Klei Aê Diê Blŭ: Klei Bi Hriêng 27:15-16
Êlan kliăng: “Sa čô mô̆ kreh mneh msao jing msĕ si ênai êa rôč nanao êjai hjan. Hlei pô čiăng ghă gơ̆ jing msĕ si ghă angĭn amâodah djă êa prăi ôliwơ hlăm kngan” (Klei Bi Hriêng 27:15-16)
Klei êmuh ksiêm mĭn: Mniê kreh mneh msao dưi bi msĕ hŏng ya klei? Si srăng ngă čiăng mgaih mkra hĕ klei bi mneh msao anei? Si drei mă yua klei hriăm anei kơ gŏ sang drei?
Klei Bi Hriêng 27:15-16 bi hmô klă snăk kơ klei dleh dlan srăng mâo tơdah bi kdơ̆ng hŏng sa čô mô̆ kreh mneh msao, leh anăn mtă kơ drei ruah êlan čiăng dưi găn klei amâo bi djŏ hdơ̆ng ung mô̆ hŏng klei wah lač, hŏng klei thâo mĭn leh anăn thâo răng.
Mtao Salômôn bi msĕ sa čô mô̆ kreh mneh msao hŏng ênai êa rôč nanao mơ̆ng čuôr sang êjai adiê hjan, jing klei bi rŭng nanao amâo mdei ôh kơ klei hơĭt ênang hlăm gŏ sang. Jih dua jing klei amâo jăk sơăi. Sa čô êkei dôk kđap hlăm gŏ sang čiăng duah klei êđăp ênang, mâo klei mgang mơ̆ng angĭn êbŭ, ƀiădah gơ̆ knŏng ƀuh sang ƀrôč nanao amâo mdei leh anăn amâo dưi mgang ôh gơ̆ mơ̆ng klei êa hjan bi msah. Msĕ snăn mơh, êkei dôk mô̆ čiăng duah klei hơĭt, klei êđăp ênang, ƀiădah mô̆ bi tăng mgăl nanao, bi rŭng kơ ai tiê gơ̆ amâo mdei ôh!
Gĭr “ghă gơ̆” dưi bi msĕ hŏng klei yơr kngan ghă angĭn, msĕ si djă êa prăi hlăm kngan, amâo mâo klei tŭ ôh, kyuadah sa čô mô̆ kreh mneh msao jing msĕ si klei jing hlăm ñu leh, amâo dưi lŏ krơ̆ng amâodah ư̆ ăn ôh.
Hơưi đei, tui si djŏ sang jing anôk pioh mgang kơ angĭn, kơ hjan, ƀiădah mô̆ lĕ lŏ ba angĭn bi rai kơ sang. Tui si djŏ kngan hnuă kdrăm ung ñu srăng răng mgang ñu, leh anăn tui si djŏ ñu srăng bi mơak kơ ñu msĕ si êa prăi ôliwơ bŏ hŏng mnâo ƀâo mngưi, ƀiădah klei ñu khăng kŏ mjing klei amâo mâo djŏ ngă kơ ung ñu amâo dưi tŭ ôh, kăn lŏ dưi mgaih mkra rei.
Čiăng đăm mâo klei bi mneh msao msĕ snăn hlăm klei bi dôk ung mô̆ brei mâo hĕ klei thâo mĭn leh anăn klei thâo răng. Hrô kơ klei lŏ bi kdơ̆ng wĭt hŏng klei ngêñ, mâo klei mtă kơ drei brei hdĭp hŏng klei bi thâo săng leh anăn thâo bi grăng. Đăo hĕ kơ klei pap Aê Diê dưi đru drei, Ñu dưi brei klei lŏ bi grăng leh anăn bi hlao gŏ sang drei. Kyuanăn tơdah bi tlă anăp hŏng klei dleh dlan mơ̆ng ung amâodah mô̆ kreh mneh msao, brei drei duah klei atăt gai mơ̆ng Yang Mngăt Jăk leh anăn klei kčĕ mơ̆ng mnuih thâo mĭn hlăm Khua Yang. Hlăm klei anei jing: Dôk hmư̆ sĭt leh anăn săng brei, duah êlan čiăng thâo săng kơ klei mĭn mô̆ amâodah ung. Blŭ klei bi grăng, mĭn kơ klei mgaih mkra hĭn kơ klei hlei pô srăng dưi hĭn. Duah klei bi hriăm hŏng klei thâo mĭn hlăm Klei Aê Diê Blŭ čiăng dưi găn klei dleh dlan mơ̆ng klei amâo mâo bi djŏ. Gĭr leh anăn thâo bi pap brei, ƀuăn rơ̆ng dôk kjăp hŏng klei bi mguôp hlăm klei bi dôk ung mô̆.
Tơdah tlă anăp hŏng klei bi mneh msao hlăm klei bi dôk ung mô̆, si drei knang kơ Khua Yang čiăng mgaih mkra hĕ?
Wah lač: Ơ Ama hlăm adiê, bi mni kơ Ih kyua klei thâo mĭn hlăm Klei Ih Blŭ. Đru kâo thâo kral leh anăn bi mlih hĕ klei kreh mneh msao hlăm kâo. Brei bĕ kơ kâo klei thâo gĭr leh anăn klei pap, čiăng kơ kâo jing mnuih ba klei êđăp ênang hlăm jih jang klei bi mguôp, čiăng kơ klei hdĭp kâo bi êdah nanao klei khăp Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Êsther 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
