Klei Aê Diê Blŭ: Y-Yôsuê 4:15-18
Êlan kliăng: “Ih dôk jŭm kâo, ti tluôn wăt ti anăp; leh anăn Ih dưm kngan Ih ti kâo” (Klei Mmuñ Hđăp 139:5)
Klei êmuh ksiêm mĭn: Ya klei Aê Diê mtă kơ Y-Yôsuê ngă? Hlăk Y-Yôsuê leh anăn phung ƀuôn sang Aê Diê hlue ngă, ya klei hriăm diñu mâo? Si klei hriăm anei đru drei tơdah tuôm hŏng bruă klam amâodah boh klei dleh dlan?
Leh jih jang phung ƀuôn sang Aê Diê găn êa krông snăn Aê Diê lač kơ Y-Yôsuê brei lač kơ phung khua ngă yang kkung Hip Klei Bi Mguôp kbiă mơ̆ng êa krông Yurdan. Ñu gưt asăp Aê Diê. Phung khua ngă yang kkung Hip Aê Diê mơ̆ng krah êa krông nao ti hang leh anăn tơdah jơ̆ng diñu truh ti lăn thu snăn êa krông Yurdan lŏ wĭt msĕ si hđăp leh anăn đoh dlai hang msĕ si êlâo kơ diñu găn.
Klei phung ƀuôn sang Aê Diê hŏng phung khua ngă yang kbiă mơ̆ng êa krông Yurdan ăt msĕ si klei mphŭn mâo hlăk trŭn hlăm êa krông Yurdan mâo hdruôm hră Y-Yôsuê čih leh klă nik, djŏ pruê̆ leh anăn djŏ hdră, msĕ si sa phim mdah kơ klei yăl dliê êmưt snăk. Klei kñăm jing čiăng mñă leh anăn brei ƀuh klă anei jing sa klei myang Aê Diê ngă kyua phung ƀuôn sang Ñu amâo djŏ jing sa klei mâo kyua yan adiê ngă msĕ si êa lip amâodah mgei lăn ôh. Jih jang bruă anei mâo jing kyua kngan klei myang Aê Diê kiă kriê, Pô kơ jih lăn ala, êa ksĭ gưt hlue si asăp Ñu kyua ñu jing Aê Diê kơ jih lăn ala (Y-Yôsuê 3:13). Tơdah amâo kyua klei myang Aê Diê snăn phung ƀuôn sang amâo čŏng dưi găn ôh êa krông Yurdan. Kyua gưt asăp Aê Diê, phung ƀuôn sang Israel amâo kdŭn tluôn kyua huĭ hyưt ôh leh ƀuh êa krông đoh êtăng, ƀiădah jhŏng hlue ngă grăp klei Ñu ktrâo lač kyua anăn diñu găn êa krông hlăk yan đoh êtăng dlai hang krông hŏng klei êđăp ênang. Aê Diê amâo djŏ knŏng nao êlâo kơ diñu hlăk mrâo trŭn hlăm êa krông hlue si klei atăt mơ̆ng Hip Klei Bi Mguôp ôh (Y-Yôsuê 3:14-15), ƀiădah Ñu lŏ nao ti tluôn čiăng răng mgang klei êđăp ênang kơ digơ̆. Hip Klei Bi Mguôp, bi knăl kơ klei Aê Diê kiă kriê, mjưh leh ti krah êa krông dôk guôn jih ƀuôn sang truh ti hang. Aê Diê răng mgang leh phung ƀuôn sang Ñu hŏng klei kluôm ênŭm ti nah anăp leh anăn nah tluôn.
Hruê anei, Aê Diê ăt răng mgang drei phă anăp leh anăn phă tluôn tơdah drei gưt asăp Khua Yang đăo kjăp nanao leh anăn êbat hlue si klei Ñu atăt gai čiăng găn djăp klei dleh dlan, lông dlăng drei ƀuh pô amâo dưi čŏng găn. Tơdah tuôm hŏng klei dleh dlan, lông dlăng, drei đăm huĭ hyưt ôh, kăn êdu ai rei. Brei ăt đăo knang kơ Aê Diê nanao, êbat kyua klei đăo. Aê Diê amâo ngă kơ phung Israel luč čang hmăng guôn ƀuh klei myang Ñu ngă leh kơ digơ̆, Ñu ăt kăn srăng ngă kơ drei luč klei čang hmăng mơh. Aê Diê ƀuăn Ñu srăng dôk mbĭt hŏng drei hlăm djăp boh klei leh anăn Ñu srăng lŏ dơ̆ng ngă klei prŏng myang hlăm klei hdĭp drei tơdah drei kjăp ai tiê đăo knang leh anăn gưt asăp Ñu.
Mơ̆ng ya klei drei dưi đăo knang gưt asăp Khua Yang čiăng kjăp knhuang hlăm djăp boh klei?
Wah lač: Ơ Khua Yang, kâo bi mni kơ Ih kơ klei Ih kiă kriê phung ƀuôn sang Ih hlăk đưm. Akâo kơ Ih đru kâo đăo knang gưt asăp Ih nanao leh anăn amâo huĭ hyưt ôh tơdah thâo Ih dôk mbĭt nanao hŏng kâo hlăm djăp boh klei, djăp klei dleh dlan hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
