Mathiơ 24:36-42
“Năr păng jơ ei ưh kơ đei bu băt. Lu linh jang ‘lơ̆ng kơpal plĕnh ti ưh kơ băt. Inh Kon ‘Bok Kei-Dei ră, kư̆m hơdai ưh kơ băt mơ̆n. Pôm ‘Bă Inh đĕch băt kơ năr ei kơnh.” (Mathiơ 24:36)
Nơ̆r jet tơchĕng pơwao:
– Kră Yang Yêsu tơbăt tơdrong kiơ gah jơ năr Sư jur dơ̆ng?
– Kră Yang Yêsu pơting jơhnơr kon bơngai kơplah Sư jur hăm jơhnơr kon bơngai kơplah ayơ sơ̆?
– Bơ̆n hơtai hơmet lê̆ tơdrong kiơ wă sơng iŏk Kră Yang jur dơ̆ng?
Lăm Mathiơ chăl 24, Kră Yang Yêsu roi bơih lơ tơdra tơbăt gah Sư wă jur dơ̆ng, mă khan lei ră, minh tơdrong mă Sư tơ’blŏk hơlơ̆k hơle noh jơ năr Sư jur ‘blep kơ năr ayơ ei hloi noh Yang ‘Bă đĕch chĕp dĭng truh tơ năr tôch. Lu linh jang ‘lơ̆ng bơih mă jang kơ ‘Bok Kei-Dei ră, mă-lei lu sư kư̆m ưh kơ băt jơ năr noh layơ wă pơtơm. Kră Yang Yêsu bơih ră, mă-lei kơplah akâu Sư oei akâu kon bơngai,Sư kư̆m pơyom tơdrong ‘Bă Sư ‘Bok Kei-Dei Tơ’ngla pơgơ̆r gah jơ năr Sư wă jur dơ̆ng noh.
Kră Yang yua rup kơplah jơhnơr Nôê wă tơ’bôh rơđah tơdrong Sư jur dơ̆ng, noh jơhnơr kon bơngai hơtai ‘nei sơ̆ kuă kơ lui kơ ‘Bok Kei-Dei, mă khan đei ră ‘Bok Nôê đĭ jơhngơ̆m bơtho tơbăt wă kơ lu sư jah lui, dah ưh kơ lui lei kơnh răm ‘Bok Kei-Dei phak (II Pêtrôs 2:5), mă-lei lu sư oei sơngah kuă kơ lui ‘mơ̆i, dĭng mă đak tih truh lơ̆p lê̆ lu sư răm đĭ-đăng. Lăm jơhnơr tuch luch âu kư̆m lei- lăi, kư̆m gô đei lơ bơngai kuă kơ lui, păng arăng kơ̆l. Hla bơar II Timôthê 4:3, khan thoi âu: “Ning-mônh đei lơ bơngai ưh pă wă mơ̆ng tơdrong ‘Bok Kei-Dei. Đe wă kiơ̆ gah tơdrong kư̆ kă sư kơdih đĕch, na lu sư chă bơngai bơtho sư kiơ̆ kơ sư wă mơ̆ng đĕch, ưh pă kiơ̆ tơdrong ‘Bok Kei-Dei dơ̆ng.” Păng kơplah Kră Yang Yêsu jur dơ̆ng, gô đei lu bơngai ayơ ei Kră Yang pôk atŏk lu sư tơ pơlei ‘lơ̆ng, đei lu mơ’nah, Kră Yang achăng lê̆ ‘bơ̆t doh. Nơ̆r lăm Mathiơ 24:42 khan: “Thoi noh na iĕm athei kơchăng bĕ, yua kơ iĕm ưh kơ băt layơ Inh mă Kră Yang iĕm wă jur dơ̆ng.”
