Mathiơ 25:1-13
“Iĕm athei kơchăng mă tơpă, yua kơ iĕm ưh kơ băt năr ayơ, jơ ayơ Inh wă jur tơ iĕm.”
(Mathiơ 25:13)
Nơ̆r jet tơchĕng pơwao:
– Kră Yang Yêsu roi hơ’mon gah tơdrong iŏk ŭnh om wă bơtho kơ tơdrong kiơ?
– Tơdrong lei lăi păng phara băl hăm pơđăm ‘nu bơngai mă kơchăng păng pơđăm ‘nu mă ưh kơchăng noh tơdrong kiơ?
– Yua kơ kiơ lu bơ̆n kăl kơ krăng kơchăng păng chang gô Kră Yang wă jur dơ̆ng?
Kră Yang Yêsu roi hơ’mon gah “Kơplah năr ei kơnh lu bơngai mă khan ‘Bok Kei-Dei pơgơ̆r lu sư ră, mă-lei lu sư thoi lĕ kơ mơjĭt ‘nu adruh âu, rim ‘nu kơ lu sư chĕp ŭnh kơđeng ngăl wă năm ngôi hơpong kơ bơngai ‘nao iŏk akăn. Lu sư chang gô bơngai mă ‘nao iŏk akăn ei wă truh.” Lăm năr et sa iŏk ŭnh om wă bơtho gah tơdrong kơchăng păng chang gô Kră Yang wă jur dơ̆ng phĕt năm sơng iŏk mŏ hle lăm tơdrong juăt khul bơngai Juđê ngăl pơjing kơplah jơ kơmăng. hnam dơnŏ drŏ-kăn hơmet lê̆ adrol mơjĭt ‘nu adruh wă tơgŭm mŏ hle, chĕp ŭnh kơ đeng năm sơng iŏk bơngai ‘nao iŏk akăn. lăm mơjĭt ‘nu adruh noh chĕp kơđeng năm song iŏk bơngai ‘nao iŏk akăn. lăm mơjĭt ‘nu adruh noh “pơđăm ‘nu kơchăng” lu sư chĕp hiă kơchai đak dâu trôl hloi, na lu “pơđăm ‘nu mă ưh kơchăng” ưh kơ chĕp hiă kơchai đak dâu trôl kiơ̆ kơ Trong 5 khan “bơngai ‘nao iŏk akăn ưh kơ jah truh” na đak dâu lu sư đĭ, pơđăm ‘nu mă kơchăng oei đei đak dâu, na pơđăm ‘nu mă ưh kơchăng năm răt đak dâu mă-lei kơplah lu sư oei năm răt na bơngai mă ‘nao iŏk akăn truh bơih, “lu pơđăm ‘nu adruh mă kơchăng noh mơ̆t kiơ̆ hloi sư tơ hnam đe pơkong sŏng sa, na đe tang chơkăl hloi ‘măng.” (trong 10).
Mơjĭt ‘nu adruh chang gô bơngai ‘nao iŏk akăn blŭng a lei lăi yua kơ rim ‘nu lu sư đei kơđeng ngăl păng ŭnh kơđeng tơ̆k khơ̆ng hơdah wă chang gô bơngai ‘nao iŏk akăn. Mă-lei phara băl ‘bơ̆t pơđăm ‘nu mă kơchăg noh băt kơ krăng kơchăng chĕp hiă lê̆ hli kơ đak dâu đĭ gơh đei tôm bơih, na lu pơđăm ‘nu mă ưh kơchăng ưh kơ chĕp hiă na truh đak dâu ưh kơ đĭ. Lu sư apĭnh đak dâu đơ̆ng lu bơngai mă kơchăng na lu bôl sư mă kơchăng ei sơngah ưh kơ asong hli kơ ưh kơ mah, jing khŏm năm răt kơplah noh bơngai mă ‘nao iŏk akăn truh, kiơ̆ kơ tơdrong juăt, kơplah bơngai mă ‘nao iŏk akăn mơ̆t lăm hnam bơih păng tơdrong pơkeh pơgơ̆p ŭnh om wă pơtơm ưh pă gơh ăn lu bơngai ‘nguaih mơ̆t dơ̆ng. ưh pă gơh tam bơih kơ lu bơngai mă ưh kơchăng, Kră Yang pơma pơtôch: “Iĕm athei kơchăng mă tơpă, yua kơ iĕm ưh kơ băt năr ayơ, jơ ayơ Inh wă jur tơ iĕm.” (trong 13).
Lăm tơdrong hơ’mon bơngai mă ‘nao iŏk akăn wă pơtih kơ Kră Yang Yêsu, mơjĭt ‘nu adruh wă pơtih kơ kon pơlei Kră Yang, ŭnh kơđeng păng đak dâu noh bơih pre hơmet lê̆ gah bơhngol. Sơ̆p hla bơar Nơ̆r Kră Yang chăl pah ‘nao ngăl pơtih ‘Bok Krist bơih jing klo, na Khul Bơngai Lui jing akăn Sư (Mathiơ 9: 15; Tơdrong Tơ’bôh 19:7-9, 21:2). Lu kon pơlei Kră Yang athei kơchăng ling lang, kơplah tơblang kơ lu jơ̆ng ‘bang gah Kră Yang wă jur dơ̆ng păng năr tôch wă jê̆ truh, lơ wơ̆t Kră Yang pơma tơpăt “athei kơchăng”. Mơ̆t lăm hnam akŭm lăng đơ̆ng gah ‘nguaih rim ‘nu kư̆m lei lăI, mă-lei tơdrong mă kăl noh gơh kơ năl “ bơngai mă kơchăng ” păng “bơngai mă ưh kơchăng” đơ̆ng lăm jơhngơ̆m “kơchăng”. Kră Yang wă jur dơ̆ng ưh kơ băt lai yơ, thoi noh athei pre hơmet krăng kơchăng wă kơ sơng iŏk Kră Yang Yêsu jur dơ̆ng. ‘nĕ kơ tơchĕng khan inh oei chĕp tơdrong jang tih lăm hnam akŭm, dah mă oei arih lăm hnam dơnŏ bơngai lui yom, păng đơ̆ng yă ‘bok đei tơdrong jang lăm khul lui… “kơchăng” noh bơih tơdrong jang rim ‘nu kơplah tơ’bơ̆p hăm Kră Yang, ưh kơ đei bu gơh mưng đon lui đơ̆ng bơngai nai, apĭnh Kră Yang ăn kơ lu bơ̆n ling lang thoi “bơngai mă kơchăng” wă huei kơ tơ hiong lê̆ kơplah Kră Yang Yêsu jur dơ̆ng.
Kơkuh kơ Ih ơ Kră Yang, apĭnh ăn kơ inh ‘blŏk răk Kră Yang wă jur dơ̆ng mă lai yơ wă kơ inh huei kơ pơ hơi hăm nơ̆r Kră Yang bơtho mă-lei đĭ jơhngơ̆m tơ ‘bưh hăm Ih, wei kơjăp đon lui păng arih ăn kơ Kră Yang wă huei kơ hiong kơplah Kră Yang jur dơ̆ng. krao khan yua anăn Kră Yang Yêsu Krist. Amen.
Lu bơ̆n pre hơmet kiơ ăn kơ tơdrong arih bơ̆n wă kơ krăng kơchăng kơplah Kră Yang jur dơ̆ng?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Nêhêmi 13
Kênh Youtube BHKTHN:
