Klei Aê Diê Blŭ: II Y-Pêtrôs 3:11-14
Êlan kliăng: “Ƀiădah tui si klei Ñu ƀuăn, drei dôk guôn phung adiê mrâo leh anăn lăn ala mrâo, tinăn mâo klei kpă ênô” (II Y-Pêtrôs 3:13)
Klei êmuh ksiêm mĭn: Si klei Khua ƀĭng kna Y-Pêtrôs brei thâo klei srăng truh kơ jih jang mnơ̆ng ti lăn ala hlăm hruê knhal tuč? Si brei phung đăo kơ Krist dôk hdĭp êjai dôk guôn adiê mrâo lăn ala mrâo? Si knhuah hdĭp leh anăn knuih hdĭp diih tơdah dôk mĭn kơ hruê Khua Yang lŏ hriê?
Khua ƀĭng kna Y-Pêtrôs čih hră anei kơ phung đăo hlăk dôk tŭ klei kpĭ kpiêt mơ̆ng klei mtô soh, klei kpă ênuah anak mnuih hroh trŭn, leh anăn klei êdu ai hlăm klei hdĭp myang. Ñu đru digơ̆ dlăng phă klei čang hmăng kơ hruê êdei, klei ƀuăn kơ “Adiê mrâo leh anăn lăn ala mrâo”, anôk klei kpă ênô kiă kriê (êlan 13). Klei anăn ăt jing tur čiăng kơ phung đăo bi mjuăt klei hdĭp doh jăk leh klei huĭ mpŭ kơ Aê Diê grăp hruê. Lăn ala anôk drei dôk hdĭp bŏ hŏng klei soh jhat, klei bi kdơ̆ng leh anăn amâo mâo klei mtăp mđơr ôh, sĭt nik amâo srăng adôk hlŏng lar ôh: “jih jang mnơ̆ng anăn srăng rai luč” (êlan 11). Aê Diê amâo yap kpă ôh pô soh leh, leh anăn Ñu amâo brei klei soh mâo klei dưi nanao ôh (Klei Yap 14:18). Srăng mâo sa hruê jih jang klei jhat ƀai rai luč jih, leh anăn Aê Diê lŏ hrih mrâo jih jang mnơ̆ng hŏng klei kpă ênô kluôm ênŭm Ñu. Klei phat kđi knhal tuč amâo djŏ knŏng hjăn klei bi rai ôh, ƀiădah wăt jing klei bi doh msĕ mơh. Aê Diê srăng mkŏ mdơ̆ng “adiê mrâo lăn ala mrâo” jing anôk jih jang mnơ̆ng bi êdah klei doh jăk, klei siam leh anăn klei sĭt nik Ñu.
Khua ƀĭng kna Y-Pêtrôs iêô mthưr phung đăo kơ Khua Yang brei dôk hdĭp klei hdĭp doh jăk leh anăn huĭ mpŭ kơ Aê Diê (êlan 11). Dôk hdĭp doh jăk jing hdĭp đup gưt klei Khua Yang čiăng. Tui tiŏ klei doh jăk jing êpa mhao klei Khua Yang êpa mhao. Klei huĭ mpŭ kơ Khua Yang đoh ling mơ̆ng ai tiê mpŭ mni, thâo kral hlei Khua Yang jing leh anăn wĭt lač hŏng klei kkuh mpŭ, đăo knang leh anăn đup gưt. Anăn yơh jing knuih hdĭp grăp čô phung đăo kơ Krist brei mâo “êjai dôk guôn leh anăn mă bruă čiăng bi djăl truh Hruê Aê Diê” (êlan 12).
Phung đăo kơ Khua Yang amâo djŏ jing phung dôk ti êngao kăp dôk guôn klei phung khua pô hưn êlâo bi sĭt ôh, ƀiădah brei drei ngă bruă Aê Diê tiŏ nao, hŏng jih ai tiê hiu hưn Klei Mrâo Mrang Jăk, wah lač kơ Ƀuôn Ala Mtao Ñu, leh anăn dôk hdĭp bi êdah klei kpă ênô Khua Yang. Phung đăo kơ Krist amâo huĭ ôh kơ hruê knhal tuč ƀiădah êpa mhao čang guôn hruê Khua Yang bi êdah klă kluôm klei pap leh anăn klei kpă ênô Ñu. Khua ƀĭng kna Y-Pêtrôs mtă mtăn kơ phung đăo “brei diih hur har čiăng kơ Ñu ƀuh diih dôk êđăp ênang, amâo mâo klei čhŏ amâodah klei dưi ƀuah diih ôh” êjai dôk guôn Aê Diê lŏ hrih mjing adiê mrâo lăn ala mrâo (êlan 14). Anôk anăn srăng jing sa lăn ala lŏ bi mrâo, amâo rai luč, amâo mâo klei ruă duam, klei amâo mtăp mđơr leh anăn klei djiê ôh. Kyuanăn yơh, brei drei mprăp kơ Ƀuôn Ala Mtao srăng truh hŏng klei dôk hdĭp msĕ si phung ƀuôn sang Ƀuôn Ala Mtao anăn dơ̆ng mơ̆ng ară anei hin êjai ăt dôk ti lăn ala anei. Aê Diê, Pô srăng mjing jih jang mnơ̆ng lŏ jing mrâo, dôk bi mlih klei hdĭp phung anak ƀuôn sang Ñu grăp hruê. Leh anăn hlăk adiê mrâo lăn ala mrâo truh, drei srăng dôk hlăm sa lăn ala mâo klei kpă ênô srăng jing hnơ̆ng čuăn dôk nanao hlŏng lar.
Ya drei ngă êjai dôk guôn hruê Khua Yang mkŏ mjing adiê mrâo lăn ala mrâo?
Wah lač: Ơ Khua Yang, brei kâo jih ai tiê dôk hdĭp klei hdĭp doh jăk leh anăn huĭ mpŭ kơ Aê Diê êjai dôk guôn hruê Khua Yang lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
