Klei Aê Diê Blŭ: Y-Mathiơ 24:15-20
Êlan kliăng: “Wah lač bĕ čiăng kơ hruê diih đuĕ amâo truh ôh êjai yan puih amâodah êjai hruê sabat” (Y-Mathiơ 24:20)
Klei êmuh ksiêm mĭn: Hlei klei hưn êlâo Khua Yang Yêsu lŏ bi hdơr? Ya klei brei phung dôk hlăm ênuk klei knap mñai prŏng ngă? Si drei mă bi mdjŏ klei Khua Yang Yêsu mtô hŏng hruê anei?
Khua Yang Yêsu lŏ bi hdơr kơ klei hưn êlâo kơ kjuh pluh hruê kăm hlăm hdruôm hră Y-Đaniel 9:24-27. Ñu čiăng mñă kơ ênuk bi kčah kơ phung Yuđa, “Kjuh pluh hruê kăm bi kčah leh kơ phung ƀuôn sang ih leh anăn kơ ƀuôn doh jăk ih…” (Y-Đaniel 9:24). Khua Yang Yêsu brei thâo klei truh hlăm hruê kăm tal kjuh pluh djŏ kơ Sang kkuh mpŭ ti ƀuôn Yêrusalem leh anăn kơ anôk doh jăk, “klei bi êmut kheh mdơ̆ng leh hlăm anôk doh jăk” (êlan 15), čiăng lač tơdah drei ƀuh jih jang klei truh anei snăn drei thâo kơ drei dôk hlăm ênuk knap mñai prŏng msĕ si lač leh hlăm Y-Đaniel 9:27: “Khua srăng truh êdei anăn srăng ngă klei bi mguôp kjăp hŏng lu mnuih êjai sa hruê kăm, ƀiădah ti krah sa hruê kăm anăn ñu srăng brei arăng lui hĕ klei ngă yang leh anăn klei myơr mnơ̆ng myơr čuh. Pô bi truh klei ênguôl srăng mdơ̆ng mnơ̆ng bi êmut kheh ti anôk Aê Diê tuh ti dlông pô bi truh klei ênguôl anăn klei knhal tuč Ñu čuăn leh.”
Khua Yang Yêsu lač leh brei phung dôk hlăm čar Yuđa đuĕ phă čư̆ (êlan 16) kyuadah jih jang klei truh phŭn kơ klei knap mñai srăng djŏ kơ ƀuôn Yêrusalem leh anăn čar Yuđa. Đăm brei pô dôk ti dlông čuôr sang lŏ trŭn mă mđuĕ dŏ dô ñu ôh, leh anăn kăn brei pô dôk hlăm hma wĭt mă ao kpal ñu rei (êlan 17-18), kyuadah amâo lŏ djăp mmông ôh, leh anăn jih jang mnơ̆ng anăn amâo dưi đru mnuih tlaih mơ̆ng klei knap mñai ôh. Brei lui hĕ jih jang leh anăn đuĕ dăp. Phung pap êdimima hlăm klei knap mñai jing phung mniê ba tian leh anăn phung mâo anak dôk mam, digơ̆ amâo dưi êran pral ôh, kyuanăn srăng tuôm hŏng klei dleh dlan, klei knap jhat snăk. Wah lač msĕ mơh čiăng amâo đuĕ hlăm yan puih ôh kyuadah adiê êăt, amâodah hlăm hruê Saƀat kyuadah mâo klei bi dleh hlăm klei êrô êbat tui si klei bhiăn (Klei Kbiă 16:29). Tơdah klei knap mñai prŏng truh hlăm mmông anăn, jih jang mnuih amâo thâo ôh si srăng ngă hŏng jih jang klei truh anăn.
Klei Khua Yang Yêsu hưn êlâo kơ klei srăng truh hlăm ênuk knhal tuč jing klei hưn êlâo kơ klei srăng truh kơ ƀuôn Yêrusalem leh anăn kơ phung Yuđa. Ƀiădah, hruê anei tơdah dlăng trăn Klei Aê Diê Blŭ anei leh anăn dlăng hră Khua pô hưn êlâo Y-Đaniel, grăp čô drei srăng bi mĭn djŏ kơ klei bi knăl kơ hruê knhal tuč ênuk drei dôk hdĭp čiăng kơ drei huĭ leh anăn prăp êmiêt drei pô. Khua Yang Yêsu khăp snăk kơ drei, Ñu “amâo čiăng ôh sa čô srăng rai luč, ƀiădah čiăng kơ jih jang srăng truh kơ klei kmhal kơ klei soh” (II Y-Pêtrôs 3:9), kyuanăn brei drei ksiêm kơ drei pô leh anăn kmhal hĕ kơ klei soh êjai ênuk klei pap ăt adôk, đăm lŏ bi khăng ai tiê, amâo đăo leh anăn dôk nanao hlăm klei soh ôh, kyuadah tơdah ênuk klei knap mñai prŏng truh, ênuk anăn srăng jing ênuk luč jih klei čang hmăng. Akâo Khua Yang đru drei dôk răng nanao čiăng kăp guôn hruê Ñu lŏ trŭn hriê.
Si drei dôk prăp êmiêt drei pô čiăng kăp drông Khua Yang lŏ hriê?
Wah lač: Ơ Khua Yang khăp, bi mni kơ Ih kyuadah Ih amâo čiăng kâo luč klei čang hmăng ôh kyuanăn Ih brei Klei Ih Blŭ čiăng mtă brei kâo dôk răng, đru kâo ksiêm nanao kơ kâo pô tui si Klei Ih Blŭ čiăng kơ kâo ƀuh klei soh kâo ngă leh, leh anăn kmhal hĕ mtam. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Êdah 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
