Klei Aê Diê Blŭ: Y-Mathiơ 24:21-28
Êlan kliăng: “Kyuadah hlăk anăn srăng mâo klei knap mñai prŏng, klei msĕ snăn ka tuôm mâo ôh mơ̆ng mphŭn hrih lăn ala truh kơ hruê anei, leh anăn mơ̆ng anăn kơ anăp kăn srăng lŏ mâo rei.” (Y-Mathiơ 24:21)
Klei êmuh ksiêm mĭn: Si Khua Yang Yêsu yăl dliê bi êdah kơ ênuk mâo klei knap mñai prŏng jing? Dŭm boh sui bi kčah kơ ênuk knap mñai prŏng anăn? Ya klei Khua Yang mtă brei phung ƀuôn sang Ñu ruah leh anăn răng? Ya klei bi hriăm drei mâo leh hriăm trăn Klei Aê Diê Blŭ anei?
Blư̆ tal êlâo Khua Yang Yêsu yăl dliê bi êdah kơ phung ƀĭng kna Ñu kơ ênuk knhal tuč, kơ klei knap mñai prŏng tơl “klei msĕ snăn ka tuôm mâo ôh mơ̆ng mphŭn hrih lăn ala truh kơ hruê anei, leh anăn mơ̆ng anăn kơ anăp kăn srăng lŏ mâo rei” (êlan 21). Jih jang pruê̆ blŭ anei čiăng lač anei jing klei srăng truh êdei anăp, leh anăn hnơ̆ng bi rai mơ̆ng klei knap mñai anei kơ anak mnuih jing prŏng êdimima. Msĕ mơh Khua Yang Yêsu brei thâo, kyua “phung Ñu ruah leh” kyuanăn Aê Diê bi hrŏ hĕ hruê bi rai anăn. Klei bi hrŏ anăn amâo djŏ lŏ bi đŭt ênuk klei knap mñai prŏng ôh, ƀiădah čiăng lač Aê Diê knŏng brei yang jhat leh anăn phung tui hlue ñu mâo klei dưi ngă jhat kơ mnuih hlăm brô thŭn Aê Diê bi kčah đuč.
Phung Aê Diê ruah leh jing phung Israel, diñu srăng tŭ klei knap mñai prŏng biădah amâo tŭ klei bi rai jih ôh. Hlăm hruê anăn tơdah diñu thâo kral Krist soh jing amâo djŏ Yang Mêsi Pô diñu dôk guôn ôh snăn diñu mâo klei huĭ leh anăn rŭng răng hĭn, hlăk anăn srăng mâo lu mnuih kgŭ leh anăn hưn kơ ñu pô yang Yang Mêsi, klei anăn ngă kơ diñu rŭng răng hĭn mơh. Khua Yang mtă kơ ƀuôn sang Ñu “đăm nao ôh”, “đăm đăo klei anăn ôh” (êlan 26), kyuadah Yang Mêsi Pô diñu tuôm hngah leh srăng hriê kơ diñu hŏng klei êdah leh anăn hñăr: “Kyuadah msĕ si kmlă kbiă mơ̆ng ngŏ mtrang truh ti yŭ, msĕ snăn mơh klei Anak Mnuih srăng hriê” (êlan 27). Rup tlang grư̆ bi kƀĭn ti anôk mâo asei mlei djiê brei ƀuh mâo lu snăk mnuih srăng djiê hlăm klei bi blah prŏng hruê knhal tuč (êlan 28).
Tơdah dlăng trăn Klei Aê Diê Blŭ anei drei thâo kral klei huĭ hlăm ênuk mâo klei knap mñai prŏng, leh anăn drei thâo mơh anei jing amâo djŏ ênuk Aê Diê pioh kơ Phung Sang Aê Diê ôh. Anei jing ênuk phung ƀuôn sang Israel tŭ klei Aê Diê phat kđi, jing hruê kăm tal kjuh pluh tui si klei Khua pô hưn êlâo Y-Đaniel hưn êlâo (Y-Đaniel 9:24-27), leh anăn kyua klei khăp Aê Diê, Ñu ăt djă pioh phung ƀuôn sang Ñu, amâo brei digơ̆ rai tuč jih ôh hlăm Klei Knap Mñai Prŏng.
Drei bi mni kơ Khua Yang kyuadah drei dôk kkuh mpŭ kơ Aê Diê Pô bŏ hŏng klei khăp leh anăn klei pap. Akâo Khua Yang đru drei thâo mă mmông găl Ñu brei kơ drei êjai ară anei hin čiăng mă bruă kơ Ñu. Brei drei mdơ̆ng kjăp klei hdĭp myang drei pô ti dlông atur Klei Aê Diê Blŭ čiăng kơ amâo mâo pô dưi mplư leh anăn bi lĕ klei đăo drei ôh, kyuadah diñu “čiăng mplư wăt phung Aê Diê ruah leh, tơdah dưi” (êlan 24).
Si ngă drei ăt dôk răng čiăng bi mđĭ klei hdĭp myang drei mơ̆?
Wah lač: Ơ Khua Yang khăp, đru kâo hdơr nanao kơ klei bŏ hŏng klei huĭ tơdah dôk hlăm ênuk mâo klei knap mñai prŏng čiăng kơ kâo dôk kjăp hlăm klei đăo leh anăn dôk sĭt suôr hŏng Ih tơl hruê kâo bi tuôm hŏng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