Jơhngơ̆m kon bơngai bơ̆n, bơ̆n ngăl wă dêh băt mă hơđăl kơ jơ năr Kră Yang Yêsu jur ‘nei hloi. Kư̆m đei bơih lơ bơngai jô̆ năr, jô̆ khei sơnăm thoi âu thoi to na tơbăt hloi năr ‘nâu, ‘năr noh hloi Kră Yang jur dơ̆ng, mă-lei ưh kơ ‘blep ôh; na dôm lu bơngai mă tơbăt năr Kră Yang jur noh jing lu sư mơlâu, hlơ̆l kơ đe yua kơ lu tơbăt năr Kră Yang jur, tơbăt ưh kơ trŏ noh. Mă khan lei ră, lăng kiơ̆ đơ̆ng Nơ̆r Kră Yang, bơ̆n băt hơđăl dêh Nơ̆r Kră Yang khan ưh kơ đei bu băt trŏ, kiăp hloi jơ năr Kră Yang jur dơ̆ng, yua kơ jơ năr Kră Yang Yêsu jur noh ‘Bok Kei-Dei đĕch wei pơgơ̆r. Tơdrong ‘nâu hei, tơgŭm bơ̆n huay kơ put lŭ lui kơ lu bơngai pơhlŭ pơplung wă kơ bơ̆n lui kiơ̆ tơdrong lu sư lui noh, kư̆m tơgŭm bơ̆n huay kơ put kơ bơngai mă bơtho hơlĕnh khan Kră Yang Yêsu jur ‘bơ̆t năr âu năr ‘noh noh. Kră Yang wă kơ bơ̆n ling-lang kơchăng, pre hơmet lê̆ tơdrong arih bơ̆n rim năr đơ̆ng dang ei hloi, ưh kơ gô ding truh jơ năr hơtuch ei ‘mơ̆i na tơbral ôh. Bơ̆n kăl kơ kơchăng kơplah bơ̆n lăng ‘bôh kon pơlei pơla tơring tơrang tăp dăr kơ bơ̆n dang ei, lu sư glơ̆k lăm tơdrong yoch, lu sư đom lăm tơdrong chơt hiôk ala teh, lu sư glơ̆k lăm tơdrong hơmui tơdrô hơ̆t.v.v… lu sư druh kiơ̆ lu bơngai tơchĕng kiơ̆ kơdih arih ưh kơ đei đon‘lơ̆ng pă băt kơ nơ̆r tơtă, pă băt kơ tơdrong juăt kon bơngai lăng‘lơ̆ng trŏ noh, dôm tơdrong noh pơm kơ kon bơngai hưch ‘maih dêh, ưh pă chu pơđêng đon mơ̆ng Nơ̆r Kră Yang tơbăt athei ‘nĕ kơ pơm kơnê̆ kơnh răm. Đĭ-đăng dôm lu tơdrong tơdra đei thoi âu thoi ‘noh hei, bơ̆n athei kơchăng păng krao khan mă dêh yua kơ băt kơ Kră Yang Yêsu bơ̆n wă jê̆ jur bơih. Ưh kơ trŏ kơ bơ̆n nŏng tơchĕng hiơ̆k wă kơ băt jơ năr ayơ Kră Yang jur dơ̆ng noh ôh, mă-lei bơ̆n athei tơchĕng hiơ̆k kơ tơdrong arih bơ̆n kơdih thoi yơ wă kơ năr Kră Yang jur dơ̆ng kơnh,Sư sơng iŏk bơ̆n,bơ̆n hiôk chơt oei hơdai hăm Sư,huay kơ tŭr kơtơh ơh nhơ̆m hơdrôi hơdrai đĭ klui kơ jơ bơih noh. Kơplah chang gô Kră Yang jur dơ̆ng, bơ̆n kư̆m athei adrin bơtho ră roi Tơdrong ‘Nao ‘Lơ̆ng wă kơ lơ lơ bơngai gơh klaih đơ̆ng yoch đei tơdrong arih ling-lang.
Ơ Kră Yang Yêsu, Apinh Ih tơgŭm inh ling-lang kral kơchăng răp gô năr Ih jur dơ̆ng, păng tơgŭm chăl arih inh jing bơngai bơtho tơbăt kơ lu bơngai tăp dăr kơ inh wă kơ lu sư ‘brĕng hơđơ̆r băt kơ lu sư yoch na lu sư kư̆m tơbral, lui sơng iŏk Ih adrol kơ năr Ih jur na huay kơ klui kơ jơ năr, inh krao khan yua Anăn Kră Yang Yêsu Krist, Amen!
Bơ̆n hăm tơchĕng hiơ̆k chơchă wă kơ băt jơ năr Kră Yang jur dơ̆ng noh ưh? Yua kơ kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Esơra 5.
Kênh Youtube BHKTHN:
