II Petus 3:11-14
Nqe cim:
“Tiamsis Vajtswv twb coglus tseg lawm hais tias yuav muaj lub ntuj tshiab thiab lub ntiajteb tshiab. Nyob hauv lub ntuj tshiab thiab lub ntiajteb tshiab uas peb niaj hnub tos ntawd muaj kev ncaj ncees xwb.” (II Petus 3:13)
Lus nug xav:
– Timthawj Petus qhia paub hais tias txhua yam hauv ntiajteb no yuav zoo li cas rau hnub kawg?
– Cov ntseeg Yexus yuav tsum ua neej li cas thaum tos ntsoov Ntuj Tshiab Teb Tshiab?
– Thaum xav txog hnub Tswv Yexus rov qab los, koj muaj lub neej thiab tus cwjpwm zoo li cas?
Timthawj Petus sau tsab ntawv no mus rau cov ntseeg uas tabtom raug tej kev qhia yuamkev dag ntxias, coj tsis ncaj thiab qaug zog sab ntsujplig. Nws pab kom lawv tig los ntsia rau yav tom ntej, yog Vajtswv tej lus cogtseg txog “Ntuj Tshiab Teb Tshiab”, qhov chaw uas kev ncaj ncees yuav kav mus li (nqe 13). Qhov no kuj yog lub hauvpaus rau cov ntseeg xyaum ua lub neej kom dawb huv thiab hwm Vajtswv txhua hnub. Lub ntiajteb uas peb nyob niaj hnub nimno puv nkaus tej kev phem, kev ntxeev siab thiab kev tsis ncaj ncees; paub tseeb hais tias txhua yam hauv ntiajteb no yuav tsis nyob mus ibtxhis, vim “tej ntawd yuav puastsuaj mus huv tibsi” (nqe 11). Vajtswv tsis ua txuj tsis pom kev phem, thiab Nws kuj tsis pub kev txhaum kav mus tsis kawg (Teev Npe 14:18). Yuav muaj ib hnub txhua yam kev phem raug rhuav tshem pov tseg, thiab Vajtswv yuav hloov txhua yam dua tshiab los ntawm Nws txoj kev ncaj ncees uas zoo tag nrho. Kev txiav txim zaum kawg tsis yog tsuas ua kom puastsuaj xwb, tiamsis tseem yog kev ntxuav kom dawb huv. Vajtswv yuav tsim muaj “Ntuj Tshiab Teb Tshiab”, yog qhov chaw uas txhua yam yuav qhia tshwm Nws txojkev dawb huv, kev zoo nkauj thiab Nws qhov tseeb.
Timthawj Petus nqua hu cov ntseeg kom ua neej dawb huv thiab hwm Vajtswv (nqe 11). Ua neej dawb huv yog ua neej mloog lus thiab ua raws li Vajtswv siab nyiam. Nrhiav kev dawb huv yog nqhis nqhawv yam uas Vajtswv xav kom peb muaj. Kev hwm Vajtswv tshwm muaj dhau ntawm lub siab uas hwm thiab paub Vajtswv yog leejtwg, thiab teb rau Nws los ntawm kev pehawm, kev ntseeg siab thiab kev mloog lus. Qhov no yog tus cwjpwm uas txhua tus ntseeg yuav tsum muaj thaum “tos hnub uas Vajtswv yuav los” (nqe 12).
Cov ntseeg Tswv Yexus tsis yog cov neeg sawv tos kom tej lus cogtseg tshwmsim xwb, tiamsis peb yuav tsum koom tes ua Vajtswv tes haujlwm, rau siab ntso tshaj tawm Txojmoo Zoo, thov Vajtswv rau Vajtswv Lub Tebchaws, thiab ua neej qhia tawm Vajtswv txojkev ncaj ncees. Cov ntseeg tsis ntshai hnub kawg, tiamsis tos ntsoov hnub uas Vajtswv yuav qhia tshwm txhij txhua Nws txoj kev hlub tshua thiab Nws txoj kev ncaj ncees.
Timthawj Petus ntuas cov ntseeg hais tias: “thaum nej tseem tabtom tos hnub ntawd nej yuav tsum ua nej lub neej kom dawbhuv rau Vajtswv pom hais tias, nej ua haum Vajtswv siab thiab nej tsis muaj ib qhov txhaum li” (nqe 14). Ntawd yuav yog ib lub ntiajteb uas raug kho kom zoo lawm, tsis muaj kev lwj puas, kev mob nkeeg, kev tsis ncaj ncees thiab kev tuag lawm. Vim li ntawd, txij hnub no mus peb yuav tsum npaj rau Vajtswv Lub Tebchaws uas tabtom yuav los txog los ntawm kev ua neej zoo li cov pejxeem hauv Lub Tebchaws ntawd. Vajtswv, Tus uas yuav ua kom txhua yam hloov tshiab, tabtom hloov Nws haivneeg lub neej tshiab txhua hnub. Thiab thaum Ntuj Tshiab Teb Tshiab los txog, peb yuav nyob hauv ib lub ntiajteb uas kev ncaj ncees yuav yog txojcai nyob mus ibtxhis.
Thov Vajtswv,
Tus Tswv, thov Koj pab kom nyuam yaus ua neej dawb huv thiab hwm Koj kawg siab kawg ntsws thaum tos ntsoov hnub Tswv Yexus rov qab los. Nyuam yaus tuav Tswv Yexus Khetos lub npe thov, Amees.
Peb tabtom ua dabtsi thaum tos hnub uas Vajtswv yuav rhawv tsim Ntuj Tshiab Teb Tshiab?
Nyeem Vajluskub hauv peb lub xyoos: Exalas 10
Kênh Youtube BHKTHN:
