Pajluh 27:7-10
Nqe cim:
“Tsis txhob tso koj tej phoojywg lossis koj txiv tej phoojywg tseg. Thaum koj raug kev nyuaj siab, tsis txhob mus cuag koj cov kwvtij uas nyob deb, tej phoojywg zejzog uas nyob ze tseem pab tau koj dua cov kwvtij uas nyob deb” (Pajlug 27:10)
Lus nug xav:
– Yam dabtsi txiav txim siab rau neeg txoj kev ntshaw?
– Cheem tsum ua dabtsi kom tej kev phoojywg nyob ruaj khov?
– Peb siv qhov no li cas rau tej kev ua phoojywg hauv peb lub neej?
Vajntxwv Xalumoos qhia hais tias lub siab txiav txim siab rau neeg txoj kev ntshaw (nqe 7). Tagnrho ob hom neeg no, ib tug tsau npo rau tej kev phem kev qias txog qib uas nws saib tsis taus tej yam zoo uas piv zoo li zib ntab; thiab ib tug tshaib nqis heev txog qib uas nws saib txhua yam ntsim iab thiab fauj xeeb (có hại) puavleejqab zib kawg, tagnrho txhua yam ntawd puavleej yuam kev thiab txhaum. Thaum ib tug neeg uas nws txaus siab rau hauv tus Tswv, txawm yog txojkev dag ntxias sab nraud yuav zoo npaum li cas los xij yeej tsis tseemceeb rau nws. Tiamsis thaum lub siab khoob lug, tibneeg yuav yoojyim mus nrhiav yam tsis zoo thiab tsis muaj nqis dabtsi. Kev tsau ntawm sab ntsujplig tiv thaiv tau tibneeg tsis poob rau tej kev phem kev qias, tiamsis yog tshaib sab ntsujplig yoojyim ua rau peb poob rau kev txhaum.
Dhau qhov ntawd, yuav tsum ncajncees ceev kev phoojywg. Vajntxwv Xalumoos qhia “Tsis txhob tso koj tej phoojywg lossis koj txiv tej phoojywg tseg” (nqe 10) hais meej txog txoj kev phoojywg ruaj khov thiab ncajncees. Nov yog txoj kev phoojywg txhim tsa ntev los thiab ruaj khov, tej thaum txoj kev phoojywg no hla dhau ntau tiam neeg los, tau txhim tsa los ntawm kev ntseeg siab, kev hmov tshua thiab sib pab. Peb saib muaj nqis thiab ceev txoj kev phoojywg no zoo li ib lub cim ntawm lub neej qhia tawm Vajtswv txoj kev ncajncees. Thaum kawg, vajntxwv Xalumoos ntuas hais tias hauv lub sijhawm txomnyem, ib tug phoojywg nyob ze pab tau dua li ib tug kwvtij nyob deb. Kev nyob ze, ntawm thaj chaw nyob thiab sab ntsujplig, yuav sib pab cuag thaum muaj kev cheem tsum.
Peb tau hu los kom peb yug peb sab ntsujplig txhua hnub dhau los ntawm Vajtswv Txojlus thiab sib raug zoo nrog Nws kom ceev tau yus lub siab ntshaw mus yog kev. Thaum sab ntsujplig txaus siab hauv tus Tswv lawm, txoj kev dag ntxias yuav tsis muaj zog zuj zus thiab peb muaj kev txawj ntse hauv kev xaiv. Vajtswv Txojlus qhia: “Yog li ntawd, nej cia li mloog Vajtswv lus. Nej yuav tsum tawmtsam dab Ntxwgnyoog, dab thiaj yuav khiav ntawm nej mus. 8Nej cia li los nyob ze Vajtswv, Vajtswv thiaj yuav los nyob ze nej…” (Yakaunpaus 4:7-8). Dhau qhov ntawm, cia li nqis peev rau tej phoojywg tseeb, sib hmov tshua, sib txhawb zog thiab ceev txhua txojkev phoojywg uas Vajtswv cob. Vajtswv pheej siv cov neeg nyob ze peb xws li cov ntseeg hauv Pawg ntseeg, kwvtij zej zog, cov koom ua haujlwm, cov phoojywg los txhawb zog thiab sib pab. Cia li saib txojkev phoojywg muaj nqis thiab siv zog txhim tsa kev phoojywg nrog cov neeg ib ncig ntawm yus, txaus siab hlo pab lwm tus thiab kuj txo hwjchim kom tau kev pab. Nov yog qhov uas peb ua neej muaj tswvyim raws li Vajtswv Txojlus qhia hauv kev ua phoojywg thiab dhau ntawd peb kuj ua rau Vajtswv lub npe raug qhuas.
Thov Vajtswv,
Vajtswv tus muaj kev hlub, ua Koj tsaug uas ntuas nyuam yaus dhau Koj Txojlus no, kev txaus siab tseeb tsuas yog los ntawm Koj los xwb. Thov pab nyuam yaus paub saib txojkev phoojywg muaj nqis thiab ncajncees txhim tsa txojkev phoojywg uas Koj pub ntawd txhua hnub. Thov pab nyuam yaus cog tau kev phoojywg nrog kwvtij zejzog coj tau sawvdaws los sib hlub sib pab thaum muaj kev txomnyem. Nyuam yaus tuav Tswv Yexus Khetos lub npe thov, Amees.
Peb yuav tau hloov kev ua neej li cas hauv txojkev ua phoojywg?
Nyeem Vajluskub hauv peb lub xyoos: Exalas 6
Kênh Youtube BHKTHN:
