Mathais 24:21-28
Nqe cim:
“Rau qhov lub sijhawm ntawd sawvdaws yuav txomnyem kawg nkaus, txij thaum chivkeeb los txog niaj hnub no yeej tsis tau muaj kev txomnyem npaum li zaug no. Thiab yav tomntej yuav tsis muaj li zaum no lawm” (Mathais 24:21)
Lus nug xav:
– Tswv Yexus piav txog lub sijhawm xya xyoo txomnyem zoo li cas?
– Ntu sijhawm teem cia yog pestsawg?
– Vajtswv ceebtoom rau Nws haivneeg yam dabtsi?
– Peb kawm tau dabtsi hauv ntu Vajluskub no?
Thawj zaug Tswv Yexus piav rau Nws cov thwjtim txog lub sijhawm kawg, yuav muaj kev txomnyem kawg nkaus“txij thaum chivkeeb los txog niaj hnub no yeej tsis tau muaj kev txomnyem npaum li zaug no. Thiab yav tomntej yuav tsis muaj li zaum no lawm” (nqe 21). Cov lus no muaj lub ntsiab hais txog tej xwm yuav muaj tshwm los tom ntej, thiab qhov uas ua kom puas ntawm tej xwm no yuav ua rau neeg ntshai kawg nkaus. Tswv Yexus kuj qhia paub, vim cov “cov neeg uas xaiv cia lawm”, hnub uas muaj tej xwm no los raug yuav raug tsawg dua. Qhov uas tsawg dua no tsis tau txhais tias rho lub sijhawm txomnyem kom luv, tiamsis txhais tau tias Vajtswv tsuas pub dab ntxwgnyoog thiab cov neeg uas nrog ntxwgnyoog ua phem rau neeg ntiajteb raws li lub sijhawm Vajtswv teem cia.
Cov neeg uas tau xaiv lawm yog haivneeg Yixalayees, lawv yuav raug tej kev txomnyem hnyav heev tiamsis tsis tuag tu noob. Nyob rau lub sijhawm ntawd, thaum lawv zeem paub tus khetos cuav tsis yog tus Mexiyas uas lawv tos ces lawv hajyam ntxhov siab. Tus Tswv ceebtoom rau Nws haivneeg kom “tsis txhob ntseeg” thiab “tsis txhob mus saib” (nqe 26), vim tus Mexiyas uas ua ntej ntawd lawv tsis lees yuav yuav rov los sai sai thiab cov ntseeg nws yuav pom: “yuav zoo ib yam li xob laim tim sab hnubtuaj ci mus txog rau tim sab hnubpoob” (nqe 27). Tus duab cov noog uablag ya puagncig cev tuag ua rau peb pom muaj kev tuag txaus ntshai heev vim tej kev ua tsov ua rog nyob rau tiam kawg (nqe 28).
Thaum nyeem ntu Vajluskub no peb zeem paub qhov kev txaus ntshai ntawm lub sijhawm xya xyoo txomnyem, thiab peb kuj zeem paub hais tias no tsis yog lub sijhawm Vajtswv pub rau Pawg Ntseeg. Nov yog ntu sijhawm uas cov neeg Yixalayees yuav tsum ntsib Vajtswv kev txiav txim, uas yog lub sijhawm xya caum zaus xya raws li tus cevlus Daniyees hais (Daniyees 9:24-27), thiab los ntawm Vajtswv nplooj siab zoo, Nws tseem tseg Nws haivneeg, tsis pub kom lawv tuag tu noob rau lub sijhawm xya xyoo txomnyem.
Peb ua Vajtswv tsaug vim peb tabtom pehawm Vajtswv tus uas muaj nplooj siab zoo thiab hlub. Thov Vajtswv pub rau peb paub tuav lub sijhawm Nws pub rau peb los ua nws tes haujlwm. Cia li txhim tsa lub neej sab ntsujplig kom ruaj khov rau ntawm tus Tswv, rau qhov “tej cevlus cuav los ua tej txujci tseemceeb ntxias Vajtswv haivneeg, saib puas yuav ntxias tau kom lawv yuam kev” (nqe 24).
Thov Vajtswv,
Vajtswv tus muaj kev hlub, thov qhia nyuam yaus zeem pom txojkev txaus ntshai thaum lub sijhawm xya xyoo txomnyem, kom nyuam yaus paub tuav kev ntseeg ruaj thiab ncaj ncees nrog Koj mus txog thaum kawg. Nyuam yaus tuav Tswv Yexus lub npe thov, Amees.
Peb tabtom tsim los ua tib zoo kho lub neej sab ntsujplig li cas?
Nyeem Vajluskub hauv peb lub xyoo: Tshwmsim 10
Kênh Youtube BHKTHN:
