I Kôrintô 13:4-7
“Bơngai bu băt ‘mêm kơ ‘Bok Kei-Dei hăm bôl buăl sư, mă đe pơm kơnê̆ kơ sư, sư oei ‘mêm kơ đe; đe areh kơ buăl sư mă-lei sư oei lui kơ nơ̆r buăl sư; păng sư lui kơ ‘Bok Kei-Dei wei-lăng sư lăm tôm tơdrong khŏm khŏm; mă đei tơdrong gleh pơmat-tat, sư oei khŏm adrin lui ‘mơ̆i.” (I Kôintô 13:7)
Nơ̆r jet tơchĕng pơwao:
– Yua kơ kiơ hnam dơnŏ ‘noh jơ̆ anih mă rim ‘nu bơngai kăl kơ đei arih tơ’bôh hăm tơdrong ‘mêm?
– Hơnă ăn kơ hnam dơnŏ wă kơ arih hăm tơdrong tơpăt păng ‘mêm mơnat noh jơ̆ tơdrong kiơ?
– Hnam dơnŏ arih lăm tơdrong hơnă tơpăt hăm tơdrong ‘mêm mơnat ba ăn tơdrong đei yua kiơ?
Hnam dơnŏ arih ‘lơ̆ng tơpăt noh jơ̆ hnam dơnŏ đĭ jơ-hngơ̆m ‘mêm kơ Kră Yang păng bơ̆ jang kơ Sư. Mă lei wă kơ hnam dơnŏ tơnăp lăm tơdrong arih ‘lơ̆ng kơ rim ‘nu lăm hnam dơnŏ lei jơ̆ kăl kơ tơguăt băl hăm tơdrong ‘mêm mơnat. Kơ’bah kơ tơdrong ‘mêm noh jơ̆ ưh kơ đei pran wă kơ arih ‘lơ̆ng tơpăt lăm hnam dơnŏ. Kră Yang dan bơ̆n arih hơdrol hloh lăm hnam dơnŏ. ‘Nâu jơ̆ tơdrong pơtơ̆p arih ‘mêm mơnat hơdrol kơ wă arih sa hăm kon pơlei pơla. Mă lei, kơplah kon bơngai pơm yoch na ba ăn tơdrong kret, ăn trŏ kơ ‘mêm mơnat păng wih wăn kơ bơngai nai ră mă lei tă kơ kơnhăm kơ tơdrong lơi kơdih hloh kơ bơngai nai. Lăm hnam dơnŏ, tơdah ưh kơ ‘mêm trŏ thoi Nơ̆r Kră Yang đei bơtho lei gô ba ăn kơ hnam dơnŏ gô pơchah răm yua kơ tơdrong kret đei kơ lăm rim ‘nu bơngai mă oei lăm hnam dơnŏ.
Lăm I Kôrintô 13:4-7, lu bơ̆n đei chă ‘bôh tơdrong hơnă tơm wă ba ăn kơ hnam dơnŏ arih hăm tơdrong ‘lơ̆ng tơpăt păng ‘mêm mơnat trŏ hloh. Mă mônh, “tơdrong ‘mêm kăl kơ đei kĕ ĕnh, păng tơdrong ‘mêm kăl kơ răp gô pơm ‘lơ̆ng” (trong 4a). Nơ̆r Kră Yang đei bơtho mĕ ’bă, kon hơ’lơ̆p kăl kơ đei kĕ ĕnh dih băl păng răp gô pơm tơdrong ‘lơ̆ng wă kơ weh đơ̆ng tơdrong tơsŭl lăm hnam dơnŏ. Mă ‘bar, “tơdrong ‘mêm ưh kơ đei ‘nhĕng kơ đe, ưh kơ đei pơ-ang” (trong 4b). Tơdrong ‘nhĕng dih băl, pơ ang akâu kơdih pơm ăn kơ bơ̆n pơting kơdih kâu bơ̆n hăm bơngai nai, tơdrong ‘nhĕng noh bơih hli krưp dêh wă pơrăm hnam dơnŏ, hơdai lăm tơdrong pơ-ang gô ba ăn tơdrong răm ‘băm lăm chăl arih. Mă pêng, “ưh kơ pơm tơdrong glăi, ưh kơ chă lơi kơ kơdih kâu, ưh kơ blĕk, ưh kơ tơchĕng kơnê̆ kơ đe” (trong 5). Phŏ kơnh ưh kơ gơh weh đơ̆ng tơdrong mă đei tơdrong ưh kơ pôm trong lăm klo kăn, dah mă lăm kon hơ’lơ̆p. Mă lei, kăl kơ tơchĕng kơdih kâu tơdrong mă blĕk klai lăm jơ-hngơ̆m noh jơ̆ ba ăn kơ yang kơnê̆ gô blah hnam dơnŏ bơ̆n. Mă puăn, “ưh kơ hiôk lăm tơdrong đe pơm ưh kơ tơpăt, mă lei hiôk chơt lăm tơdrong tơpăt. Tơdrong ‘mêm mơnat lăm tôm tơdrong, lui ngeh lăm tôm tơdrong, chang sơmĕng lăm tôm tơdrong, chu kĕ ĕnh lăm tôm tơdrong” (trong 6-7). Hnam dơnŏ arih tơpăt păng tơdrong ‘mêm mơnat ling lang kơ hiôk chơt lăm tơdrong ‘lơ̆ng tơpăt noh jơ̆ Nơ̆r ‘Bok Kei-Dei. Rim ‘nu mă arih lăm hnam dơnŏ kăl kơ kơchăng băt kơ arih pơyua dih băl, mơnat dih băl, dŏng tơgŭm dih băl păng pơchŭt dih băl lăm tơdrong kơkuh kơ ‘Bok Kei-Dei, pơhrăm Nơ̆r ‘Bok Kei-Dei păng krao khan tơ’bưh hăm Kră Yang.
Tơdah hnam dơnŏ arih hăm tơdrong hơnă lăm tơdrong ‘mêm mơnat păng tơdrong ‘lơ̆ng tơpăt tơdrong âu gô ba ăn mă khan đei tơdrong hơnat jơ̆ gô yak hlôi lăm chăl arih, tơdrong âu kư̆m ba tơdrong pơchrang hơdah tơdrong ‘mêm đơ̆ng Kră Yang ăn kơ bơngai jum dăr kơ bơ̆n thoi nơ̆r Kră Yang Yêsu đei bơtho: “Dah iĕm đei đon ‘mêm mơnat dih băl, lei đĭ-đăng bơngai băt kơ iĕm lui kơ Inh.” (Yôhan 13:35)
Ơ Kră Yang, inh băt kơ dih akâu inh oei kơ’bah lăm chăl arih tam mă đei pơm trŏ lăp tôm tơdrong, Apinh Kră Yang pơthim ăn kơ inh jơhngơ̆m pran, bơtho inh wă kơ arih đei tơdrong ‘lơ̆ng tơpăt păng ‘mêm mơnat lăm hnam dơnŏ wă kơ lơ bơngai băt kơ Kră Yang đơ̆ng lăm hnam dơnŏ Inh. Yua anăn Kră Yang Yêsu Kris, Amen.
Bơ̆n pơm mĕ ’bă, bơ̆n đei bơtho tơ’bôh kơ kon hơ’lơ̆p bơ̆n tơdrong kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Sachari 12
Kênh Youtube BHKTHN:
