Yausuas 4:19 – 5:1
Nqe cim:
“Vim muaj tej xwm no, tej neeg uas nyob thoob ntiajteb thiaj paub hais tias tus TSWV yog tus uas muaj hwjchim loj kawg nkaus,…” (Yausuas 4:24a)
Lus nug xav:
– Hnub uas Vajtswv haivneeg tawm ntawm tus Dej Yauladees mus ua rau lawv nco txog yam xwmtxheej dabtsi yav dhau los?
– Yausuas qhia cov Yixalayees yuav tsum hais dabtsi rau lawv cov xeeb leej xeeb ntxwv?
– Lub homphiaj ntawm zaj txujci tseemceeb hla dhau tus Dej Yauladees yog dabtsi?
– Peb yuav ua dabtsi thaum uas tau saj Vajtswv lub hwjchim thiab Nws txoj kev Cawmdim?
Hnub xiab kaum hli kaum ib raws li cov Yixalayees kev xam caijnyoog, Vajtswv haivneeg tawm dhau ntawm tus Dej Yauladees mus, yog kwv lam li lub hli 3 mus txog lub hli 4 (Dương lịch). Hnub sau tseg no tsis yog ib hnub uas sau tseg cia rau hauv keebkwm xwb tiamsis yog kiag hnub uas tus Tswv xaiv cia Nws txoj kev npaj tseg nthuav tawm. Yog li ntawd, ib zaug ntxiv qhia pom txhua yam xwm hla dhau tus Dej Yauladees puavleej yog Vajtswv tej txujci tseemceeb. Hnub no ncaj rau hnub thaud uas Vajtswv kom Nws haivneeg xaiv ib tug menyuam yaj rau rooj Kevcai Hla Dhau xubthawj (Khiavdim 12:3). Qhov no qhia pom hais tias rooj Kevcai Hla Dhau ua ntej tawm ntawm tebchaws Iziv mus rau tebchaws coglus tseg (Yausuas 5:10), nrog rau cov xwm tshwm ntsig txog tej txujci tseemceeb hla dhau Hiavtxwv Liab thiab tej txujci tseemceeb hla dhau tus Dej Yauladees puavleej sib ntsig txog ua ke (nqe 23). Thaum nyob tebchaws Iziv, cov Yixalayees ua qhev, tiamsis tamsim no lawv yuav tau ua tswv rau thaj av coglus tseg. Lawv tus Tswv uas yog Vajtswv, Tus coj lawv tawm hauv tebchaws Iziv los thiab kuj yog Tus uas yuav coj lawv mus rau tebchaws coglus. Txhua yam xwmtxheej puavleej nyob ntawm Vajtswv kev tswj. Tseeb tiag Vajtswv ncajncees thiab muaj hwjchim loj heev.
Thaum uas hla dhau tus Dej Yauladees, cov Yixalayees mus tsuam yeej rau ntawm Nkilenkas uas nyob ntawm lub nroog Yelikaus sab hnubtuaj. Yausuas muab kaum ob lub pobzeb uas lawv khaws hauv tus Dej Yaudalees los teeb ua ib pawg rau ntawm thaj chaw uas lawv so ntawd ua kev cim nco txog tej txujci tseemceeb uas tus Tswv tau ua rau Nws haivneeg ntawm tus dej Yauladees. Thaum lawv cov xeeb leej xeeb ntxwv saib pom cov pobzeb no thiab nug txog lub ntsiab ces yuav tsum qhia rau lawv paub tus Tswv uas yog lawv tus Vajtswv tau ua tus dej Yauladees qhuav tabmeeg Nws haivneeg, zoo ib yam li thaum Nws ua tom Hiavtxwv Liab, txog thaum uas lawv mus dhau tas lawm. Txujci tseemceeb tom Hiavtxwv Liab thiab Txujci tseemceeb ntawm Yauladees yog lub cim qhia rau txhua haivneeg hauv lub ntiajteb no paub hais tias Vajtswv yog tus uas muaj hwjchim loj kawg nkaus, thiab yuav ua rau cov Yixalayees hwm Vajtswv mus ibtxhis.
Txhua haivneeg hauv lub ntiajteb no yog tsis muaj leejtwg hais qhia rau lawv, lawv yeej tsis paub txog Vajtswv tej txujci tseemceeb thiab Nws lub hwjchim li (Loos 10:17). Thaum Lahaj hnov txog Vajtswv lub hwjchim thiab tej txujci tseemceeb ces nws ntseeg Vajtswv thiab hais meej hais tias: “Thaum peb hnov tej xwm no, peb txhawj thiab ntshai kawg li; peb txhua tus qaug zog tas vim tej uas nej ua ntawd. Tus TSWV uas yog nej tus Vajtswv yog tus uas kav saum ntuj thiab hauv ntiajteb no” (Yausuas 2:11). Peb yog cov uas twb tau saj Vajtswv lub hwjchim thiab Nws txojkev cawmdim lawd, ua ntej peb yuav tsum hais qhia rau peb cov xeeb leej xeeb ntxwv txog tej haujlwm uas Vajtswv tau ua rau yus lawm. Thiab tom qab ntawd yuav tsum hais qhia rau lwm tus paub kom “tej neeg uas nyob thoob ntiajteb thiaj paub hais tias tus TSWV yog tus uas muaj hwjchim loj kawg nkaus” (nqe 24), vim ntawd yog yam uas Nws xav tau thaum uas Nws siv Nws lub hwjchim thiab ua tej txujci tseemceeb hauv Nws haivneeg.
Thov Vajtswv,
Vajtswv, thov pab nyuam yaus tsis txhob hnov qab tej txujci tseemceeb loj uas Koj tau ua pab nyuam yaus. Thov pab nyuam yaus ncajncees ua timkhawv txog qhov ntawd rau coob leej ntau tus kom lawv kuj tau saj Koj txojkev cawmdim thiab tej koob hmoov li nyuam yaus tau. Nyuam yaus tuav Tswv Yexus Khetos lub npe thov, Amees.
Peb tau qhia rau leejtwg txog tej txujci tseemceeb uas Tswv Yexus tau ua rau yus lawd?
Nyeem Vajluskub hauv peb lub xyoos: Exalas 2
Kênh Youtube BHKTHN:
