Tơdrong Pơđơ̆k 27:7-10
“’Nĕ kơ achăng bôl buăl ih dah buăl juăt ‘bă ih, ‘Nĕ kơ năm tơ hnam ‘nhŏng oh năr ih đei tơdrong gleh pơmat, Bơngai rông ‘bôt ih noh ‘lơ̆ng hloh kơ ‘nhŏng oei ataih.” (Tơdrong Pơđơ̆k 27:10)
Nơ̆r jet tơchĕng pơwao:
– Tơdrong kiơ pơm kơ jơhngơ̆m hơpơi wă kon bơngai bơ̆n?
– Kăl kơ pơm kiơ hăm tơdrong tơ’bưh băl ‘lơ̆ng kơjăp?
– Lu bơ̆n yua iŏk thoi yơ hăm tơdrong tơ’bưh băl lăm chăl arih?
Pơtao Sôlômôn tơ’blŏk khan tơdrong hơpơi wă kon bơngai gơh jing dah ưh noh lĕch đơ̆ng jơhngơ̆m (trong 7). Đĭ ‘bar khul bơngai, bơngai mă phĭ hrăp dêh bơih dôm tơdrong yoch glăi truh tơ mah lăng pơdê dôm tơdrong ‘lơ̆ng trŏ đei pơtih thoi kơ kơ̆l hơkoh sut, păng bơngai mă pơngot rơhing dêh truh tơ mah lăng dôm tơdrong ơh lăm jơhngơ̆m păng đei pơrăm khan lăng thoi ‘ngam. Đĭ đăng noh glăi ngăl, ưh kơ trŏ. Mưh minh ‘nu bơngai hlôi lăp đon lăm Kră Yang, dôm tơdrong pơhlŭ gah ‘nguaih hơiă dang yơ hĭ kư̆m huay kơ đei tơdrong kiơ. Mălei, mưh bơhngol ưh kơ đei Kră Yang, kon bơngai ‘bônh kơ chơ chă dôm tơdrong ưh kơ ‘lơ̆ng pơrăm bơ̆n dơ̆ng dah mă ưh kơ ba ăn tơdrong gĭt kăl tơpă. Tơdrong phĭ mah gah bơhngol bơwei kon bơngai huay kơ huŏng lăm tơdrong yoch, na tơdrong kơ’bah gah bơhngol ‘bônh kơ ba bơ̆n năm tơ tơdrong yoch.
Đơ̆ng noh dơ̆ng, athei bơwei tơdrong kơjăp ‘lơ̆ng lăm tơdrong tơ’bưh băl. Pơtao Sôlômôn bơtho “’Nĕ kơ achăng bôl buăl ih dah buăl juăt ‘bă ih” (trong 10) wă pơma kơ tơdrong gĭt kăl dôm tơdrong tơ’bưh băl kơjăp păng tơnăp. ‘Nâu bơih dôm buăl juăt đei pơjing đunh kơjăp, phŏ tơdrong tơ’bưh băl đơ̆ng mĕ ‘bă yă ‘bok truh tơ bơ̆n, lăng ba păng wei rong dih băl. Bơ̆n pơyom păng bơwei dôm tơdrong tơ’bưh ‘nâu thoi minh tơdrong tơdra tơdrong arih tơdrong tơ’bôh tơdrong ‘lơ̆ng tơpăt Kră Yang. Tuch luch, Pơtao Sôlômôn tơ’blŏk khan lăm năr đei tơdrong gleh pơmat, minh ‘nu buăl juăt oei jê̆ bơ̆n noh ‘lơ̆ng hloh kơ ‘nhŏng oh oei ataih. Lu bơ̆n đei krao pơtơm wei rong bơhngol rim năr đơ̆ng nơ̆r Kră Yang păng tơdrong tơ’bưh hăm Sư wă wei jơhngơ̆m hơpơi wă bơ̆n mă trŏ. Mưh jơhngơ̆m hiôk jơnap lăm Kră Yang, pơhlŭ gô rai pă gan păng bơ̆n đei tơdrong hlôh băt lăm tơdrong rơih iŏk. Nơ̆r Kră Yang bơtho “Thoi noh na iĕm athei chu yom kơ ‘Bok Kei-Dei, apinh ‘Bok Kei-Dei pơpuh yang satan yŏng pơgơ̆r yang kơnê̆, ‘nĕ ăn oei jê̆ iĕm, na yang satan ưh pă pơ̆n oei jê̆ iĕm, jăk hloi tơ nai. Iĕm năm jê̆ ‘Bok Kei-Dei na ‘Bok Kei-Dei oei jê̆ iĕm…” (Yakơ 4:7-8). Đơ̆ng noh, athei chă buăl juăt ‘lơ̆ng tơpăt, băt kơ lăng băl, tưk tơiung păng bơwei dôm tơdrong tơ’bưh băl mă Kră Yang đei pơjao. Kră Yang yua lu bơngai jê̆ bơ̆n thoi kon pơlei Kră Yang lăm Khul Bơngai Lui, păng bơngai lăm rông ‘bôt, bơngai jang hơdai, buăl juăt wă ba ăn tơdrong tưk tơiung păng tơgŭm. Athei pơyom dôm tơdrong tơ’bưh noh, kư̆m dai adrin jang tơiung kon pơlei pơla jum dăr bơ̆n, tơgŭm hloi bơngai nai păng iŏk đon ala wă kơ gơh tơgŭm. ‘Nâu bơih trong bơ̆n arih gơh hơgei kiơ̆ kơ nơ̆r ‘Bok Kei-Dei bơtho lăm tơdrong tơ’bưh băl rim năr, păng kư̆m wă kơ Anăn Kră Yang đe ưang đơ̆ng tơdrong arih bơ̆n.
Ơ Kră Yang mă ‘mêm mơnat, inh bơnê kơ Ih. Yua kơ Ih tơ’blŏk kơ inh khan tơdrong hiôk jơnap tơpă jơ̆ đei đơ̆ng Kră Yang đĕch. Apinh Ih bơtho inh băt pơyom păng pơjing tơiung dôm tơdrong tơ’bưh băl tơ năp đơ̆ng Kră Yang ăn. Kư̆m apinh ih tơgŭm inh wang hơdai pơjing kon pơlei pơla ‘mêm mơnat băl jum dăr kơ inh, tơgŭm băl hloi lăm kơplah đei tơdrong pơmat tat. Krao khan yua anăn Kră Yang Yêsu Krist, Amen.
Bơ̆n kăl kơ tơplih tơdrong arih thoi yơ lăm tơdrong tơ’bưh băl?
Đŏk Sơ̆p Hla bơar ‘Bok Kei-Dei lăm pêng sơnăm: Esơra 6
Kênh Youtube BHKTHN:
https://www.youtube.com/c/bhkthn
