II Petus 2:1-10
Nqe cim:
“…Vajtswv muab tau cov neeg uas ua txhaum kaw cia mus txog hnub uas Vajtswv txiav txim rau lawv.” (II Petus 2:9b)
Lus nug xav:
– Timthawj Petus hais txog peb yam kev txiav txim twg??
– Tej kev txiav txim yav tag los no qhia dabtsi txog qhov kawg ntawm cov xibhwb cuav thiab cov cev lus cuav?
– Peb kawm tau dabtsi txog Vajtswv txojkev ncaj ncees?
Timthawj Petus hais hnyav heev txog cov xibhwb cuav thiab cov cev lus cuav. Nws tsis zam lossis ua siab mos siab muag rau lawv tej lus qhia yuamkev tawmtsam Qhov Tseeb uas yog Vajtswv Txojlus. Lub txim uas Vajtswv npaj rau cov neeg no yeej muaj tseeb thiab hnyav kawg li (nqe 3). Timthawj Petus thiaj muab peb qho pivtxwv hauv Vajluskub Qub los qhia txog Vajtswv txojkev txiav txim rau cov neeg phem thiab cov uas tawmtsam Nws.
Qhov xub thawj, yog kev txiav txim rau cov timtswv ua txhaum (nqe 4). Qhov no tsis yog hais txog Xatas, rau qhov Timthawj Petus hais tias cov timtswv no raug “pov rau hauv ntuj tawg, lawv raug kaw rau hauv qhov chaw uas tsaus ntuj nti, tos mus txog Hnub uas Vajtswv Txiav Txim rau lawv.” Tshuav Xatas thiab nws cov dab tseem tabtom ua haujlwm tawmtsam Vajtswv thiab dag ntxias neeg ntiajteb (Efexus 2:1-2; 6:12). Qhov no qhia pom tias, cov timtswv no tau ua ib qho kev txhaum loj heev, yog li ntawd lawv thiaj raug txim hnyav dua thiab raug kaw cia tos hnub txiav txim. Raws li Yudas nqe 6 qhia tias cov timtswv no raug txim vim lawv “tsis txaus siab rau tej uas Vajtswv tu rau lawv kav”, txhais tau tias lawv tso qhov chaw, lub meejmom uas Vajtswv tau teem cia rau lawv tseg.
Qhov ob, yog kev txiav txim uas “Vajtswv tso dej los nyab ntiajteb” (nqe 5) vim “cov neeg uas ua txhaum”, tsis hwm thiab tsis pehawm Vajtswv. Nyob ntu sijhawm txua nkoj 120 lub xyoo, “Nau-es tus uas qhia txojkev ncaj ncees” niaj hnub hu kom neeg hloov siab lees txim. Tiamsis cov neeg tiam ntawd tsis mloog thiab tsis kam tso lawv tej kev txhaum tseg. Qhov ntawd yog lawv txojkev phem, thiab thaum kawg Vajtswv thiaj txiav txim los ntawm dej nyab.
Qhov peb, yog kev txiav txim rau ob lub nroog Xaudoos thiab Kaumaulas (nqe 6-10). Ua ntej raug puas tsuaj, ob lub nroog no yog thaj av nplua nuj thiab zoo nkauj heev (Chivkeeb 13:8-10). Tiamsis lawv ua neej raws li lawv tej kev ntshaw qias neeg thiab tawmtsam Vajtswv txojkev tsim txhua yam. Vim li ntawd Vajtswv thiaj rhuav tshem “tso hluavtaws los hlawv ob lub nroog ntawd kub hnyiab tas huv tibsi”, tsis tshuav dabtsi tseg ua qauv cia rau cov tiam tom qab.
Yog Vajtswv tau txiav txim rau cov timtswv ua txhaum, rau neeg ntiajteb tiam Nau-es, thiab rau Xaudoos nrog Kaumaulas vim lawv tej kev txhaum, ces yeej paub tseeb tias Vajtswv tus ncaj ncees yuav txiav txim rau txhua tus uas tawmtsam Nws thiab Nws Txojlus, tshwjxeeb ntawm no yog cov xibhwb cuav thiab cov cev lus cuav. Tshaj qhov ntawd, txojkev txiav txim no tsis yog ua rau puastsuaj sab cev nqaij daim tawv xwb, tiamsis tseem yuav raug kev txiav txim mus ibtxhis sab ntsujplig thiab (Yudas nqe 7). Txawm muaj qee lub sijhawm cov xibhwb cuav thiab cov cev lus cuav zoo li vammeej, vim “muaj ntau leej yuav ua phem ua qias” raws lawv qab (nqe 2), los qhov ntawd tsuas yog kev vammeej ntawm tibneeg qhov muag xwb. Nyob tawm Vajtswv tus uas ncaj ncees xubntiag, lawv yeej yuav raug txojkev txiav txim thiab yuav khiav tsis dim. Qhov no ceebtoom peb kom ua neej raws li Vajtswv Txojlus thiab Nws txojkev ncaj ncees, kom peb tsis raug kev txiav txim rau hnub kawg.
Thov Vajtswv,
Tus Tswv uas dawb huv thiab ncaj ncees, ua Koj tsaug uas Koj tau cawm nyuam yaus los ntawm Koj txojkev hlub tshua, kom nyuam yaus dim ntawm Koj txojkev npau taws. Thov pab kom nyuam yaus txiavxim siab ua neej rau Koj mus txog hnub kawg. Nyuam yaus tuav Tswv Yexus Khetos lub npe thov, Amees.
Peb puas muaj kev xyivfab lossis ntshai thaum ntsib Vajtswv tus uas ncaj ncees?
Nyeem Vajluskub hauv peb lub xyoos: Nehemis 5
Kênh Youtube BHKTHN:
