Mathiơ 24:21-28
“Yua kơ năr noh kơnh đei tơdrong anat anot tih hloh kơ đơ̆ng năr ‘Bok Kei-Dei pơjing plĕnh teh sơ̆ khơ̆ dang ei. Mă-lei đơ̆ng rŏng kơ noh kư̆m huay kơ mah dang noh mơ̆n.” (Mathiơ 24:21)
Nơ̆r jet tơchĕng pơwao:
– Kră Yang Yêsu roi tơ’bôh gah tơdrong gleh anat anot tih thoi yơ?
– Lăm jơ ‘năr mă đei hơgăt lê̆ bơih dôm yơ?
– Đei tơ’blŏk kơ lu bơ̆n tơdrong kiơ đơ̆ng rŏng kơ pơhrăm ‘bai hŏk ‘nâu?
Pơtơm blŭng a Kră Yang Yêsu roi tơ’bôh kơ lu jơ̆ng ‘bang Sư gah chăl hơtuch, gleh anat anot tih “tơdrong truh mă đơ̆ng ‘nao pơjing plĕnh teh truh dang ei tam đei ‘bôh thoi noh, mă đơ̆ng rŏng kơ noh kư̆m ưh pă đei dơ̆ng (trong 21) dôm lu nơ̆r âu pơtih kơ tơdrong gô đei truh tơ anăp ning mônh, păng gô pơrăm lăm tơdrong noh hăm kon bơngai gô mơn kơ hli krưp dêh. Kră Yang Yêsu kư̆m roi tơbăt yua kơ lu “bơngai mă gơh rơih” mă năr pơrăm noh gô rai lăp ai biơ̆. gơh rai dă ‘biơ̆ ưh kơ sĭ khan jơ ‘năr rai kơđeh hloh tơdrong gleh anat anot tih, mă-lei wă khan ‘Bok Kei-Dei gơh asong ăn kơ yang kơnê̆ păng lu bơngai mă kiơ̆ yang kơnê̆ gơh đei pơrăm kon bơngai lăm minh jơ ‘năr đei hơgăt lê̆ bơih.
Lu bơngai mă đei rơih iŏk bơih noh kon pơlei Isarel, lu sư chu iŏk tơdrong anat anot tih krưp dêh, mă-lei huei kơ pơrăm đĭ, lăm năr noh kơplah lu sư hlôh băt bơngai hơlĕnh khan sư kơdih ‘Bok Krist ưh kơ trŏ ‘Bok Mêsi mă lu sư oei chang gô na lu sư rai rŭng răng păng hli tơrơ, lăm kơplah noh lơ bơngai kư̆m gô khan sư kơdih ‘Bok Mêsi bơih pơm kơ lu sư rai hli tơrơ hloh dơ̆ng. Kră Yang khan tơbăt kơ kon pơlei Sư “‘nĕ kơ lui” păng “‘nĕ kơ năm truh” (trong 26). Yua kơ đơ̆ng ‘Bok Mêsi mă adrol noh lu sư hơngah gô năm tơ lu sư kơplah ưh kơ tam kơ băt păng blư bla “Năr ei kơnh đĭ-đăng kon bơngai gô ‘bôh Inh Kon Bơngai jur thoi kơmlat, chêr ‘blêt ‘bôh jơ̆p-jang kơ teh đak mă đơ̆ng hơlĕch truh tơ bơmơ̆t.” (trong 27). Rup sem grơ̆ păr dăr kơ bơngai lôch wă pơma kơ tơdrong lôch răm krưp dêh pŭ iŏk đơ̆ng tơdrong tơblah tih lăm năr tôch ning mônh (trong 28).
Kơplah đŏk Sơ̆p Hla Bơar Nơ̆r ‘Bok Kei-Dei âu lu bơ̆n băt hli krưp lăm chăl tơdrong gleh anat anot tih, păng lu bơ̆n kư̆m băt thoi âu ưh kơ sĭ jơ ‘năr Kră Yang ăn kơ Khul Bơngai Lui. Noh bơih chăl mă kon pơlei Israel gô tơ’bơ̆p hăm tơdrong sek tơlang đơ̆ng ‘Bok Kei-Dei, jơ̆ giĕng mă 70 kiơ̆ kơ Đaniel bơngai pơtruh nơ̆r Kră Yang (Đaniel 9: 24-27) păng yua kơ đơ̆ng Kră Yang iơ̆m dim, Sư oei bơwei kon pơlei pơla Sư, ưh kơ lê̆ lu sư hiong răm lăm năr Gleh Anat Anot Tih.
Lu bơ̆n bơnê kơ Kră Yang yua kơ lu bơ̆n oei kơkuh kơ Kră Yang ‘Bok Kei-Dei ‘bĕnh kơ iơ̆m dim păng ‘mêm mơnat. Apĭnh Kră Yang ăn kơ lu bơ̆n ling lang băt kơ yua iŏk mă Kră Yang ăn kơ chăl dang ei wă bơ̆jang kơ Sư. Athei pơjing tơdrong arih gah bơhngol lu bơ̆n kơjăp kiơ̆ kơ lăm Nơ̆r Kră Yang wă kơ ưh kơ đei bu gơh hơlĕnh lu bơ̆n păng pơrăm đon lui lu bơ̆n oei lui gơnang kơ Kră Yang, yua kơ “ Lu sư kư̆m gơh pơm tơdrong mơsêh wă kơ lu bơngai mă ‘Bok Kei-Dei rơih boih lui kơ lu sư pơhlŭ” (trong 24).
Kơkuh kơ Ih ơ Kră Yang mă ‘mêm mơnat apĭnh Ih tơgŭm inh ling lang ‘blŏk kơ tơdrong hli krưp kơplah oei lăm chăl đei tơdrong gleh anat anot tih wă kơ inh wei kơjăp đon lui lăm Ih păng wei jơhngơ̆m tơnăp hăm Kră Yang truh tơ năr tơ’bơ̆p Ih krao khan yua anăn Kră Yang Yêsu Krist. Amen.
Lu bơ̆n hăm oei kơchăng ưh pơjing tơdrong arih pơ’lơ̆ng gah bơhngol?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Tơ’bôh 10
Kênh Youtube BHKTHN:
