Mathais 24:36-42
Nqe cim:
“Tiamsis hnub ntawd thiab lub sijhawm ntawd tsis muaj leejtwg paub, txawm yog cov timtswv ceebtsheej lossis Neeg Leej Tub los yeej tsis paub li; tsuas yog Leej Txiv tib leeg thiaj paub xwb” (Mathais 24:36)
Lus nug xav:
– Tswv Yexus qhia paub dabtsi txog lub sijhawm Nws rov los?
– Tswv Yexus muab tiam neeg uas Nws rov los piv rau tiam neeg twg?
– Peb tabtom npaj dabtsi tos Tswv Yexus rov los?
Nyob rau hauv Mathais tshooj 24, Tswv Yexus tau hais ntau yam cim txog Nws kev yuav rov qab los, tiamsis muaj ib yam uas hais mus hais los yog lub sijhawm tseeb tseeb uas tus Tswv rov los yog nyob ntawm Vaj Leej Txiv kev tswj mus txog thaum kawg. Cov tim Tswv uas teev tiam Vajtswv los yeej tsis paub lub sijhawm ntawd yuav pib thaum twg. Txawm kiag Tswv Yexus thaum Nws tseem hnav cev nqaij daim tawv Nws yeej hwm Leej Txiv thiab cia rau Leej Txiv teem lub sijhawm uas Nws rov qab los ntawd.
Tswv Yexus siv tus duab tiam Nau-es nyob los piv rau Tswv Yexus kev rov qab los. Ntawd yog tiam uas tsis ntseeg, txawm tau Nau-es ceebtoom kawg siab kawg ntsws ntau zaus lawm (2 Petus 2:5) tiamsis lawv tsis txais yuav, mus txog thaum uas dej los nyab sawvdaws tas huv tibsi. Tiam kawg no los kuj zoo ib yam li ntawd kuj yuav muaj neeg tsis ntseeg thiab lub siab tawv qhawv: “Rau qhov tshuav tsis ntev yuav tsis muaj neeg xav mloog Vajtswv Txojlus lawm. Lawv yuav ua raws li lawv lub siab nyiam xwb, thiab lawv yuav mus nrhiav ntau tus xibhwb los qhia tej zaj uas sawvdaws nyiam mloog” (2 Timautes 4:3), thiab thaum Tswv Yexus rov qab los yuav muaj coob tug tau nrog Nws mus thiab yuav tseg coob tug cia. Yog li ntawd “Nej yuav tsum ceevfaj zov tos, rau qhov nej tsis paub lub sijhawm uas nej tus Tswv yuav los” (nqe 42).
Raws li neeg tus yam ntxwv uas xav xav paub, peb xav paub meej lub sijhawm twg Tswv Yexus rov qab los. Ntau tus tau xam sijhawm thiab tshaj tawm hnub uas tus Tswv rov qab los, tiamsis txhua tus ntawd puavleej raug txajmuag. Tiamsis yog saib raws Vajtswv Txojlus peb yeej paub meej hais tias yeej tsis muaj leejtwg muaj peevxwm paub tseeb lub sijhawm hnub twg tus Tswv rov los, vim ntawd nyob ntawm Vajtswv ua tus txiav txim siab xwb. Qhov no kuj pab tau peb tsis yoojyim rau dag ntxias ntawm cov kev ntseeg cuav, cov xibhwb cuav uas tshaj qhia txog sijhawm hnub uas Tswv Yexus rov qab los. Tus Tswv xav kom peb ceevfaj, npaj peb lub neej txhua hnub, tsis yog pheej tos txog hnub kawg mam tso kev txhaum. Peb ceevfaj thaum tig saib lub tebchaws ib ncig ntawm yus, tibneeg tsaus tsawv lawv tus kheej rau kev txhaum, kev lomzem, quav yeeb, quav cawv, quav tshuaj, thiab xav fab ntshaw ua nkauj nraug, tej no ua rau coob tus qaug thiab tsis xav mloog txojkev ceebtoom ntawm Vajtswv Txojlus lawm. Ua ntej tej ntawd yuav tshwm los, peb yuav tsum ceevfaj thiab nquag thov Vajtswv pab vim paub tseeb hais tias yuav txog lub sijhawm uas Tswv Yexus yuav rov qab los. Tsis txhob mus nrhiav paub lub sijhawm hnub twg tus Tswv rov los tiamsis cia li tig los npaj peb lub neej tos Nws rov los kom peb thiaj tsis khuvxim, ntaus hauv siab quaj nyiav li cov tsis ntseeg. Thiab thaum peb tseem nyob tos tus Tswv rov los, peb yuav tsum siv zog qhia Txojmoo Zoo kom muaj coob leej tau txais kev cawmdim.
Thov Vajtswv,
Tswv Yexus, thov pab nyuam yaus ceevfaj txhua lub sijhawm npaj tos Koj rov los. Thiab thov pab nyuam yaus ua tim khawv qhia coob leej tig los cuag Koj tso kev txhaum tseg kom tau txais kev cawmdim hnub Koj rov qab los. Nyuam yaus tuav Tswv Yexus Khetos lub npe thov, Amees.
Puas nrhiav kom paub lub sijhawm hnub tus Tswv rov qab los? Vim li cas?
Nyeem Vajluskub hauv peb lub xyoos: Exalas 5
Kênh Youtube BHKTHN:
