Mathiơ 24:15-20
“Mă-lei iĕm athei krao khan apinh ‘Bok Kei-Dei ‘nĕ ăn tơdrong noh truh kơplah bơyan ‘mi hngach păng kơplah năr pơdơh Sa’bat”(Mathiơ 24:20).
Nơ̆r jet tơchĕng pơwao:
– Kră Yang Yêsu pao ‘bơm nơ̆r bu khan lê̆ adrol?
– Lu bơngai mă oei lăm tơdrong gleh pơmat noh kăl kơ pơm kiơ?
– Bơ̆n tơchĕng, nơ̆r Kră Yang bơtho noh’bơm kơ bơ̆n dang ei thoi yơ?
Kră Yang Yêsu pao ‘bơm nơ̆r khan lê̆ adrol gah tơpơh jĭt giĕng lăm Hla bơar Đaniel 9:24-27. ‘Noh Kră Yang Yêsu wă tơ’blŏk gah jơ năr lu kon pơlei Juđê. “Đei tơpơh jĭt’măng giĕng hơgăt kơ kon pơlei ih hăm pơlei rơgoh tih ih…” (Đaniel 9:24). Kră Yang Yêsu tơbăt tơdrong đei lăm giĕng mă tơpơh jĭt noh ‘bơm kơ Hnam Akŭm Tơm Pơlei Jêrusalem păng ‘bơm kơ Anih Rơgoh lăm Hnam Akŭm noh,Sư khan: “Ning-mônh iĕm gô ‘bôh lu bơngai kơnê̆ wă pơrăm kon bơngai gô truh, lu sư oei tơ anih đe kơ̆m kơ oei. Đaniel bơngai pơtruh nơ̆r ‘Bok Kei-Dei sơ̆ sư kư̆m roi tơdrong noh mơ̆n. Na bu đŏk lăng hla bơar âu đon sư athei pơwao kơdih.” (Mathiơ 24:15), wă khan mưh ‘bôh lu tơdrong noh truh bơih lei bơ̆n băt kơ jơ ‘noh bơ̆n hơtai oei lăm chăl gleh pơmat tih noh thoi Đaniel đei khan lê̆ adrol lăm Hla bơar Đaniel 9:27: “Sư pơjing tơdrong kơjăp hăm lơ bơngai lăm minh ‘măng giĕng păng truh lăm tŏk-bŏk ‘măng giĕng noh, Sư kư̆m ăn kơ tơmam soi ‘buh pơyơ̆r kư̆m pơdơh. Lu bơngai nai mă pơrăm gô truh hao pơnăr sem krưp dêh păng gô đei tơdrong hil krưp dêh tuh tơ anih juơ dĭng truh tơ sơnăm tôch, mă sơnăm đei pơkă lê̆ boih”.
Kră Yang Yêsu hlôi khan kơ lu bơngai mă oei lăm dêh Juđê athei lu sư tŏk ôn tơ kông (trong 16) yua kơ đĭ-đăng dôm lu tơdrong truh tơm lăm tơdrong gleh pơmat tih noh ‘bơm kơ pơlei Jêrusalem păng Dêh Juđê.
Dah lu bơngai bu oei ngôi kơpal bơbŭng hnam ’nĕ kơ jur iŏk tơmam sư đơ̆ng lăm hnam, bơngai bu oei jang tơ mir ’nĕ kơ brŏk iŏk ao tơnŏ sư tơ hnam (trong 17-18), yua kơ mưh thoi noh kơnh jơ ưh kơ mah ôh, păng lu tơmam‘noh kư̆m ưh kơ gơh tơgŭm kơ kon bơngai klĕch hlôi đơ̆ng tơdrong gleh pơmat tih noh ôh. Athei achăng lê̆ tôm tơdrong na kơdâu ôn. Lu bơngai mă trŏ kơ mơnat dêh kơplah tơdrong gleh pơmat truh noh lu bơngai drŏ-kăn mă oei anăp păng lu bơngai mĕ mă đei kon nge oei mŏm, lu sư ưh kơ kĕ kơdâu hrĕnh lei na lu sư gô tơ’bơ̆p tơdrong anat anot pơmat tat krưp dêh noh.Kư̆m athei krao khan wă kơ huay kơ kơdâu ôn kơplah bơyan tơngiĕt….. kư̆m wă kơ tơdrong gleh anat noh huay kơ truh kơplah năr pơdơh Sa’bat yua kơ tơwŏk hăm Khôi juăt khă ưh kơ ăn chă yak năm lăm năr pơdơh Sa’bat. (LĐ Êyiptơ 16:29). Tơdah tơdrong pơmat tih truh kơplah jơ ‘noh lei rim ‘nu bơngai gô mơ̆ng brơ̆t, ngôi kơtă anih ưh kơ gơh kơdâu weh tơyơ ôh.
Nơ̆r Kră Yang Yêsu khan lê̆ adrol gah lu tơdrong truh lăm jơ năr hơtuch noh lu nơ̆r wă pơma gah pơlei Jêrusalem păng kon pơlei Juđa. Mă khan lei ră, mưh bơ̆n đŏk Hla bơar Mathiơ ‘nâu hei păng đŏk Hla bơar Đaniel bơngai khan lê̆ adrol noh,rim’nu kơ bơ̆n tơtĭnh truh tơ lu tơdra lăm năr hơtuch mă bơ̆n hơtai arih dang ei ’nâu wă kơ bơ̆n băt hli krưp păng băt hơmet hơmot tơdrong arih tơdrong lui bơ̆n kơdih. Kră Yang Yêsu’mêm kơ bơ̆n dêh, “Sư ưh kơ wă kơ minh ‘nu bơngai hiong lăm tơdrong Sư phak ră. Thoi noh na Sư oei gô wă kơ đĭ-đăng bơngai tơbral kơdih tơdrong yoch” (II Pêtrôs 3:9).Yua kơ ‘noh bơih na bơ̆n athei tơchĕng lăng bơ̆n kơdih păng tơbral yua kơ bơ̆n băt kơ jơ năr tơdrong Kră Yang mơnat noh oei oei, oei tam,’nĕ hrăn kơ arăng kơ̆l kuă kơ lui,‘nĕ kơ nŏng kơ pơm yoch dơ̆ng yua kơ mưh jơ năr tơdrong gleh pơmat noh pơtơm truh bơih lei noh bơih jơ năr mă pă đei hơmĕng kiơ bơih.Apinh Kră Yang ăn kơ bơ̆n ling-lang arih hăm jơhngơ̆m kral kơchăng răp sơng năr Kră Yang Yêsu Krist jur dơ̆ng.
Ơ Kră Yang ‘mêm, bơnê kơ Ih yua kơ Ih ưh kơ wă kơ inh oei lăm tơdrong pă đei hơmĕng lei na Ih ăn Nơ̆r Ih tơbăt ăn kơ inh wă kơ inh kơchăng,apinh Ih tơgŭm inh ling-lang lăng Nơ̆r Ih thoi lăng kơmĭl wă kơ’bôh kơnăl dôm tơdrong inh pơm glăi na jah tơbral kơplah jơ oei tam. Krao khan yua Anăn Kră Yang Yêsu Krist, Amen!
Bơ̆n pre hơmet bơ̆n kơdih thoi yơ wă kơ răp sơng Kră Yang wă jur dơ̆ng?
Đŏk Sơ̆p Hla bơar’Bok Kei-Dei lăm pêng sơnăm: TơdrongTơ’bôh 9.
Kênh Youtube BHKTHN:
