Klei Aê Diê Blŭ: Y-Yôhan 16:7-13
Êlan kliăng:“Ƀiădah Pô Đru, jing Yang Mngăt Jăk, Pô Ama srăng tiŏ hriê hlăm anăn Kâo, Ñu srăng mtô jih jang klei kơ diih, leh anăn Ñu srăng brei diih hdơr jih jang klei Kâo lač leh kơ diih.” (Y-Yôhan 14:26)
Klei êmuh ksiêm mĭn: Hlăm Klei Aê Diê Blŭ, si Aê Diê khăng bi kmhal phung ngă soh? Hŏng si hdră êlan Yang Mngăt Jăk kčŭt jih jang mnuih thâo kral kơ klei soh, kơ klei kpă ênô leh anăn kơ klei phat kđi?Si drei hdĭp tơdah hriăm thâo leh kơ Yang Mngăt Jăk jing Yang Klei Sĭt Nik?
Hlăm Klei Bi Mguôp Hđăp, Aê Diê kpă ênô khăng hưn êlâo brei răng leh anăn bi kmhal mtam mnuih ngă soh: Suôt Y-Ađam leh anăn H’Êwơ kbiă đuĕ mơ̆ng war djam Êđen; dua čô Y-Nađap leh anăn Y-Abihu djiê mtam hlăk diñu dlăng hơăi mang kơ klei Khua Yang mtă (Bruă Lêwi 10:1-2)… Y-Môis lač leh Khua Yang bi êdah klei kpă ênô doh jăk Ñu: “‘Kâo srăng bi êdah Kâo pô doh jăk ti krah phung hriê giăm Kâo, leh anăn Kâo srăng mâo klei mpŭ ti anăp jih jang phung ƀuôn sang.’” (Bruă Lêwi 10:3). Hlăm Klei Bi Mguôp Mrâo, ăt mâo mơh klei truh msĕ si kơ ung mô̆ Y-Ananias leh anăn H’Saphira tŭ klei phat kđi mtam (Bruă Phung Khua Ƀĭng Kna 5:5). Ƀiădah Yang Mngăt Jăk jing Pô Bi Juh, Yang Klei Sĭt Nik, srăng kčŭt lăn ala kơ klei soh hŏng klei gĭr, bŏ hŏng klei pap. Yang Mngăt Jăk jing Yang Klei Sĭt nik, srăng ngă bruă anăn găn hŏng lu tĭng kdrêč knhal:
Êlâo hĭn, Yang Mngăt Jăk kčŭt kơ klei soh (êlan 8). “Kčŭt” hlăm boh blŭ phŭn amâo knŏng mblang jing “phat kđi” ôh, ƀiădah wăt mblang jing “brei arăng thâo kral klei soh wê čiăng kmhal kơ klei soh” mơh. Yang Mngăt Jăk yua ai tiê kpă kăp mñă kơ jih jang mnuih brei kmhal mtam tơdah thâo kral leh klei soh (Rôm 2:15). Klei soh amâo knŏng jing klei gao klei bhiăn ƀiădah wăt jing klei amâo đăo ôh kơ Khua Yang Yêsu, “kyuadah diñu amâo đăo kơ Kâo ôh”. Yang Mngăt Jăk yơh jing Pô kčŭt kơ klei soh, kyuanăn Khua Yang brei phung ƀĭng kna dôk guôn čiăng kăp mă tŭ klei ktang myang Yang Mngăt Jăk, leh anăn kơh nao hiu hưn bi sĭt kơ Khua Yang (Bruă Phung Khua Ƀĭng Kna 1:8).
Tal dua, Yang Mngăt Jăk brei jih jang mnuih thâo klei kpă ênô Khua Yang (êlan 10). Klei kpă ênô anăn knŏng mâo hlăm klei mtô lač leh anăn klei hdĭp Khua Yang Yêsu (Y-Mathiơ 12:18; Y-Luk 23:47). Hlăk Khua Yang đuĕ wĭt kơ Ama, Yang Mngăt Jăk yơh srăng hrô Ñu kăp mtô mñă bi hdơr jih klei Ñu mtô leh. Hŏng Yang Mngăt Jăk yơh hlei pô đăo kơ Khua Yang Yêsu, dưi mâo klei yap kpă: “Đa đa hlăm phung diih mphŭn dô jing leh msĕ snăn yơh. Ƀiădah Aê Diê rao diih leh, bi doh jăk diih leh, yap kpă diih leh hlăm anăn Khua Yang Yêsu Krist leh anăn hlăm Yang Mngăt Jăk Aê Diê drei” (I Kôrantô 6:11).
Tal tlâo, Yang Mngăt Jăk wăt lŏ đru brei arăng thâo kral kơ klei phat kđi leh mơ̆ng Aê Diê leh anăn sĭt nik srăng truh. Klei anei đru grăp čô kăp dôk răng, kmhal kơ klei soh leh anăn mprăp kơ hruê Khua Yang phat kđi.
Yang Mngăt Jăk jing Yang Klei Sĭt Nik dôk hlăm ai tiê drei, đru drei dôk hdĭp kpă ênô leh anăn kčŭt kơ klei soh wăt kơ klei phat kđi, čiăng kơ drei kmhal kơ klei soh, dôk hdĭp bi mơak kơ Khua Yang grăp hruê, hŏng klei anăn drei dưi mâo klei ktang myang Yang Mngăt Jăk hưn bi sĭt kơ Khua Yang Yêsu čiăng kơ lu mnuih thâo kral Khua Yang, đăo kơ Ñu čiăng dưi mâo klei bi mtlaih.
Mâo mơ̆ ya mta klei soh, Yang Mngăt Jăk dôk kčŭt mñă kơ drei ară anei? Si drei dôk mgaih mkra?
Wah lač: Ơ Ama kpă ênô! Akâo Ih mñă brei kâo dôk hdĭp tui hlue Klei Blŭ Khua Yang, hŏng klei thâo săng kơ Khua Yang jing kpă ênô leh anăn srăng phat kđi jih jang bruă kâo ngă leh anăn klei kâo blŭ leh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
