh Kră Yang ưh kơ lăp đon na lu bơ̆n athei achăng tŭk lê̆. Băt mă Kră Yang đei tơdrong tih hloh ‘biơ̆ wă ăn kơ lu bơ̆n. Mălei bơ̆n athei băt mơn tơdrong pŭn Sư đei ăn kơ lu bơ̆n kơplah pơ̆n nuih yak năm hăm đon lui, pơjao akâu bơ̆n kơ Kră Yang chông anhăk. Sư wă kơ bơ̆n lui gơnang kơ tơdrong tơdă hơmet Sư. Achăng tŭk tơdrong kiơ mă bơ̆n juăt kơ pơm anat dêh ưh kơ ‘bônh ôh, mălei dah lu bơ̆n gơnang yak kiơ̆ nơ̆r krao, lu bơ̆n ưh kơ sĭ ‘bôh mơn tơdrong pŭn tih Kră Yang ăn kơ lu bơ̆n ôh, mălei bơ̆n jing tơm pŭn hiôk gơh klah asong kơ lơ bơngai nai dơ̆ng.
Ơ Kră Yang, Ih băt đĭ đăng tôm tơdrong ‘lơ̆ng kơ chăl arih inh.
Apinh Ih tơgŭm inh đeii đon lui păng jơhngơ̆m pơ̆n nuih wă kơ hŭt lê̆ dôm tơdrong mă inh oei bơwei, păng yak kiơ̆ nơ̆r ih krao, wă kơ chăl arih inh băt mơn tơdrong pŭn hiôk đơ̆ng Ih păng jing tơm pŭn kơ lơ bơngai, Krao khan yua Anăn Yêsu Krist, Amen.
Lu bơ̆n đei Kră Yang oei krao achăng lê̆ dôm tơdrodrong kiơ wă kiơ̆ tơdrong tơdă hơmet ‘lơ̆ng mă Sư đei ‘măn kơ bơ̆n? Na lu bơ̆n tơl Sư thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 7
Kênh Youtube BHKTHN:
