Jôsuê 4:15-18
“Ih wei inh gah rŏng gah anăp. Dan ti Ih kơpal inh.” (Hơriso 139:5)
Nơ̆r jet tơchĕng pơwao:
– Kră Yang khan kơ ‘bok Jôsuê athei pơm kiơ?
– Kơplah ‘bok Jôsuê păng kon pơlei pơm kiơ̆ Kră Yang, lu sư ‘bôh đei tơdrong kiơ?
– ‘Bai pơhrăm ‘nâu tơgŭm bơ̆n thoi yơ kơplah tơ’bơ̆p tơdrong jang dah mă tơdrong arih pơmat tat ayơ?
Đơ̆ng rŏng kơ đĭ đăng kon pơlei Kră Yang tŏk hlôi kơ đak krong bơih na Kră Yang ‘Bok Kei-Dei khan kơ ‘bok Jôsuê athei sư khan kơ ‘bok soi tung Hom Pơgơ̆p Kră Yang tŏk đơ̆ng đak krong Jôrđăn. Sư chu nơ̆r Kră Yang. Lu ‘bok soi tung Hom Pơgơ̆p Kră Yang tŏk hlôi kơ đak krong Jôrđăn păng lu sư hiŏng jơ̆ng ‘nao wă juă tơ kông anih hrĕng na đak krong Jôrđăn ‘blip tơ’bưh dang đêl, ro ‘bĕnh thoi so.
Tơdrong kon pơlei Kră Yang hăm ‘bok soi yak hlôi kơ đak krong Jôrđăn kư̆m thoi lu sư pơtơm kơplah jur yak tơ đak krong Jôrđăn mă hla bơar Jôsuê đei chih roi tôm tơdrong păng roi pơdeh, hơrĭ hơrĭ păng ‘blep trŏ, nhen thoi Phim hơ’mon đe pơdah hiơ̆. Kơnhăm wă tơbăt ăn păng ‘bôh hơđăl ‘nâu jơ̆ tơdrong mơsêh mơyang Kră Yang pơm yua kơ kon pơlei Sư, ưh kơ trŏ kơ minh tơdrong đei truh lăm teh đak thoi kơ ‘mi tih dah teh adrŏ. Đĭ đăng dôm tơdrong ‘nâu đei truh tă kơ đơ̆ng tơpang ti mơsêh Kră Yang ‘Bok Kei-Dei pơgơ̆r, Tơ’ngla mă tôm tơdrong đơ̆ng Sư pơjing athei chu kiơ̆ kơ Sư akhan, yua kơ Sư Kră Yang pơgơ̆r plĕnh teh (Jôsuê 3:13). Tơdah ưh kơ đơ̆ng tơdrong mơsêh Kră Yang lei kon pơlei ưh kơ gơh tŏk kơdih hlôi kơ đak krong Jôrđăn ôh. Đơ̆ng chu yom nơ̆r Kră Yang, kon pơlei Isơrael ưh kơ đei kơdŭn tơ rŏng yua kơ hli tơrơ kơplah lăng ‘bôh đak krong Jôrđăn tih dêh. Đak ro jăng, mălei pơ̆n nuih pơm kiơ̆ dôm tơdrong đơ̆ng Kră Yang bơtho tơ’bôh ăn na lu sư yak hlôi kơ đak krong oei bơyan đak tih tŏk ‘bĕnh blai lah lai bơnơ̆ mălei hiôk hian ưh kơ đei kiơ. Kră Yang ưh kơ sĭ năm hơdrol kơ lu sư kơplah ‘nao jur yak kơ đak krong kiơ̆ tơdrong chông anhăk đơ̆ng Hom Pơgơ̆p Kră Yang đĕch ôh. (Jôsuê 3:14-15), mă Sư kư̆m oei năm đơ̆ng rŏng wă bơwei lu sư hơđơ̆ng hiôk. Hom Pơgơ̆p Kră Yang wă pơtih gia kơ Kră Yang oei hơdai, dơ̆ng tŏk bŏk đak krong gô ding truh đĭ kon pơlei yak hlôi kơ đak krong. Kră Yang ‘Bok Kei-Dei wei lăng kon pơlei Sư tôm mah đơ̆ng gah anăp truh tơ gah rŏng.
Ahrei âu, Kră Yang kư̆m wei lăng bơ̆n đơ̆ng gah anăp truh tơ gah rŏng kơplah bơ̆n chu nơ̆r Kră Yang adrin lui kơjăp păng yak tơ anăp kiơ̆ tơdrong chông anhăk đơ̆ng Sư wă kơ năm hlôi đơ̆ng dôm tơdrong pơmat tat, tơdrong pơlong lăng ayơ mă bơ̆n ‘bôh kơdih bơ̆n ưh kơ kĕ kơ hlôi. Kơplah tơ’bơ̆p dôm tơdrong anat anot, tơdrong pơlong lăng, bơ̆n ‘nĕ kơ hli tơrơ, bơ̆l hăl. Athei adrin khŏm khŏm, lui gơnang kơ Kră Yang, yak năm hăm đon lui. Kră Yang ‘Bok Kei-Dei ưh kơ đei pơm kơ lu bơngai Isơrael pă hơmĕng chang gô wă đei lăng ‘bôh dôm tơdrong tih hlĭch Kră Yang pơm kơ lu sư tơdrong mă lu sư ‘noh ôh sư pơkeh ăn tơdrong lu bơngai Isơrael hơmĕng ‘noh. Kră Yang kư̆m ưh kơ đei pơm kơ bơ̆n pă hơmĕng. Kră Yang pơkă Sư ling lang oei hơdai bơ̆n lăm tôm tơdrong păng Sư kư̆m gô pơm dôm tơdrong tih hlĭch lăm chal arih bơ̆n dah bơ̆n đĭ jơhngơ̆m lui gơnang kơ Sư păng chu nơ̆r Sư.
Ơ Kră Yang, inh bơnê kơ Ih gah tơdrong Ih wei lăng kon pơlei Ih chăl adrol sơ̆. Apinh Ih ăn kơ inh oei lui gơnang chu nơ̆r Ih ling lang păng huay kơ hli tơrơ kơ tơdrong kiơ kơplah băt kơ Ih ling lang oei hơdai inh lăm tôm tơdrong anat anot lăm chăl arih. Krao khan yua anăn Kră Yang Yêsu Krist, Amen.
Đơ̆ng yơ bơ̆n gơh lui gơnang chu nơ̆r Kră Yang wă yak tơ anăp lăm tôm tơdrong?
Đŏk Sơ̆p hla bơar ‘Bok Kei-Dei lăm pêng sơnăm: Esơra 1
Kênh Youtube BHKTHN:
