Jôsuê 4:19 – 5:1
“Kră Yang pơm thoi noh wă kơ đĭ-đăng adrĕch adrung lăm ala teh, băt kơ Kră Yang mơsêh pran kơtang,…” (Jôsuê 4:24a)
Nơ̆r jet tơchĕng pơwao:
– Năr kon pơlei Kră Yang tŏk hlôi kơ krong Jôrđăn pơm kơ lu sư’blŏk đêl tơdrong kiơ tơrŏng ki?
– ‘Bok Jôsuê bơtho kon pơlei roi ăn kơ lu kon sâu sư tơdrong kiơ?
– Kră Yang pơm tơdrong mơsêh hlĭch noh wă pơm kiơ?
– Lu bơ̆n pơm kiơ kơplah bơ̆n ‘bôh mơn tơdrong mơsêh Kră Yang pơklaih bơ̆n?
‘Năr mơjĭt khei minh kiơ̆ kơ lu bơngai Juđê jô̆ khei năr noh, lu kon pơlei tŏk hlôi đơ̆ng krong Jôrđăn, noh dang khei 3 truh tơ khei 4 Viêt Nam bơ̆n.
Roi khei ‘năr hơđăl hloi thoi ‘nâu, ưh kơ trŏ kơ khei ‘năr lăm chăl arih ‘nâu mă khei ‘năr ayơ ayơ bưh ôh, tơdrong roi hơđăl khei 3 truh tơ khei 4 ‘nâu hei ‘noh năr Kră Yang rơih ‘mơ̆i wă kơ tơdrong tơdă đêl Sư dan hơmet noh Sư jang pơkeh. Thoi noh, minh ‘măng dơ̆ng tơ’bôh ăn kơ bơ̆n băt tôm tơdrong đei lăm tơdrong lu kon pơlei Juđê tŏk đak krong noh tă kơ đei mơsêh hlĭch đơ̆ng Kră Yang ngăl.. Năr ‘noh hei ‘blep hăm năr sơ̆ ki sơ̆ kach Kră Yang athei kon pơlei Sư chă rơih triu wă pơm Phĕt Năm Brih blŭng a (LĐ Êyiptơ 12:3). Tơdrong ’nâu tơ’bôh kơ bơ̆n Phĕt Năm Brih blŭng adrol kơ lu sư lĕch đơ̆ng dêh Êyiptơ păng tơ’bôh kơ bơ̆n Phĕt Năm Brih đơ̆ng rŏng kơ lu sư mơ̆t tơ dêh char Kră Yang pơkă (Jôsuê 5:10), păng tơ’bôh kơ bơ̆n dôm lu tơdrong mă đei bơih ‘bơm kơ tơ tơdrong mơsêh hlĭch ‘bơ̆t lu sư tŏk Đak dơsĭ ’Brê, păng tơdrong mơsêh ‘bơ̆t lu sư tŏk đak krong Jôrđăn, đi-đăng tơdrong ‘noh hei tă kơ ‘bơm băl ngăl (trong 23). Kơplah kon pơlei Isơrael oei tơ dêh Isơrael, lu sư pơm đĭch, na jơ ‘nâu lu sư wă jê̆ pơm tơ’ngla Dêh char Kră Yang Pơkă noh. Kră Yang ’Bok Kei-Dei lu sư noh Tơ’ngla hlôi chông lu sư lĕch đơ̆ng Dêh Êyiptơ, Sư noh kư̆m Tơ’ngla chông lu bơngai Isơrael mơ̆t tơ Dêh char Sư Pơkă. Đĭ dôm tơdrong đei truh noh tă kơ lăm tơdrong Sư pơgơ̆r ngăl. Tơpă Kră Yang’Bok Kei-Dei Sư mơsêh tih dêh, Sư kư̆m Tơ’ngla pơkă sĭt.
Lăp kon pơlei Isơrael tŏk hlôi kơ đak krong, lu sư pơdơ̆ng bơsŭn tơ Gil Gal, tơ gah hơlĕch kơ pơlei Jêrikô. ’Bok Jôsuê pơdơ̆ng mơjĭt ’bar tŏ tơmo tih đêl lu sư iŏk đơ̆ng lăm tŏk-bŏk đak krong Jôrđăn wă ’blŏk hơdơ̆r kơ tơdrong mơsêh hlĭch Kră Yang pơm ăn kơ lu sư tơ đak krong Jôrđăn.
Mưh kon sâu lu sư lăng’bôh lu tơmo tih ‘nâu hei na jet ‘noh wă khan kiơ lei lu sư roi ăn kơ lu kon sâu sư noh băt kơ Kră Yang ’Bok Kei-Dei Kră Yang lu sư hlôi pơm kơ đak krong hrơ̆ hrĕng’bơ̆t anăp kon pơlei Sư; Sư hlôi pơm kơ Đak Dơsĭ ‘Brê hrơ̆ hrĕng ’bơ̆t anăp đe ’bok yă lu sư sơ̆, ’bok yă lu sư năm kơpal teh hrĕng noh ding hlôi kơ krong noh hloi. Tơdrong mơsêh hlĭch tơ Đak Dơsĭ ’Brê păng tơdrong mơsêh hlĭch tơ đak krong Jôrđăn noh tơdra tơ’bôh ăn kơ đĭ-đăng adrĕch kon bơngai tơ ala teh âu băt kơ ‘Bok Kei-Dei pran kơtang, mơsêh mơyang ưh kơ tôch păng kư̆m pơm kơ kon pơlei Isơrael hli yom kơ Sư ling-lang khŏm khŏm.
Lu adrĕch adrung lăm ala teh âu gô ưh kơ băt ôh tơdrong mơsêh mơyang hlĭch chrơp ’Bok Kei-Dei pơm noh tơdah ưh kơ đei bu roi ăn kơ lu sư (Rôm 10:17). Lăp yă Rahap kơtơ̆ng tơdrong mơsêh mơyang hlĭch chrơp Kră Yang pơm, na sư lui kơ Kră Yang hloi, sư khan thoi âu: “Lu nhôn kư̆m hlôi băt tơdrong noh, jơhngơ̆m hli mah hach hiong thoi đak ro, ưh kơ đei bu lăm lu nhôn wă nuih blah lu iĕm dơ̆ng, yua kơ Kră Yang ‘Bok Kei-Dei lu iĕm boih Kră Yang ‘Bok Kei-Dei tih hloh, mă oei tơ kơpal plĕnh ti păng ala teh âu” (Jôsuê 2:11). Bơ̆n bơngai mă hlôi mơn KrăYang dŏng pơklaih, mơn Sư pơm tơdrong mơsêh hlĭch lăm bơ̆n bơih, adrol hloh bơ̆n athei roi ăn kơ kon sâu bơ̆n gah tơdrong Kră Yang pơm ăn kơ bơ̆n noh. Kơplah wah ’noh mơ̆n, bơ̆n kư̆m roi ăn kơ lu bơngai jih ’ma dơ̆ng, wă kơ “đĭ-đăng adrĕch adrung lăm ala teh, băt kơ Kră Yang mơsêh pran kơtang,…” (Jôsuê 4:24 b), Kră Yang pơm tơdrong mơsêh hlĭch tơ lăm lu bơ̆n kon pơlei Sư noh yua kơ Sư wă kơ lu bơ̆n chă ră roi dơ̆ng kơ lu bơngai jih ’ma‘noh bơih.
Ơ Kră Yang, apinh Ih tơgŭm inh ling-lang ’blŏk huay kơ hiơt dôm lu tơdrong tih-tin, hlĭch chrơp mă Ih hlôi pơm ăn kơ inh. Apinh Ih tơgŭm inh đei jơhngơ̆m tơnăp chă ră roi tơdrong Ih kơ lu bơngai jih ’ma wă kơ lu sư kư̆m mơn đei Ih dŏng pơklaih, mơn đei pŭn hiôk đơ̆ng Ih mơnat,đơ̆ng Ih ăn. Inh krao khan yua Anăn Kră Yang Yêsu Krist, Amen!
Bơ̆n hlôi roi ăn kơ bu bơih lu tơdrong tih-tin hlĭch chrơp đơ̆ng Kră Yang Yêsu pơm ăn kơ bơ̆n?
Đŏk Sơ̆p Hla bơar’Bok Kei-Dei lăm pêng sơnăm: Esơra 2.
Kênh Youtube BHKTHN:
