Klei Aê Diê Blŭ: Y-Mathiơ 24:36-42
Êlan kliăng: “Ƀiădah bi kơ hruê leh anăn mmông anăn, amâo mâo sa čô mnuih thâo ôh, phung dĭng buăl jăk hlăm adiê amâodah Anak kăn thâo rei, knŏng hjăn Ama thâo” (Y-Mathiơ 24:36)
Klei êmuh ksiêm mĭn: Ya klei Khua Yang Yêsu brei thâo kơ wưng Ñu lŏ hriê? Ti ênuk Khua Yang bi msĕ tơdah Ñu lŏ hriê? Ya klei drei dôk mprăp čiăng drông Khua Yang lŏ hriê?
Hlăm Y-Mathiơ kdrêč 24, Khua Yang Yêsu lač leh kơ lu klei bi knăl kơ klei Ñu lŏ hriê, khădah snăn sa klei mâo mñă wĭt mñă nao jing wưng djŏ klă kơ klei Ñu srăng lŏ hriê mâo Aê Diê Ama thâo truh knhal tuč. Dĭng buăl jăk jing phung mă bruă kơ Aê Diê ăt kăn thâo mơh hbĭl klei anăn srăng truh. Wăt Khua Yang Yêsu ăt bi êdah klei mpŭ kơ klei dưi Aê Diê Ama kơ ênuk lŏ hriê tơdah Ñu hlăk dôk hlăm asei mlei anak mnuih.
Khua Yang Yêsu yua rup ênuk Y-Nôê čiăng bi hmô kơ klei Ñu lŏ hriê. Anăn jing ênuk amâo mâo klei đăo ôh, wăt tơdah Y-Nôê jih ai tiê hưn brei răng leh (II Y-Pêtrôs 2:5) ƀiădah diñu ăt hngah, tơl êa lip bi mdjiê jih jang. Hlăm ênuk knhal tuč ăt snăn mơh, ăt srăng mâo klei amâo đăo leh anăn ai tiê khăng: “Kyuadah sa ênuk srăng truh hlăk anăn arăng amâo lŏ čiăng hmư̆ ôh klei mtô sĭt, ƀiădah kyua diñu čiăng hmư̆ klei mơak diñu srăng ruah phung khua pô mtô tui si diñu pô khăp” (II Y-Timôthê 4:3), leh anăn tơdah Khua Yang Yêsu lŏ hriê srăng mâo phung dưi ba mbĭt leh anăn phung arăng lui. “Snăn răng bĕ, kyuadah diih amâo thâo ôh ya hruê Khua Yang diih srăng hriê” (êlan 42).
Hŏng knuih čiăng thâo mơ̆ng anak mnuih, drei čang hmăng thâo djŏ klă wưng Khua Yang Yêsu srăng lŏ hriê. Ăt mâo leh lu mnuih tĭng yap leh anăn hưn mdah hruê Khua Yang lŏ hriê ƀiădah jih jang tŭ klei hêñ sơăi. Khădah snăn, mơ̆ng Klei Aê Diê Blŭ, drei thâo klă amâo mâo ôh hlei pô thâo djŏ klă hruê mmông Khua Yang hriê, kyua anăn jing klei dưi kluôm dhuôm mơ̆ng Aê Diê. Klei anei srăng đru kơ amâo tŭ klei đăo soh mplư, phung khua mtô pô soh hưn kơ hruê mmông Khua Yang Yêsu lŏ hriê. Khua Yang čiăng kơ drei mdih nanao, mprăp klei hdĭp pô grăp hruê amâo djŏ dôk guôn hruê knhal tuč ôh kmhal. Brei drei mdih tơdah dlăng hlăm ala ƀuôn riêng gah, anak mnuih lĕ hlăm klei soh, klei hlăp lêñ, ră rañ leh anăn klei mĭn hdĭp soh čhuai, ngă kơ lu mnuih khăp amâo lŏ mđing hmư̆ ôh klei hưn brei răng mơ̆ng Klei Sĭt Nik. Ti anăp jih jang klei anăn, brei drei mdih leh anăn wah lač kyua thâo Khua Yang Yêsu drei dơ̆ng lŏ hriê. Hrô kơ mđing ksiêm duah hbĭl hruê mmông Khua Yang lŏ hriê snăn brei mđing kơ knuih hdĭp drei si ngă čiăng kơ hruê Khua Yang lŏ hriê drei amâo čŏk hia hƀlŏk êgao mmông leh ôh. Hlăk dôk čang guôn Khua Yang lŏ hriê, ăt brei drei gĭr hiu hưn Klei Mrâo Mrang Jăk čiăng lu mnuih mâo klei bi mtlaih.
Drei mđing tui duah hruê mmông Khua Yang lŏ hriê mơ̆? Ya ngă?
Wah lač: Ơ Khua Yang Yêsu, akâo kơ Ih đru kâo mdih dôk guôn hruê Khua Yang lŏ hriê, leh anăn đru klei hdĭp kâo jing mnuih bi mdih phung riêng gah kâo čiăng kơ diñu ăt kmhal klei soh đăo kơ Khua Yang êlâo kơ êgao mmông. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
