Klei Aê Diê Blŭ: Y-Mathiơ 25:1-13
Êlan kliăng: “Snăn kăp răng bĕ, kyuadah diih amâo thâo hruê, kăn thâo mông rei” (Y-Mathiơ 25:13)
Klei êmuh ksiêm mĭn: Khua Yang Yêsu yăl dliê kơ klei bi kuôl ung mô̆ čiăng bi hriăm kơ ya klei? Ya jing anôk msĕ leh anăn anôk mdê êma čô thâo mĭn leh anăn êma čô mluk? Ya ngă brei drei dôk răng kăp drông hruê Khua Yang lŏ hriê?
Khua Yang Yêsu yăl dliê kơ klei yal dliê “ƀuôn ala mtao adiê srăng jing msĕ si phung pluh čô mniê êra hrông djă pui kđen nao bi tuôm hŏng pô dôk mô̆” hlăm hruê bi kuôl ung mô̆ čiăng mtô kơ klei brei dôk răng leh anăn kăp drông hruê Ñu lŏ hriê. Klei phung Yuđa nao drông mniê dôk ung khăng ngă êjai tlam mmăt. Sang mniê ruah pluh čô mniê êra hrông jing phung mgrông mniê dôk ung, djă pui kđen nao drông pô dôk mô̆. Hlăm pluh čô mniê anăn mâo “êma čô thâo mĭn” mprăp djăp êa prăi pioh mkăp, bi “êma čô mluk” lĕ amâo djă ba êa prăi pioh mkăp ôh. Êlan 5 brei thâo kyuadah “pô dôk mô̆ truh hnui” kyuanăn êa prăi jih, êma čô thâo mĭn mâo êa prăi lŏ trô thiăm, bi êma čô mluk lĕ lŏ êran nao blei. Ƀiădah êjai phung mluk nao blei êa prăi, pô dôk mô̆ truh, êma čô mniê thâo mĭn “mŭt mbĭt hŏng ñu kơ klei ƀơ̆ng huă bi kuôl; leh anăn arăng kđăl hĕ ƀăng bhă” (êlan 10).
Pluh čô mniê êra hrông dôk guôn pô dôk mô̆ truh tal êlâo jing msĕ sơăi, kyuadah grăp čô diñu djă pui kđen leh anăn čuh sơăi pui kđen diñu kăp drông pô dôk mô̆ truh. Ƀiădah anôk mdê jing êma čô thâo mĭn thâo răng djă mkăp huĭ kơ klei srăng jih êa prăi leh anăn mâo êa prăi lŏ trô, bi êma čô mluk amâo mâo klei mprăp bi jăk ôh kyuanăn amâo mâo êa prăi lŏ trô thiăm ôh. Diñu akâo êa prăi phung thâo mĭn ƀiădah phung anăn hngah amâo brei ôh kyuadah amâo djăp êa prăi ôh, snăn mgô̆ diñu lŏ nao blei, êjai anăn pô dôk mô̆ truh. Tui si klei bhiăn, tơdah pô dôk mô̆ mŭt leh hlăm sang leh anăn klei bi kuôl dơ̆ng kčưm leh, snăn arăng amâo brei phung mơ̆ng êngao lŏ mŭt ôh. Hơăi mâo lŏ mâo mmông myun ôh kơ êma čô mluk. Khua Yang bi ruê̆: “Snăn kăp răng bĕ, kyuadah diih amâo thâo hruê, kăn thâo mông rei” (êlan 13).
Hlăm klei yăl dliê anei, pô dôk mô̆ čiăng lač kơ Khua Yang Yêsu, pluh čô mniê êra hrông čiăng lač kơ phung đăo, pui kđen leh anăn êa prăi čiăng lač kơ klei mprăp klei hdĭp myang. Klei Aê Diê Blŭ Klei Bi Mguôp Mrâo khăng bi msĕ Yang Krist jing pô dôk mô̆, leh anăn Phung Sang Aê Diê jing mô̆ Ñu (Y-Mathiơ 9:15; Klei Bi Êdah 19:7-9; 21:2). Bruă klam kơ jih jang phung đăo kơ Ñu jing dôk răng nanao. Tơdah Khua Yang mblang kơ phung ƀĭng kna kơ hruê Ñu lŏ hriê leh anăn kơ hruê êknhal tuč mâo lu blư̆ Ñu kñăm kơ klei “dôk răng bĕ”. Mŭt hlăm sang Aê Diê, dlăng ti êngao, jih jang mnuih jing msĕ sơăi, ƀiădah klei yuôm hĭn čiăng thâo bi kah “mnuih thâo mĭn” leh anăn “mnuih mluk” jing klei thâo “dôk răng”. Khua Yang lŏ hriê mmông arăng amâo mĭn ôh, kyuanăn brei drei dôk răng kăp drông Khua Yang Yêsu lŏ hriê nanao grăp mnĭt mmông. Đăm mĭn ôh kơ drei djă bruă prŏng hlăm sang Aê Diê, amâodah kkiêng hlăm gŏ sang phung đăo, amâodah aê aduôn mâo ai prŏng hlăm sang Aê Diê…snăn amâo guôn dôk răng ôh. Klei “dôk răng” jing bruă kơ grăp čô mnuih tơdah dôk ti anăp Khua Yang, amâo mâo pô dưi čan lĭng klei đăo pô mkăn ôh. Akâo Khua Yang đru drei jing phung “thâo mĭn” nanao čiăng kơ drei amâo bi luč mmông myun ôh tơdah Khua Yang lŏ hriê.
Ya mnơ̆ng drei dôk mprăp kơ klei hdĭp drei čiăng kăp drông Khua Yang lŏ hriê?
Wah lač: Ơ Khua Yang, đru kâo hdơr nanao kơ Ih srăng lŏ hriê mmông kâo amâo mĭn ôh, čiăng kơ kâo amâo ngă klei amâo uêñ ôh hŏng klei Ih mtă, ƀiădah đru kâo hŏng jih ai tiê bi mguôp hŏng Ih, dôk kjăp hlăm klei đăo leh anăn hdĭp kơ Ih, čiăng kơ kâo amâo luč mmông myun ôh tơdah Ih lŏ hriê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
