Klei Aê Diê Blŭ: Y-Yôsuê 4:19 – 5:1
Êlan kliăng: “Čiăng kơ jih jang phung găp djuê mnuih ti lăn ala dưi thâo kơ kngan Yêhôwa jing myang,…” (Y-Yôsuê 4:24a)
Klei êmuh ksiêm mĭn: Hruê phung ƀuôn sang Aê Diê kbiă mơ̆ng êa krông Yurdan ngă kơ diñu hdơr ya klei mâo hlăm ênuk êlâo? Ya klei Y-Yôsuê mtă kơ phung ƀuôn sang Israel mtô kơ anak čô? Ya klei kñăm mơ̆ng klei myang găn êa krông Yurdan? Ya drei ngă tơdah thâo klei myang leh anăn klei bi mtlaih Aê Diê?
Hruê tal pluh mlan tal sa hlue si hruê Yuđa, phung ƀuôn sang Aê Diê kbiă mơ̆ng êa krông Yurdan, jing hlăm brô mlan 3 truh mlan 4. Hruê mlan klă klơ̆ng anei amâo djŏ jing sa hruê mlan amâo ruah hlăm hƀuê ênuk ôh ƀiădah jing hruê Aê Diê ruah čiăng kơ hdră kčah Ñu dưi truh. Snăn, sa blư̆ dơ̆ng brei ƀuh hlăm klei găn êa krông Yurdan jing klei myang Aê Diê. Hruê anei djŏ hŏng hruê hlăk đưm Aê Diê mtô kơ phung ƀuôn sang Aê Diê ruah êđai biăp kơ Knăm Klei Găn tal êlâo (Klei Kbiă 12:3). Klei anei brei ƀuh Knăm Klei Găn tal êlâo, êlâo kơ kbiă mơ̆ng Êjip, leh mŭt hlăm Lăn Aê Diê Ƀuăn (Y-Yôsuê 5:10), hŏng klei djŏ tuôm kơ klei myang găn Êa Ksĭ Hrah, leh anăn klei myang găn êa krông Yurdan mâo klei bi mguôp kjăp snăk (êlan 23). Hlăk êjai dôk ti Êjip, phung ƀuôn sang Israel jing hlŭn, bi ară anei diñu dơ̆ng ngă khua Lăn Aê Diê Ƀuăn, Yêhôwa Aê Diê diñu, Pô ba leh diñu kbiă mơ̆ng Êjip ăt jing pô atăt leh diñu ti Lăn Aê Diê Ƀuăn. Djăp klei mâo dôk hlăm klei Ñu kiă kriê. Klă sĭt Aê Diê bŏ hŏng klei myang leh anăn sĭt suôr.
Hlăk kbiă đĭ mơ̆ng êa krông, phung ƀuôn sang Israel đăm ti Gilgal, ti nah ngŏ ƀuôn Yêrikô. Y-Yôsuê mdơ̆ng pluh dua boh tâo mă ti krah êa krông Yurdan čiăng bi knăl kơ klei myang Aê Diê ngă leh kơ phung ƀuôn sang Ñu ti Yurdan. Tơdah anak čô diñu ƀuh dŭm klŏ boh tâo anei leh anăn êmuh kơ klei mblang snăn diñu srăng thâo Yêhôwa Aê Diê diñu ngă kơ êa krông Yurdan khuôt thu ti anăp phung ƀuôn sang Aê Diê, msĕ si Ñu ngă leh ti anăp Êa Ksĭ Hrah, truh kơ leh diñu găn. Klei myang ti Êa Ksĭ Hrah leh anăn klei myang ti êa krông Yurdan jing klei bi knăl kơ jih jang djuê ana ti lăn ala thâo Aê Diê bŏ hŏng klei ktang, klei myang, leh anăn ăt srăng ngă kơ phung ƀuôn sang Israel huĭ mpŭ kơ Ñu nanao.
Phung ƀuôn sang ti lăn ala srăng amâo thâo ôh kơ klei myang leh anăn klei dưi Aê Diê tơdah amâo mâo hlei pô hưn kơ digơ̆ thâo (Rôm 10:17). Hlăk êjai H’Rahap hmư̆ kơ klei dưi leh anăn klei Myang Aê Diê snăn ñu đăo kơ Aê Diê, ñu bi mklă: “Yêhôwa Aê Diê diih jing Aê Diê Pô dôk hlăm adiê ti dlông leh anăn ti lăn ala ti gŭ” (Y-Yôsuê 2:11). Jing phung thâo leh klei myang leh anăn klei bi mtlaih Aê Diê, êlâo hĭn brei drei hưn hŏng anak čô pô kơ bruă Aê Diê ngă leh kơ pô. Mbĭt anăn ăt brei hưn Anăn Khua Yang kơ pô mkăn čiăng kơ “jih jang phung găp djuê mnuih ti lăn ala dưi thâo kơ kngan Yêhôwa jing myang; čiăng kơ diih huĭ mpŭ kơ Yêhôwa Aê Diê diih nanao hlŏng lar” (êlan 24), kyua anăn jing klei Aê Diê čiăng tơdah ngă klei dưi, klei myang ti krah phung ƀuôn sang Ñu.
Drei lač leh kơ hlei pô thâo kơ klei prŏng myang Khua Yang Yêsu ngă leh kơ pô?
Wah lač: Ơ Aê Diê, akâo kơ Ih đru kâo đăm wơr ôh klei prŏng prĭn Aê Diê ngă leh kơ kâo. Akâo kơ Ih đru kâo sĭt suôr hưn Ih kơ phung riêng gah kâo čiăng diñu ăt thâo kơ klei bi mtlaih leh anăn klei jăk Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
