Yausuas 4:1-14
Nqe cim:
“ces nej yuav tsum qhia rau lawv hais tias, thaum ub cov povthawj kwv tus TSWV lub Phijxab los hla tus Dej Yaudalees, tus dej txawm teev tsis ntws. Cov pobzeb no yuav ua cim rau cov Yixalayees nco ntsoov txog tej xwm uas muaj rau ntawm thaj chaw no mus tas lawv simneej li” (Yausuas 4:7)
Lus nug xav:
– Tus Tswv samhwm rau Yausuas muab pobzeb ua dabtsi? Thiab lub homphiaj yog dabtsi?
– Vim li cas tus Tswv xav kom Nws haivneeg nco tes haujlwm no mus ibtxhis?
– Peb lub neej yuav zoo li cas yog peb tsis khaws cim nco tej haujlwm uas tus Tswv tau ua rau yus?
Tom qab uas tagnrho cov Yixalayees hla dhau tus dej Yauladees rau sab tim lawm, cov povthawj tseem sawv hauv plawv dej kwv rawv lub Phijxab saum xub pwg, ces tus Tswv samhwm kom Yausuas hais rau kaum ob leeg, uas sawv cev rau kaum ob xeem Yixalyees, khaws kaum ob lub pobzeb hauv plawv dej Yauladees, ntawm qhov chaw uas cov povthawj tabtom sawv thiab kwv cov pobzeb tawm los, tso rau qhov chaw uas lawv so hmo ntawd. Lub homphiaj kom cov pobzeb no dhau los ua ib lub cim rau hauv Vajtswv haivneeg, thaum twg saib pom ces Vajtswv haivneeg nco txog Vajtswv tau ua tus Dej Yauladees teev tsis ntws tabmeeg ntawm tus Tswv lub Phijxab, thiab cov pobzeb no yuav siv ua kev cim nco rau Vajtswv haivneeg mus ibtxhis (nqe 7). Nov kuj yog ib lub cim cia qhia kom lawv cov xeeb leej xeeb ntxwv nyob tiam tom qab paub txog tej haujlwm uas tus Tswv tau uas pab yus haivneeg. Vajtswv haivneeg yuav tsum tau nco txog tej txujci tseemceeb uas tus Tswv tau ua rau lawv, tsis yog ob peb hnub, ob peb xyoo xwb tiamsis yuav tsum nco mus ibtxhis. Vim li ntawd, feem xyuam qhia kom cov xeeb leej xeeb ntxwv paub txog tej haujlwm tus Tswv tau ua thiab paub nco Vajtswv txiaj ntsig yog tes haujlwm uas yuav tsum tau ua hauv txhua lub tsev neeg.
Tus Tswv haivneeg ua raws li tej lus uas Nws samhwm kom cim nco tej xwm txheej uas tau tshwm dhau los. Yausuas kuj muab dua kaum ob lub pobzeb teeb rau hauv plawv Dej Yaudalees ntawm qhov chaw uas cov povthawj kwv lub Phijxab sawv. Txog lub caij dej qhuav, luag yuav saib pom cov pob zeb no tawm nyob hauv plawv dej. Yog li ntawd, pawg pobzeb uas nyob hauv plawv dej ua kev cim nco txog qhov chaw uas tus Tswv tau ua txujci tseemceeb, hos pawg pobzeb tim ntug dej ua kev cim nco txog tej haujlwm uas tus Tswv tau ua rau Nws haivneeg.
Peb pheej yoojyim hnov qab tej haujlwm loj tseemceeb uas tus Tswv tau ua rau yus thiab tsev neeg lawm. Vim li ntawd, thaum nyob kaj siab, vammeej, tej thaum peb kev ntseeg yuav txias, tsis paub ua Vajtswv tsaug, tsis nco hais tias vim vamkhom tus Tswv yus thiaj li muaj txhua yam. Yog tsis khaws cim nco tej haujlwm uas tus Tswv tau ua rau yus lawd ces thaum ntsib kev txomnyem, peb yuav yoojyim ua xyem xyav, ntshai tsis kav rhais ruam taug txoj kev uas tus Tswv xav kom peb taug lossis ib tes haujlwm tshiab uas tus Tswv hu kom peb ua. Tus Tswv xav kom Nws haivneeg yuav tsum cim nco ibtxhis tej haujlwm loj tseemceeb uas Nws tau ua rau lawv lawm, thiab tus Tswv kuj xav kom peb yuav tsum cim nco ibtxhis tej haujlwm uas Nws tau ua rau peb, tus Tswv tau nyob nrog peb, thiab Nws lub hwjchim tau ua haujlwm rau peb lub neej. Thiab tsuas yog thaum peb cim nco Vajtswv txiaj ntsig, peb thiaj paub ua neej txawj nco tej kwvtij zejzog uas tau pab yus lawm txiaj ntsig.
Thov Vajtswv,
Vajtswv, thov pab nyuam yaus tsis txhob hnov qab tej koob hmoov uas Koj tau ua rau nyuam yaus lawm. Thov pab nyuam yaus ntseeg ruaj rau Koj txoj kev ncajncees thiab kev nyob nrog nraim nyuam yaus kom pheej ua lub neej haum Koj siab thiab ua yam uas Koj xav kom nyuam yaus ua. Nyuam yaus tuav Tswv Yexus Khetos lub npe thov, Amees.
Peb puas tabtom ua neej paub nco Vajtswv txiaj ntsig thiab cim nco tej uas Nws tau ua pab yus lawd?
Nyeem Vajluskub hauv peb lub xyoos: Ntawv Nkauj 106
Kênh Youtube BHKTHN:
