I Kauleethaus 13:4-7
Nqe cim zaj kawm:
“Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li.” (I Kauleethaus 13:7)
Lus nug xav:
– Vim li cas tsevneeg yog qhov chaw uas txhua tus hauv tsev yuav tsum xyaum ua neej sib hlub?
– Lub hauvpaus kom tsevneeg ua neej ncaj ncees thiab sib hlub raws txojcai yog dabtsi?
– Tsevneeg ua neej rau saum kev ncaj ncees thiab kev hlub yuav tau txiaj ntsig dabtsi?
Tsevneeg ua neej ncaj ncees yog tsevneeg uas hlub tus Tswv kawg siab kawg ntsws thiab ua Nws tes haujlwm. Tiamsis yuav kom tsevneeg nyob ruaj hauv lub neej ncaj ncees mus li, txhua tus hauv tsevneeg yuav tsum sib txuas ua ke hauv txojkev hlub. Yog tsis muaj kev hlub, ces tsevneeg yuav tsis muaj lub zog ua neej ncaj ncees. Vajtswv xub muab peb tso rau hauv tsevneeg. Qhov no yog qhov chaw uas peb yuav tsum xub xyaum ua neej sib hlub ua ntej peb tawm mus ua neej nrog ntiajteb. Tiamsis tomqab uas poob rau kev txhaum, tib neeg dhau los ua cov neeg qia dub, tsimnyog sib hlub tiamsis ho nrhiav ua kom yus tus kheej tau zoo dua lwm tus. Hauv tsevneeg, yog peb tsis sib hlub raws li Vajtswv Txojlus qhia, ces tsevneeg kev ua neej kuj yuav raug swb vim txhua tus hauv tsevneeg muaj tus cwjpwm qia dub.
Nyob hauv I Kauleethaus 13:4-7, peb pom lub hauvpaus uas pab kom tsevneeg ua neej ncaj ncees thiab sib hlub raws txojcai. Qhov xubthawj, “Tus uas muaj kev hlub, nws ua taus siab ntev, nws muaj lub siab dawb siab zoo” (nqe 4a). Vajtswv Txojlus qhia niamtxiv thiab menyuam kom ib leeg ua siab ntev rau ib leeg thiab ib leeg zam rau ib leeg, thiaj tsis muaj tej kev tsis sib haum uas tsis tsimnyog. Qhov ob, “nws tsis khib, tsis khavtheeb thiab tsis muab hlob” (nqe 4b). Kev khib, kev khavtheeb thiab kev muab hlob ua rau tib neeg muab nws tus kheej piv rau lwm tus, xav sib tw thiab xav yeej lwm tus. Kev khib yog ib qho teebmeem txaus ntshai uas rhuav tau kev sib haum xeeb hauv tsevneeg, hos kev khavtheeb thiab kev muab hlob yuav ua rau raug poob ntau yam hauv lub neej. Qhov peb, “tus uas muaj kev hlub, nws tsis ua nruj ua tsiv, tsis qia dub, tsis chim sai; tsis cim ntsoov luag tej kev txhaum rau nruab siab” (nqe 5). Yeej tsis muaj ib tsevneeg twg yuav zam dhau tej kev tsis sib haum thiab kev sib ceg ntawm txij nkawm lossis ntawm menyuam. Txawm li ntawd los, peb yuav tsum nco ntsoov hais tias tsevneeg ua neej ncaj ncees yog tsevneeg uas ib leeg paub nkag siab ib leeg thiab ib leeg zam txim rau ib leeg. Txhua tus yuav tsum muab txojkev iab siab tshem tawm hauv lub siab, rau qhov qhov ntawd yog ib txoj haukev uas dab Ntxwgnyoog siv los tawm tsam peb tsevneeg. Qhov plaub, “…tus uas muaj kev hlub, nws tsis nyiam kev phem kev qias, tiamsis nws nyiam kev ncaj kev ncees. Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li” (nqe 6-7). Tsevneeg ua neej ncaj ncees thiab sib hlub yeej zoo siab rau qhov tseeb uas yog Vajtswv Txojlus. Txhua tus hauv tsevneeg yuav tsum txaus siab hlo poob tej uas yus muaj rau lwm tus, sib zam txim, sib pab thiab sib txhawb hauv kev pehawm Vajtswv, kawm Vajtswv Txojlus thiab nrog tus Tswv sib raug zoo.
Thaum peb tsevneeg ua neej nyob rau saum lub hauvpaus ntawm kev ncaj ncees thiab kev hlub, ces peb yuav kovyeej tej kev nyuaj siab thiab kev sim siab hauv lub neej, thiab thaum ntawd peb yuav qhia tshwm tus Tswv txojkev hlub rau cov neeg nyob ib puag ncig peb raws li Tswv Yexus tau qhia hais tias: “Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim” (Yauhas 13:35).
Thov Vajtswv,
Tus Tswv, nyuam yaus paub hais tias nyuam yaus tseem muaj ntau yam tsis zoo hauv lub neej. Thov Koj ntxiv dag zog rau nyuam yaus, qhia nyuam yaus ua neej ncaj ncees thiab sib hlub hauv tsevneeg, kom ntau leej paub Koj dhau ntawm nyuam yaus tsevneeg. Nyuam yaus tuav Tswv Yexus Khetos lub npe thov, Amees.
Peb tsevneeg qhia tshwm txojkev hlub rau lwm tus li cas?
Nyeem Vajluskub hauv peb lub xyoos: Xakhaliyas 12
Kênh Youtube BHKTHN:
