Klei Aê Diê Blŭ: II Y-Pêtrôs 2:1-10
Êlan kliăng: “…pioh phung wê hlăm klei bi kmhal tơl truh Hruê Phat Kđi” (II Y-Pêtrôs 2:9b)
Klei êmuh ksiêm mĭn: Ya tlâo mta klei bi kmhal Khua ƀĭng kna Y-Pêtrôs hưn mdah? Jih klei bi kmhal êgao leh anei, ya klei hưn brei thâo klei srăng truh kơ phung khua pô mtô soh leh anăn phung khua pô hưn êlâo soh? Ya klei drei hriăm kơ klei kpă ênô Aê Diê?
Khua ƀĭng kna Y-Pêtrôs khăng ktang hŏng phung khua pô mtô soh leh anăn hŏng phung khua pô hưn êlâo soh, amâo mâo klei pap ôh kơ klei diñu mtô soh kơ Klei Sĭt Nik jing Klei Aê Diê Blŭ. Klei phat kđi Khua Yang pioh leh kơ phung anei jing sĭt nik leh anăn kjham (êlan 3). Khua ƀĭng kna bi êdah leh tlâo mta klei bi kmhal mơ̆ng Aê Diê kơ phung jhat ƀai leh anăn phung bi kdơ̆ng hŏng Ñu hlăm Klei Bi Mguôp Hđăp.
Êlâo hĭn, bi kmhal phung dĭng buăl jăk ngă soh (êlan 4). Anei amâo djŏ lač kơ Satan ôh, kyuadah Khua ƀĭng kna Y-Pêtrôs brei thâo phung dĭng buăl jăk ngă soh anei arăng “hwiê hĕ diñu hlăm ƀăng êlam hlăm anôk mmăt, čiăng krư̆ pioh diñu tơl truh Hruê Phat Kđi”, hlăk êjai Satan leh anăn mbĭt hŏng phung yang jhat ñu ăt dôk ngă klei bi kdơ̆ng hŏng Aê Diê (Êphêsô 2:1-2; 6:12). Mơ̆ng anăn, dưi thâo săng lŏ mâo klei soh prŏng mkăn mơh mơ̆ng phung dĭng buăl jăk ngă soh anei, tơl klei bi kmhal diñu kjham ktang hĭn leh anăn dôk krư̆ pioh diñu tơl truh hruê phat kđi. Tui si Y-Yut êlan 6 snăn phung dĭng buăl jăk anei tŭ klei bi kmhal kyuadah diñu “amâo djă pioh ôh klei diñu jing”, ƀiădah lui anôk diñu dôk.
Tal dua, klei bi mkhal “lăn ala hđăp” (êlan 5) kyuadah “klei jhat ƀai” diñu, jing klei amâo huĭ mpŭ leh anăn amâo kkuh mpŭ kơ Aê Diê. Ktuê jih 120 thŭn mkra kŭmpăn, “Y-Nôê, sa čô pô mtô klei kpă ênô” mtô mblang leh klei kmhal kơ klei soh. Ƀiădah lĕ, “lăn ala hđăp” amâo čiăng hmư̆ amâo kmhal kơ klei soh, leh anăn klei anăn yơh jing “klei jhat ƀai”.
Tal tlâo, klei phat kđi ƀuôn Sôđôm leh anăn ƀuôn Gômôrơ (êlan 6-10). Êlâo kơ bi rai, jih dua ƀuôn anei jing anôk lăn čăt jing (Klei Mphŭn Dơ̆ng 13:8-10), ƀiădah “klei bi rai tơl digơ̆ jing hbâo ”, amâo lŏ dôk sa mta mnơ̆ng ôh, kyuadah klei hdĭp tui si kđeh tluh čhŏ mrŏ leh ngă klei bi kdơ̆ng hŏng klei Aê Diê hrih mjing čiăng tui ngă klei tluh ƀô bi hêñ bi mlih klei bhiăn yang đar.
Tơdah klei Khua Yang phat kđi pioh kơ phung dĭng buăl jăk ngă soh ăt lŏ ngă soh mơh, lăn ala hđăp jhat ƀai ênuk Y-Nôê, leh anăn dua ƀuôn Sôdôm , Gômôrơ bŏ hŏng klei soh, snăn sĭt nik Pô kpă ênô ăt srăng phat kđi phung bi kdơ̆ng hŏng Ñu leh anăn Klei Ñu Blŭ msĕ mơh, bi tinei jing phung khua pô hưn êlâo soh leh anăn phung khua pô mtô soh. Kdlưn hĭn mơh, klei phat kđi anei amâo knŏng bi rai hlăm asei mlei kđeh ƀiădah wăt klei phat kđi hlŏng lar hlăm mngăt (Y-Yut êlan 7). Wăt tơdah phung khua pô mtô soh leh anăn phung khua pô hưn êlâo soh, tuôm mâo đa đa blư̆ mâo klei tŭ jing kyuadah “mâo lu mnuih srăng tui hlue diñu” (êlan 2), ƀiădah knŏng klei tŭ jing tui si anak mnuih. Ti anăp Aê Diê kpă ênô, klei phat kđi srăng sĭt nik leh anăn amâo dưi tlaih ôh. Klei anei mñă kơ drei dôk hdĭp kpă ênô tui si klei Khua Yang mtô, čiăng amâo tŭ ôh klei phat kđi hlăm hruê knhal tuč.
Si ngă drei hơ̆k mơak amâodah huĭ tơdah dôk ti anăp Aê Diê kpă ênô?
Wah lač: Ơ Khua Yang, Aê Diê doh jăk leh anăn kpă ênô, bi mni lač jăk kơ Khua Yang bi mtlaih leh kâo hŏng klei pap čiăng kơ hŏng klei anăn kâo dưi tlaih kơ klei Ih ngêñ. Brei kâo čuăn dôk hdĭp kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Nêhêmi 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
