I Yauhas 4:1-3
Nqe cim:
“…Tiamsis txhua tus uas tsis lees hais tias Yexus los yug ua neeg, tus ntawd tsis muaj Vajtswv tus Ntsujplig.” (I Yauhas 4:3a)
Lus nug xav:
– Timthawj Yauhas ntuas cov ntseeg txog yam dabtsi?
– Yuav ua licas thiaj li zeem paub Vajtswv tus Ntsujplig?
– Yam dabtsi ua povthawj hais tias peb lees paub Tswv Yexus “los yug ua neeg”?
Vim yog “muaj cov xibhwb cuav ntau leej tawm mus qhia rau txhua qhov txhia chaw lawm”, yog li ntawd Timthawj Yauhas thiaj ntuas cov ntseeg hais tias “tsis txhob ntseeg txhua tus ntsuj plig” (HMOWSV), tabsis yuav tsum soj ntsuam seb tus ntsujplig twg yog tus los ntawm Vajtswv los (nqe 1). Timthawj Yauhas nthuav qhia ib qho tseeb uas tob heev: Kev tshwmsim thiab tes haujlwm ntawm Vaj Ntsujplig tau zeem paub dhau ntawm Nws tej lus ua timkhawv txog Tswv Yexus (nqe 2).
Vajtswv tus Ntsujplig niaj hnub pab sawvdaws lees paub hais tias Tswv Yexus tau los yug ua neeg, Nws yog Vajtswv tiag thiab yog neeg tiag, thiab Nws tibleeg thiaj yog tus Cawmseej xwb. Raws li Timthawj Yauhas, Txojmoo Zoo tau muab sau zog luv luv hais tias: “Txojlus ntawd tau los yug ua neeg, nws puv npo txojkev hlub, nws yog qhov tseeb thiab nws nrog peb nyob” (Yauhas 1:14). Vajtswv tus Ntsujplig “lees” hais tias zaj ntawd muaj tseeb (nqe 2). Thaum hais txog qhov uas Vaj Ntsujplig lees Tswv Yexus, Timthawj Yauhas xav qhia txog qhov uas tus Tswv los yug ua neeg, yog qhov qhia tshwm txog Vajtswv txojkev hlub tshua uas loj tshajplaws. Tus Tswv tsis nyob sab nraud peb lub neej tabsis Nws twb rhais ruam mus rau hauv lawm. Nws los ua neeg ris neeg tej kev txhaum, kho tej qhov txhab, thiab coj peb mus rau hauv Nws tsev neeg. Vaj Ntsujplig ua rau peb lub siab thiab kev xav tsim dheev kom pab peb zeem paub tseeb tias Tswv Yexus yog tus Cawmseej uas tau nqis los hauv ntiajteb tuag txhiv peb tibneeg.
Vaj Ntsujplig qhia tshwm Vajtswv txojkev ncaj ncees. Lo lus lees paub tias: “Yexus Khetos tau los yug ua neeg” kuj txhais tau hais tias Nws los daws tibneeg txojkev txhaum raws li txojkev ncaj ncees. Vajtswv tsis lam tso tseg, es cia li zam kev txhaum twjywm. Hauv txojkev ncaj ncees, Nws tau txib Nws Tib Leeg Tub los ris txojkev txiav txim uas txojkev txhaum tsimnyog raug. Vaj Ntsujplig pab peb zeem paub Vajtswv txojkev ncaj ncees dawbhuv uas qhia tshwm saum tus ntoo khaublig.
Timthawj Yauhas ceebtoom hais tias txhua tus ntsujplig uas tsis kam lees paub Tswv Yexus txojkev los yug ua neeg, ces tsis yog los ntawm Vajtswv los (nqe 3). Qhov no qhia pom hais tias los ntawm txojkev hlub, Vaj Ntsujplig tiv thaiv cov ntseeg kom tsis txhob raug dag. Los ntawm txojkev ncaj ncees, Nws nthuav qhia kom cov ntseeg pom txhua yam yuamkev, tsis ncaj, tawmtsam Yexus Khetos. Vaj Ntsujplig pub peb muaj kev sojntsuam kom peb paub feeb meej qhov tseeb thiab qhov cuav, qhov kaj thiab qhov tsaus, Vajtswv lub suab thiab ntiajteb lub suab.
Lees paub “Yexus Khetos tau los yug ua neeg” txhais tau hais tias peb tso siab rau tus Tswv, raws Nws qab, thiab txiav txim siab raws li Nws qhov tseeb. Nrog rau qhov ntawd, peb kuj vamkhom Vaj Ntsujplig tshoov peb lub siab, txhawb peb txojkev ntseeg, tiv thaiv peb dim ntawm txojkev dag, thiab coj qhia peb kom totaub meej txog Vajtswv txojkev hlub.
Thov Vajtswv,
Tus Tswv, ua Koj tsaug uas Koj tau pub Vaj Ntsujplig los pab nyuam yaus zeem paub Tswv Yexus thiab lees Nws ua nyuam yaus tus Cawmseej. Thov pab kom nyuam yaus niaj hnub nco ntsoov txog Vaj Ntsujplig kev nyob nrog nraim thiab Nws tes haujlwm, kom nyuam yaus tsis raug ntxias lossis ua yuamkev. Nyuam yaus tuav Tswv Yexus Khetos lub npe thov, Amees.
Peb puas zeem paub tseeb hais tias Vaj Ntsujplig tabtom nyob hauv peb lub neej?
Nyeem Vajluskub hauv peb lub xyoos: Ntawv Nkauj 100-101
Kênh Youtube BHKTHN:
