Yausuas 4:15-18
Nqe cim:
“Koj nyob puagncig kuv, koj lub tshwjchim tiv thaiv kuv” (Ntawv Nkauj 139:5)
Lus nug xav:
– Tus Tswv samhwm rau Yausuas ua dabtsi?
– Thaum Yausuas thiab Vajtswv haivneeg ua raws, lawv saj tau yam dabtsi?
– Zaj kawm no pab tau peb li cas thaum ntsib kev nyuaj hauv lub luag haujlwm lossis hauv ib lub tsamthawj txomnyem twg?
Tom qab uas tagnrho Vajtswv haivneeg puavleej hla dhau tus Dej Yauladees lawm ces Vajtswv hais rau Yausuas hais tias cia li hais kom cov povthawj kwv lub Phijxab tawm ntawm tus dej Yauladees. Yausuas mloog Vajtswv lus, nws thiaj kom cov povthawj kwv Vajtswv lub Phijxab ntawm plawv dej los thiab thaum lawv kotaw tsuj kiag ntawm cov av qhuav lawm ces tus dej Yauladees rov ntws los zoo li qub thiab dej ntws los puv nkaus zoo ib yam li thaum uas lawv tseem tsis tau hla.
Qhov xwmtxheej uas tus Tswv nrog cov Povthawj rhais ruam tawm hauv tus dej Yauladees thiab qhov xwmtxheej xubthawj uas tus Tswv nrog lawv rhais ruam mus rau hauv tus dej Yauladees tau phau ntawv Yausuas muab sau txhij txhua thiab maj mam piav tawm txhua yam ua ntu zus, meej tseeb kawg nkaus, zoo ib yam li ib zaj duab yeeg uas maj mam muab tso saib ua ntu zus. Lub homphiaj yog cia kom hais meej thiab pom tseeb ntawd yog ib qhov txujci tseemceeb uas tus Tswv ua vim Nws haivneeg, nws tsis yog ib yam xwm uas nyob nyob cia li tshwm muaj xws li nag xob nag cua, av qeeg. Tiamsis txhua tes haujlwm no tshwm los puavleej yog los ntawm Vajtswv tus muaj hwjchim txhais tes tswj rawv, tej huab cua toj roob hauv pes yuav tsum mloog Nws lus vim Nws yog tus Tswv ntawm tagnrho txhua yam hauv lub ntiajteb (Yausuas 3:13). Tsis vamkhom tej txujci tseemceeb ntawm tus Tswv ces Vajtswv haivneeg yeej tsis cim civ hla tau dhau tus Dej Yauladees li. Yog los ntawm qhov uas mloog Vajtswv lus cov Yixalayees thiaj tsis thim rov qab vim txoj kev ntshai thaum uas saib pom dej ntws ceev thiab muaj zog heev, tiamsis muaj lub siab tawv thiab ua raws txhua yam uas tus Tswv qhia lawv thiaj hla dhau tus Dej Yauladees thaum lub caij uas dej huam loj heev puv nkaus tim tej ntug mus tso siab lug. Tus Tswv tsis yog tsuas mus ua lawv ntej ntawm lub Phijxab kev coj xwb (Yausuas 3:14-15), tiamsis Nws tseem tuaj tom qab tiv thaiv ua kev tabpov rau lawv. Lub Phijxab, piv txog muaj Vajtswv nyob nrog, nres nyob rau hauv plawv dej tos txhua tus mus tawm tas sab tim ntug. Vajtswv tau tiv thaiv Nws haivneeg zoo kawg nkaus Nws nyob puagncig lawv.
Niaj hnub nim no Vajtswv kuj nyob puagncig tiv thaiv peb yog thaum peb mloog Nws lus, pheej ntseeg ruaj, mus raws li Nws kev coj, peb yuav hla tau dhau txhua lub tsamthawj txomnyem, txhua txoj kev sim siab uas peb tsis cim civ muaj peevxwm hla tau dhau. Thaum uas ntsib tej txomnyem, kev sim siab peb tsis txhob ntshai, tsis txhob hnyav siab. Cia li pheej ntseeg ruaj ntxiv rau ntawm tus Tswv, rhais ruam mus raws ntawm kev ntseeg. Vajtswv tsis ua rau cov Yixalayees poob siab rau tej uas lawv xav tau ntsia pom yam txujci tseemceeb uas Nws ua rau lawv, Nws los kuj yuav tsis ua rau peb poob siab. Vajtswv coglus Nws yuav nrog nraim peb hauv txhua lub tsamthawj thiab yog peb ntseeg ruaj thiab mloog Nws lus Nws yuav rov ua ntxiv ntau yam txujci tseemceeb hauv peb lub neej.
Thov Vajtswv,
Vajtswv, nyuam yaus ua Koj tsaug rau Koj txoj kev tiv thaiv Koj haivneeg hnub thaud. Thov pab nyuam yaus pheej ntseeg ruaj rau Koj thiab mloog Koj lus vim nyuam yaus paub hais tias muaj Koj nyob nrog nraim nyuam yaus hauv txhua lub tsamthawj. Nyuam yaus tuav Tswv Yexus Khetos lub npe thov, Amees.
Los ntawm qhov twg peb pheej ntseeg ruaj thiab mloog Nws lus hauv txhua lub tsamthawj?
Nyeem Vajluskub hauv peb lub xyoos: Exalas 1
Kênh Youtube BHKTHN:
