Klei Aê Diê Blŭ: Y-Mathiơ 5:17-28
Êlan kliăng: “Snăn yơh brei diih jing jăk klă msĕ si Ama diih hlăm adiê jing jăk klă.” (Y-Mathiơ 5:48)
Klei êmuh ksiêm mĭn: Ya klei Khua Yang Yêsu mtô kơ klei djă pioh Klei Bhiăn? Ya klei Khua Yang mtô kơ knhuah hdĭp kpă ênô? Si brei drei hdĭp kpă ênô?
Klei čih mơ̆ng trăn Klei Aê Diê Blŭ hruê anei, hlăk gưl Klei Mtô Ti Dlông Čư̆ mơ̆ng Khua Yang Yêsu. Khua Yang hưn klă Ñu hriê čiăng bi leh ênŭm Klei Bhiăn leh anăn Ñu čiăng jih jang phung mâo leh klei bi mtlaih hŏng êrah kpă ênô Ñu brei djă pioh Klei Bhiăn, amâodah blŭ mdê hĭn, brei mâo knhuah hdĭp kpă ênô leh anăn “mtô kơ arăng ngă msĕ” (êlan 19). Knhuah hdĭp kpă ênô Khua Yang mtô mâo hnơ̆ng čuăn dlông hĭn kơ hnơ̆ng čuăn phung khua čih hră leh anăn phung Pharisi djă pioh.
Khua Yang kñăm tlâo hnơ̆ng kơ knhuah hdĭp kpă ênô. Tal sa, dôk hdĭp kpă ênô, jing djă pioh klei bhiăn, amâo knŏng rup ti êngao, tui si klei mtă ôh, ƀiădah brei gưt ngă tui si klei mĭn leh anăn klei mblang mơ̆ng Klei Bhiăn. Amâo djŏ jing knhuah hdĭp djă pioh hdră bhiăn klei đăo ti êngao ƀiădah hlăm ai tiê klei mĭn. Năng ai drei amâo bi mdjiê mnuih, amâo ngă klei knhông ôh. Ƀiădah ai tiê bi êmut bi roh, boh blŭ ăl ngêñ tăm pah, klei bi mĭn jhat hlăm klei mĭn, jing djăp leh kơ drei ngă klei soh bi mdjiê mnuih amâo ngă klei knhông leh. Klei soh kbiă hriê mơ̆ng klei mĭn, ai tiê: “Kyuadah mơ̆ng ai tiê yơh kbiă hriê klei mĭn jhat, klei bi mdjiê mnuih, klei tlĕ piu, klei knhông, klei tlĕ, klei hưn luar, klei mčeh.” (Y-Mathiơ 15:19). Tal dua, djă pioh hdră bhiăn klei đăo brei nao mđrĭng mbĭt hŏng knhuah hdĭp thâo khăp: bi grăng êlâo kơ wah lač, êlâo kơ myơr mnơ̆ng ngă yang (êlan 23-26). Tal tlâo, knhuah hdĭp kpă ênô brei jing jăk klă tui si klei Khua Yang Yêsu klah čŭn: “Snăn yơh brei diih jing jăk klă msĕ si Ama diih hlăm adiê jing jăk klă” (Y-Mathiơ 5:48). Hdĭp gưt hlue hdră bhiăn klei đăo mpŭ kơ Aê Diê msĕ si nao bi kƀĭn ti Sang Aê Diê, myơr, hriăm Klei Aê Diê Blŭ, wah lač, đa đa mkăn… amâo jing soh ôh, ƀiădah Khua Yang brei ƀuh dŭm mta klei ngă anăn ka djăp, ka ênŭm ôh. Ñu lač: “Jih klei anăn brei diih gưt, leh anăn đăm lui ôh klei êlâo anăn.” (Y-Mathiơ 23:23). Năng ai drei djă pioh jăk snăk klei bhiăn hŏng Khua Yang ƀiădah ăt ka dôk hdĭp kpă ênô sĭt ôh hŏng mnuih. Mta phŭn jing amâo djŏ ngă soh ôh, ƀiădah ngă ka ênŭm. Klei bi hmô klă mngač hlăm klei yăl dliê kơ sa čô êkei hlăk ai mdrŏng, jhŏng hưn ñu djă pioh ênŭm jih leh bhiăn, ƀiădah Khua Yang ăt yap ka ênŭm mơh! Êkei hlăk ai bi kdriêl hĕ ai tiê thâo pap kyuadah ñu ka khăp kơ phung ƀuh ƀin djăp ôh (Y-Mathiơ 19:20-21).
Drei dôk hdĭp kpă ênô amâo djŏ kyua čiăng dưi jing anak Ama ôh, ƀiădah kyuadah drei jing leh anak Ama drei hlăm adiê, jing Pô jăk klă. Drei knang kơ Yang Mngăt Jăk čiăng dưi ngă ênŭm Klei Bhiăn tui si klei Khua Yang Yêsu mtô leh. Khua Yang ƀuh klei mtrŭt leh anăn klei bi mĭn hlăm ai tiê mnuih, kyuanăn knhuah hdĭp kpă ênô drei brei kbiă hriê mơ̆ng ai tiê, amâo djă pioh klei bhiăn tui si rup ti êngao ôh, leh anăn boh nik nak jing knhuah hdĭp kpă ênô brei nao mbĭt hŏng klei khăp. Brei jih jang mnuih ƀuh klei kpă ênô leh anăn klei khăp Khua Yang, găn hŏng knhuah hdĭp klei đăo drei hlăm klei hdĭp hjăn pô, hlăm gŏ sang, hlăm Phung Sang Aê Diê leh anăn hlăm ƀuôn sang.
Si drei ngă čiăng dưi djă pioh jih klei Khua Yang mtô, hlăm ai tiê, klei mĭn hŏng klei jăk klă?
Wah lač: Ơ Ama kpă ênô, jăk klă, akâo kơ Ama bi mlih klei hdĭp kâo, đru kâo dôk hdĭp kpă ênô hŏng jih ai tiê leh anăn jăk klă msĕ si Khua Yang Yêsu hdĭp leh, leh anăn mtô leh, čiăng kơ Anăn Khua Yang mâo klei guh kơang hŏng klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:121-176
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
