I Kauleethaus 1:17-18
Nqe cim:
“Cov neeg uas yuav raug kev puastsuaj xav hais tias, qhov uas Yexus Khetos tuag saum tus ntoo khaublig tsis tseemceeb dabtsi rau lawv li; tiamsis peb cov uas twb tau txais txojkev cawm dim lawm, peb paub hais tias qhov ntawd yog Vajtswv lub hwjchim ntag.” (I Kauleethaus 1:18)
Lus nug xav:
– Zaj qhia uas Timthawj Paulus tsom ntsoov hauv nws txojkev ua haujlwm yog dabtsi?
– Raws li neeg ntiajteb xav, zaj qhia ntawd zoo li cas?
– Raws li peb xav, zaj qhia ntawd muaj lub ntsiab licas?
Timthawj Paulus qhia meej hais tias Yexus Khetos txib nws mus tshajtawm Txojmoo Zoo (nqe 17). Thiab zaj qhia uas nws niaj hnub tshajtawm hauv nws tej xyoo ua haujlwm yog zaj qhia txog Tswv Yexus tus ntoo khaublig. Nws tsis tau tshajtawm zaj lus qhia ntawd los ntawm kev txawj ntse lossis lub ncauj lus zoo ntawm nws tus kheej, tiamsis yog los ntawm tus ntoo khaublig lub hwjchim.
Raws li coob tug xav, ntoo khaublig yog qhov qaug zog thiab txajmuag. Yuav ua li cas txojkev cawmdim thiaj los dhau ntawm ib tug neeg uas raug ntsia rau saum ntoo khaublig? Yuav ua li cas txojkev muaj yeej thiaj li los ntawm kev txomnyem thiab txojkev tuag? Nyob hauv lub tebchaws Loos tiam ntawd, qhov uas raug ntsia saum ntoo khaublig yog qhov uas txajmuag kawg nkaus li. Tiamsis Timthawj Paulus qhia hais tias tej uas ntiajteb saib hais tias yog kev vwm, qhov tseeb tiag yog Vajtswv lub tswvyim. Ntoo khaublig qhia pom hais tias Vajtswv txojkev siab dua peb txojkev, thiab Nws kev npaj tseg cawmdim siab tshaj tibneeg txojkev totaub.
Raws li cov uas ntseeg, ntoo khaublig tsis yog kev vwm tiamsis yog Vajtswv lub hwjchim. Nyob saum ntoo khaublig, tej nuj nqis ntawm kev txhaum raug them tas, thiab Vajtswv txojkev ncaj ncees tau tuav ruaj khov. Tib lub sijhawm ntawd, Vajtswv txoj koob hmoov hlub nchuav lug los thaum txojkev zam txim thiab kev sib raug zoo tau pub rau neeg txhaum. Ntoo khaublig tsis tsuas yog ib lub cim xwb; ntawd yog qhov chaw uas Vajtswv txojkev ncaj ncees thiab txojkev hlub tau sib ntsib. Tej uas ntiajteb saib hais tias swb lawm, ces txojkev ntseeg saib hais tias muaj yeej. Tej uas ntiajteb hu hais tias kev vwm, ces txojkev ntseeg zeem paub tias yog Vajtswv lub hwjchim. Zaj qhia ntawm tus ntoo khaublig yog zaj qhia hais txog Vajtswv lub hwjchim thiab txojkev hlub uas pub rau tibneeg (nqe 18). Tsuas yog tus ntoo khaublig uas Tswv Yexus raug tuag xwb thiaj li muaj hwjchim cawmdim, rau qhov ntawd yog qhov chaw uas Vajtswv txojkev ncaj ncees thiab txojkev hlub tshua tau ua tiav txhij txhua. Timthawj Paulus kuj lees tias: “Tiamsis kuv yuav tsis khav li lawv, kuv tsuas khav hais txog peb tus Tswv Yexus Khetos tus ntoo khaublig xwb. Twb yog vim kuv ntseeg tus uas tuag saum ntoo khaublig, neeg ntiajteb thiaj suav hais tias kuv yog tus uas tuag lawm. Thiab kuv suav hais tias, tej uas muaj nyob hauv ntiajteb no tsis muaj ib yam uas tseemceeb li!” (Kalatias 6:14).
Peb tsis tsuas yog tau hu kom los ntseeg xwb tiamsis yuav tsum ua lubneej nyob hauv tus ntoo khaublig lub hwjchim. Yuav tsum ua lubneej nrog nplooj siab paub ua tsaug, tsis yog qhuas txog yus tus kheej tiamsis qhuas txog Yexus Khetos tus ntoo khaublig. Ntoo khaublig tsis tsuas yog ua tabpov rau txojkev cawmdim xwb tiamsis tseem niaj hnub txhim kho peb lubneej, nqua hu peb kom ua lubneej sib hlub, sib zam txim thiab ua neeg ncaj ncees kom tsimnyog rau Vajtswv txoj koob hmoov hlub.
Thov Vajtswv,
Tus Tswv, thov kom zaj qhia thiab hwjchim ntawm tus ntoo khaublig niaj hnub tshwmsim hauv nyuam yaus lubneej. Thov pab kom nyuam yaus niaj hnub qhuas txog Yexus Khetos tus ntoo khaublig thiab tshajtawm Koj txojkev hlub rau ntau tus neeg. Nyuam yaus tuav Tswv Yexus Khetos lub npe thov, Amees.
Peb qhuas txog Cawmseej Yexus tus ntoo khaublig dhau ntawm peb txojkev ua neej nyob licas txhua hnub?
Nyeem Vajluskub hauv peb lub xyoos: Ntawv Nkauj 92-93
Kênh Youtube BHKTHN:
