Yôhan 16:5-11
“Lăp Sư jur, Sư tơbăt ăn kơ lu bơngai ala teh âu lu sư đei tơdrong yoch; Sư tơbăt ăn kơ lu sư Inh, Inh ‘lơ̆ng tơpăt; păng tơbăt kơ lu sư gah tơdrong ‘Bok Kei-Dei wă phak lu bơngai ưh kơ lui kơ Sư.”
(Yôhan 16:8)
Nơ̆r jet tơchĕng pơwao:
- Kră Yang Yêsu brŏk tơplei ‘lơ̆ng đei yua tơdrong kiơ?
- Tơdrong jang Yang Bơhngol ‘Lơ̆ng ‘noh tơdrong kiơ?
- Lu bơ̆n pơm thoi yơ kơ plah Yang Bơhngol ‘Lơ̆ng đei tơ’băt ăn kơ bơ̆n tơdrong yoch păng tơdrong rơdu rơmơ̆n lu bơ̆n?
Jơhngơ̆m lu jơ̆ng ‘bang đei tơdrong ơh sơ’ngon kơplah mơ̆ng kơtơ̆ng tơdrong Kră Yang wă ataih đơ̆ng lu sư, thoi noh na Kră Yang đei pơma: “Inh weh đơ̆ng iĕm đei lơ yua kơ lu iĕm” (trong 7). Tơdrong đei yua âu jơ̆ Yang Bơhngol ‘Lơ̆ng đei jur tơla teh âu, Tơ’ngla Pơlung. Lăm Sư, tơdrong dŏng pơklaih đơ̆ng Kră Yang Yêsu ưh kơ trŏ tơdrong ‘noh hlôi hoh đĕch, mă lei băt mơn lăm jơ-hngơ̆m lu bơngai mă lui. Yang Bơhngol ‘Lơ̆ng gô năm wă kơ “chrih tơ’bôh kơ kon bơngai lăm teh đak gah tơdrong yoch, tơdrong ‘lơ̆ng tơpăt păng tơdrong sek tơlang” (trong 8). Pêng tơdrong âu ưh kơ trŏ wă jô̆ kon bơngai yoch ling lang mă lei pơih ăn trong kơ tơdrong tơbral păng tơdrong dŏng pơklaih, noh jơ̆ tơ’bôh ăn jơ-hngơ̆m ‘mêm mơnat tih dêh đơ̆ng Kră Yang.
Mă mônh, Yang Bơhngol ‘Lơ̆ng chrih tơ’bôh lăm jơhngơ̆m kon bơngai “yua kơ lu sư ưh kơ lui kơ Inh” (trong 9). Tu tơm kơ tơdrong yoch ‘noh ưh kơ trŏ kơ pơm tơdrong kơnê̆ đĕch ôh mă lei tơdrong mă ưh kơ lui, sơngah kơ ‘Bok Krist. Nơ̆r “chrih tơ’bôh” lăm nơ̆r tơm ưh kơ trŏ tơ’bôh tơdrong yoch đĕch, mă lei kư̆m đei hlôh wă khan “pơm ăn kơ jơ-hngơ̆m chu yom” Yang Bơhngol ‘Lơ̆ng pơih măt kon bơngai wă kơ lu sư băt kơ tơdrong hli krưp đơ̆ng tơdrong yoch păng ba ăn kơ lu sư tơbral tơdrong yoch.
Mă ‘bar, Yang Bơhngol ‘Lơ̆ng đei chrih tơ’bôh gah tơdrong ‘lơ̆ng tơpăt “yua kơ Inh brŏk tơ ‘Bă” (trong 10). Chăl arih Kră Yang lăm teh đak ‘noh jơ̆ pơm kơmĭl ‘lơ̆ng lăm tôm tơdrong. Kơplah Kră Yang tŏk tơ pal plĕnh, Yang Bơhngol ‘Lơ̆ng đei pơsĭt lăm jơ-hngơ̆m bơ̆n păng tơbăt ăn kơ bơ̆n tơdrong ‘lơ̆ng tơpăt noh jơ̆ chă ‘bôh lăm Kră Yang Yêsu. Yang Bơhngol ‘Lơ̆ng tơ’bôh ăn kơ bơ̆n kon bơngai jơ̆ ưh kơ kĕ păng dui ba bơ̆n lăm tơdrong tôm mah lăm ‘Bok Krist sư jơ̆ Tơngla mă jô̆ ăn ‘lơ̆ng tơpăt ăn kơ lu bơngai bu mă lui.
Mă pêng, Yang Bơhngol ‘Lơ̆ng chrih tơ’bôh kơ kon bơngai lăm teh đak “gah tơdrong sek tơlang, yua kơ lu ‘bok pơtao lăm teh đak âu Kră Yang sek tơlang lu sư bơih” (trong 11). Sa-tan thuơ kơ Kră Yang Yêsu ‘bơ̆t ‘long pơglang bơih. Yang Bơhngol ‘Lơ̆ng đei roi tơbăt kơ tơdrong kơnê̆ gô thuơ păng tơdrong sek tơlang đơ̆ng Kră Yang ‘Bok Kei-Dei gô truh tơpă. Mă khan tơdrong roi lê̆ tơdrong âu nhen thoi hli krưp dêh ră mă lei ‘noh kư̆m tơ’bôh tơdrong ‘mêm mơnat đơ̆ng Kră Yang ‘Bok Kei-Dei. Kră Yang song ăn kơ kon bơngai wă kơ weh ataih đơ̆ng tơdrong hiong răm na năm tơ tơdrong arih lăm Kră Yang Yêsu Krist.
Lăm pêng tơdrong jang tơ kơpal âu, Yang Bơhngol ‘Lơ̆ng đei tơ’bôh ‘Bok Kei-Dei jơ̆ ‘lơ̆ng tơpăt, ‘lơ̆ng rơgoh ưh kơ đei tơdrong yoch, mă lei kư̆m ‘bĕnh blai tơdrong ‘mêm kơ lu bơngai yoch. Yang Bơhngol ‘Lơ̆ng chrih tơ’bôh kơ lu bơngai mă ưh kơ lui wă kơ lu sư băt kơ tơdrong yoch na sơng iŏk Tơdrong ‘Nao ‘Lơ̆ng; Sư chông ba lu bơngai lui năm lăm trong ‘lơ̆ng rơgoh. Băt kơnăl kơ Yang Bơhngol ‘Lơ̆ng oei lăm jơhngơ̆m bơ̆n tơgŭm bơ̆n krăng kơchăng tơbral tơdrong yoch, arih hrĕnh tam gah bơhngol păng ling lang kơdâu tơ Kră Yang Yêsu Krist wă kơ Sư mơnat ăn. Kơplah Yang Bơhngol ‘Lơ̆ng pơdah ăn tơdrong rơdu lu bơ̆n, ‘nĕ kơ weh, athei năm tơ Kră Yang Yêsu na tơbral tơdrong yoch hăm Sư, yua kơ minh ‘nu Sư đĕch ba ăn kơ lu bơ̆n gơh jing ‘lơ̆ng tơpăt ‘bơ̆t a-năp Kră Yang ‘Bok Kei-Dei.
Ơ Yang Bơhngol ‘Lơ̆ng, inh bơnê kơ Ih lăm tơdrong chrih tơ’bôh păng dŏng tơgŭm đơ̆ng Ih. Apinh Ih pơih măt inh wă kơ inh ‘bôh tơdrong yoch, dui ba inh lăm tơdrong ‘lơ̆ng tơpăt đơ̆ng Kră Yang Yêsu Krist, păng tơgŭm inh rim năr arih lăm tơdrong hơdah đơ̆ng Ih pơchrang. Yua anăn Kră Yang Yêsu Krist. Amen
Lu bơ̆n hăm oei yak năm lăm tơdrong chông anhăk đơ̆ng Yang Bơhngol ‘Lơ̆ng lăm rim năr ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 98-99
Kênh Youtube BHKTHN:
