Klei Aê Diê Blŭ: Klei Bi Hriêng 27:7-10
Êlan kliăng: “Đăm lui ôh mah jiăng ih leh anăn mah jiăng ama ih, leh anăn đăm nao ôh kơ sang ayŏng adei ih êjai ih mâo klei rŭng răng. Sa čô riêng gah dôk giăm jing jăk hĭn kơ ayŏng adei dôk kbưi” (Klei Bi Hriêng 27:10)
Klei êmuh ksiêm mĭn: Ya klei bi mklă klei anak mnuih čang hmăng? Ya klei brei ngă hŏng klei bi mguôp sui? Si drei yua hŏng klei bi mguôp hlăm klei hdĭp?
Mtao Salômôn mñă ai tiê bi mklă klei anak mnuih čang hmăng (êlan 7). Jih dua mta mnuih, sa čô trei đei kơ klei soh jhat tơl dlăng hơăi mang kơ klei jăk siam mâo bi hmô msĕ si êa hnuê; leh anăn sa čô mnuih êpa đei tơl dlăng jih jang mnơ̆ng phĭ leh anăn ba klei jhat jing mmih, jih jang jing soh čhuai sơăi. Tơdah sa čô mnuih dôk mơak hlăm Khua Yang, jih jang klei mplư ti êngao jăk mơak dưn mơh ăt jing hơăi mang. Ƀiădah tơdah mngăt ai tiê jing huâng, anak mnuih srăng tui duah klei srăng ba klei amâo jăk amâodah amâo ba ênoh yuôm sĭt ôh. Klei mơak hrăp hlăm mngăt răng mgang mnuih amâo lĕ hlăm klei soh, bi klei kƀah hlăm mngăt srăng atăt drei lĕ hlăm klei soh.
Êngao anăn, brei sĭt suôr hlăm dŭm klei bi mguôp. Mtao Salômôn mtô “Đăm lui ôh mah jiăng ih leh anăn mah jiăng ama ih;” (êlan 10) mñă klă ênoh yuôm kơ klei bi guôp kjăp leh anăn sĭt suôr. Anei jing klei bi mguôp dưi mkŏ mjing kjăp sui, mâo đa đa găn lu gưl ênuk, kyua klei bi đăo knang, mđing uêñ leh anăn bi đru kriê dlăng. Brei drei mpŭ leh anăn kriê pioh klei bi mguôp anei msĕ si klei bi knăl kơ sa klei bi hdĭp bi êdah klei sĭt suôr Aê Diê. Knhal tuč, Mtao Salômôn mñă hlăk êjai rŭng răng, sa čô găp sĭt suôr khăng tŭ dưn hĭn kơ sa ayŏng adei ti anôk kbưi. Klei jĕ giăm, wăl kơ êlan klông truh mngăt ai tiê, ba klei hmao bi đru.
Drei mâo klei iêô mthưr rông ba klei hdĭp mngăt grăp hruê hlăm Klei Aê Diê Blŭ leh anăn bi mguôp hŏng Aê Diê čiăng kriê pioh klei pô čiăng djŏ êlan. Tơdah mngăt ai tiê dưi mơak mñai hlăm Khua Yang, klei mplư srăng awăt leh anăn drei mâo klei mngač hlăm klei hrŏng ruah. Klei Aê Diê Blŭ mtô: “Snăn đup gưt bĕ kơ Aê Diê. Bi kdơ̆ng bĕ hŏng yang jhat, leh anăn ñu srăng đuĕ kbưi mơ̆ng diih. Nao giăm bĕ kơ Aê Diê, leh anăn Ñu srăng hriê giăm kơ diih. Ơ phung soh, bi doh bĕ kngan diih. Ơ phung mâo klei mĭn dua nah, bi doh bĕ ai tiê diih”(Y-Yakơ 4:7-8). Êngao anăn, brei bi liê hlăm klei bi mguôp jing ƀĭng găp sĭt suôr; mđing uêñ, mđĭ ai leh anăn kriê pioh klei bi mguôp Aê Diê jao. Ñu khăng yua phung giăm drei msĕ si phung ƀuôn sang Aê Diê hlăm Phung Sang Aê Diê, leh anăn jih phung riêng gah, phung mă bruă mbĭt, ƀĭng găp čiăng ba klei mđĭ ai leh anăn đru. Brei mpŭ kơ klei bi mguôp anăn, mbĭt anăn, gĭr mkŏ mjing êpul êya riêng gah pô, srăng đru kơ pô mkăn leh anăn ăt luă gŭ čiăng mâo klei đru. Anei jing klei drei hdĭp thâo mĭn hlue si Klei Aê Diê Blŭ mtô hlăm klei bi mguôp grăp hruê, leh anăn ăt čiăng kơ Khua Yang mâo klei Guh kơang mơ̆ng drei.
Si brei drei bi mlih klei hdĭp hlăm klei bi mguôp hdơ̆ng pô?
Wah lač: Ơ Ama Bŏ Hŏng Klei Pap, kâo bi mni lač jăk kơ Ih kyua mñă kơ kâo klei thâo hrăp sĭt knŏng hriê mơ̆ng Khua Yang. Akâo kơ Ih mtô kâo mpŭ leh anăn mkŏ mjing klei bi mguôp sĭt suôr Aê Diê brei. Ăt akâo kơ Ih đru kâo đru mguôp mkŏ mjing sa êpul êya bi khăp jŭm dar pô, srăng đru bi mđĭ ai hlăk êjai dleh dlan. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
