Mathais 5:17-28
Nqe cim:
“Yog li ntawd, nej yuav tsum ua zoo kawg nkaus ib yam li nej Leej Txiv tus uas nyob saum ntuj ceebtsheej, nws yog tus zoo kawg nkaus.” (Mathais 5:48)
Lus nug xav:
– Tswv Yexus qhia li cas txog kev coj raws Vajtswv Txoj Kevcai?
– Nws qhia li cas txog lub neej ncaj ncees??
– Peb yuav ua neej ncaj ncees li cas?
Lub tsamthawj ntawm ntu Vajluskub hnub no yog nyob hauv Tswv Yexus Zaj Lus Qhuab Qhia Saum Roob. Tswv Yexus qhia meej hais tias Nws los tsis yog rhuav tshem Vajtswv Txoj Kevcai, tiamsis los ua kom tiav. Thiab Nws kuj xav kom cov uas tau txais txojkev cawmdim los ntawm Nws cov ntshav muaj nqis yuav tsum coj raws Vajtswv Txoj Kevcai, lossis hais dua lwm seem, yog ua neej ncaj ncees thiab “qhia lwm tus” kom coj raws li ntawd (nqe 19). Lub neej ncaj ncees uas Tswv Yexus qhia ntawd muaj tus qauv siab tshaj qhov uas cov xibfwb qhia Vajluskub thiab cov Falixais coj.
Tus Tswv hais txog peb qib ntawm lub neej ncaj ncees. Qhov xub thawj, kev ua neej ncaj ncees, uas yog kev coj raws Vajtswv Txoj Kevcai, tsis yog tsuas ua raws saum ntaub ntawv lossis raws li lo lus hais xwb, tiamsis yuav tsum ua raws lub ntsiab thiab lub homphiaj ntawm txoj kevcai. Tsis yog tsuas ua raws kevcai sab nraud xwb, tiamsis yuav tsum pib hauv lub siab tuaj. Tej zaum peb tsis txhob txwm mus tua neeg lossis deev luag txijnkawm, tiamsis qhov uas peb muaj kev ntxub ntxaug, hais lus chim, lossis muaj tej kev xav qias neeg hauv siab,… ces twb txaus rau peb ua txhaum tua neeg thiab deev luag txijnkawm lawm. Kev txhaum pib hauv tibneeg lub siab thiab kev xav, raws li Tswv Yexus qhia hais tias: “Rau qhov yam uas tawm hauv neeg lub siab los, ua rau neeg ua phem, tua neeg, deev luag pojniam luag txiv, ua kev nkauj kev nraug, ua tubsab, hais lus dag thiab rhuav lwm tus ntsejmuag” (Mathais 15:19).
Qhov ob, kev coj raws tej kab ke yuav tsum mus nrog lub neej ua zoo: hais kom sib haum ua ntej thov Vajtswv lossis fij khoom (nqe 23-26).
Qhov peb, lub neej ncaj ncees yuav tsum muaj kev ua zoo kawg nkaus, raws li Tswv Yexus xaus lus hais tias: “Yog li ntawd, nej yuav tsum ua zoo kawg nkaus ib yam li nej Leej Txiv tus uas nyob saum ntuj ceebtsheej, nws yog tus zoo kawg nkaus” (Mathais 5:48). Kev ua neej ntseeg Vajtswv xws li mus pehawm, fij nyiaj, kawm Vajluskub, thov Vajtswv thiab lwm yam yeej tsis txhaum. Tiamsis Tswv Yexus qhia tias tej ntawd tseem tsis tau txaus thiab tseem tsis tau zoo kawg nkaus. Nws hais tias: “Tsimnyog nej ua raws li tej lus qhia no, thiab tsis txhob tso lwm nqe tseg” (Mathais 23:23). Peb muaj cuabkav ua raws Vajtswv Txojcai zoo heev, tiamsis tseem tsis tau ua neej ncaj ncees rau tibneeg. Qhov teebmeem tsis yog peb ua txhaum, tiamsis yog ua tsis tau txaus. Qhov pivtxwv pom tseeb tshaj yog hauv zaj xwm tus hluas npluanuj tawm lus hais tias nws twb ua raws txhua nqe kevcai lawm, los Tswv Yexus tseem hais tias nws tseem tsis tau zoo kawg nkaus! Nws tseem teeb cej ciam rau nws txojkev hlub tshua, rau qhov nws tseem hlub cov neeg pluag tsis tau txaus (Mathais 19:20-21).
Peb ua neej ncaj ncees tsis yog kom peb tau los ua Vaj Leej Txiv cov menyuam, rau qhov peb twb yog Nws cov menyuam lawm, thiab Nws yog Leej Txiv tus zoo kawg nkaus uas nyob saum Ntuj Ceebtsheej. Peb vamkhom Vaj Ntsujplig los ua lub neej raws li Txoj Kevcai uas Tswv Yexus tau qhia. Tus Tswv pom peb lub homphiaj thiab tej kev xav hauv peb lub siab, vim li ntawd, peb lub neej ncaj ncees yuav tsum pib ntawm lub siab tuaj, tsis yog tsuas ua raws Txoj Kevcai sab nraud xwb; thiab tshwjxeeb tshaj, yog lub neej ncaj ncees yuav tsum mus nrog nraim txojkev hlub tshua. Cia li ua kom sawvdaws pom Vajtswv txojkev ncaj ncees thiab txojkev hlub dhau ntawm peb txojkev ntseeg nyob hauv peb tus kheej, peb tsevneeg, peb Pawg Ntseeg thiab peb zej zos.
Thov Vajtswv,
Leej Txiv uas ncaj ncees thiab zoo kawg nkaus, thov Koj hloov nyuam yaus lub neej ncaj ncees thiab zoo kawg nkaus ib yam li Tswv Yexus tau ua thiab tau qhia, kom Koj lub npe tau koob meej dhau ntawm nyuam yaus lub neej. Nyuam yaus tuav Tswv Yexus Khetos lub npe thov, Amees.
Yuav ua li cas peb thiaj coj tau raws txhua yam uas tus Tswv qhia hauv peb lub siab thiab peb tej kev xav kom zoo kawg nkaus?
Nyeem Vajluskub hauv peb lub xyoos: Ntawv Nkauj 119:121-176
Kênh Youtube BHKTHN:
